Amanamummaadhaan Tajaajiluu Ilaalchisee Fakkeenya Ta’u
1 Sochiin tajaajila yeroo guutuu haaraan qajeelchaa addaa jedhamu bara 1937 jalqabame. Obboloonni tajaajilarratti muuxannoo qaban, iddoo jaarmiyaan Yihowaa isaan ramadetti tajaajiluuf fedhiidhaan of dhiheessaniiru. Waggoota hedduu boodas qajeelchitoonni addaa amanamummaadhaan tajaajiluu ilaalchisee fakkeenya gaarii ta’uusaanii itti fufaniiru.—Ibr. 6:12.
2 Dursa Fudhataniiru: Jalqabarratti qajeelchitoonni addaa kun teeppii bara sanatti sagalee ittiin waraabaniin fayyadamanii manaa gara manaatti lallabu turan. Yeroo deddeebii gaaffii godhanittis kaasseettota mareewwan Macaafa Qulqulluurratti hundaa’anitti fayyadamu turan. Kun kan godhamu magaalaawwan gurguddaa bakka gumiiwwan jiranitti ture. Booddees, bakka labsitoonni Mootummichaa caalaatti barbaachisanitti ergaman. Namoota ergaa Mootummichaatiif fedhii argisiisan hundaa hordofuudhaan qayyabannaawwan Macaafa Qulqulluu geggeessaniiru. Carraaqii isaan godhaniin gumiiwwan haaraan baay’een hundeeffamaniiru. Nuffii tokko malee hojii wangeelaa babal’isuurratti waan hirmaataniif jaarmiyaa Yihowaa keessatti guddinni akkasii kun argamuu danda’eera. (Isa. 60:22) Qajeelchitoonni addaa ammayyuu misiraachoon “waaqa jalaa uumama hundumaatti” akka lallabamuuf hirmaannaa guddaa gochuusaanii itti fufaniiru.—Qol. 1:23.
3 Fakkeenyasaanii Hordofuu Qabna: Qajeelchitoonni baay’een waggoota jaatamaa ol ta’aniif tajaajila yeroo guutuu keessatti hirmaataniiru. Waggoota kana keessatti namoonni kun qorumsa garaa garaatiin amantaa cimaa akka qaban ilaalameera. (1 Phe. 1:6, 7) Bakka caalaatti gargaarsi barbaachisutti tajaajiluuf jecha wantoota isaan barbaachisan aarsaa godhaniiru. Isaan keessaa tokko tokko yeroo ammaatti kan dullooman yeroo ta’u, warri kaanimmoo dhibee fayyaa ykn rakkoowwan gara biraa qabu. (2 Qor. 4:16, 17) Haata’u malee, “Dulluma keessa iyyuu ija in godhatu.” (Far. 92:14) Yihowaatti waan amanamaniif eebbasaa argatu.—Far. 34:8; Fak. 10:22.
4 Kanaafuu, qajeelchitoota addaa galateeffachuun keenya baay’ee barbaachisaadha. Obboloonni kun gumii keessanitti ramadamaniiru yoo ta’e, isaanii wajjin yeroo dabarsuufi muuxannoosaaniirraa guutummaatti fayyadamuuf dursa fudhadhaa. Amanamummaa isaan labsitoota Mootummichaa ta’uudhaan argisiisaniif dinqisiifannaa qabdan ibsaafii. Amanamummaa isaan argisiisanirraa jajjabina argadhaa. Yihowaan ‘namoota amanamootti waan gammaduuf’ namoonni fakkeenyasaanii hordofuuf carraaqan, surraafi eebbasaa argatu.—Fak. 12:22.