‘Wangeelli Mootummaa Kun In Lallabama’!
1. Wanti tokkoyyuu hojii lallabaa dhaabsisuu akka hin dandeenye akkamitti beekna?
1 Wanti Yihowaan fedhasaa akka hin raawwanne dhowwuu danda’u tokkollee hin jiru. (Isa. 14:24) Abbaa Firdii kan ture Giidewoniifi namootasaa 300f, loltoota Miidiyaan 135,000 ta’an injifachuun ulfaataa fakkaatus, Yihowaan, “Israa’elin harka warra Miidiyaan jalaa akka baaftuuf ani si ergeera?” jedheenii ture. (Abo. 6:14) Yeroo ammaatti hojiin deggersa Yihowaa qabu isa kamidha? Yesus, “Wangeelli mootummaa kun guutummaa biyya lafaatti in lallabama” jedheera. (Mat. 24:14) Eenyuyyuu hojiin kun akka hin raawwatamne dhowwuu hin danda’u!
2. Yihowaan tajaajilarratti dhuunfaatti akka nu gargaaru eeguu kan dandeenyu maaliifi?
2 Yihowaan Dhuunfaatti Nu Gargaara: Yihowaan walumatti qabaatti Dhugaa Baatotasaa akka gargaaru kan amannu ta’us, dhuunfaatti nu gargaara jennee eeguu dandeenyaa? Phaawulos ergamaan, yeroo isa barbaachisutti Yihowaan karaa Ilmasaa Yesus Kiristos isa gargaareera. (2 Xim. 4:17) Yihowaan carraaqqii nuyi jaalalasaa raawwachuuf goonus akka eebbisu amanamuu ni dandeenya.—1 Yoh. 5:14.
3. Yihowaan haalawwan akkamii keessatti nu gargaara?
3 Yaaddoon jireenyaa hirmaannaa tajaajilarratti gootu si jalaa hir’iseraa? “Inni warra dadhabaniif humna in kenna.” (Isa. 40:29-31) Ari’atamni ykn mormiin sirra ga’aa jiraa? “Wanta yaada sitti ta’u Waaqayyotti gatii dhiisi, inni akka ati hin kufnetti si irkisa!” (Far. 55:22) Al tokko tokko amanannaa akka hin qabne sitti dhaga’amaa? “Ati dhaqi, ani immoo akka ati dubbattuuf sin gargaara!” (Bau. 4:11, 12) Dhibee fayyaa hirmaannaa tajaajilarratti gootu si jalaa daangessu qabdaa? Yihowaan, carraaqqii ati garaa keetii gootu hammam xinnoo ta’ullee ni dinqisiifata; ittis ni fayyadama.—1 Qor. 3:6, 9.
4. Yihowaatti amanamuun faayidaa maalii nuuf argamsiisa?
4 Harki Yihowaa “ol fuudhameera, eenyutu isa gad deebisa ree?” (Isa. 14:27) Inni tajaajila keenya akka eebbisu amanamuudhaan, utuu gargar hin kutin “aangoo Yihowaatiin ija jabummaadhaan” lallabuu keenya itti haa fufnu.—HoE. 14:3, NW.