Dandeettii Tajaajila Irratti Qabnu Fooyyeffachuu—Barattoonni Kitaaba Qulqulluu Keessan Barsiifata Qayyabannaa Gaarii Akka Qabaatan Gargaaraa

Barbaachisaa Kan Taʼe Maaliifi? Namoonni Kitaaba Qulqulluu qayyabatan karaa hafuuraa gara gaʼeessummaatti akka guddataniif, sammuu isaanii fi garaa isaanii barumsawwan buʼuuraa Kitaaba Qulqulluu sooruu caalaa wanti gochuu qaban jira. (Ibr. 5:12–6:1) Qayyabannaa gochuun carraaqqii gaafata. Yaada haaraa wanta kanaan dura beeknuu wajjin wal qabsiisuu fi faayidaa beekumsi kun qabu hubachuu dabalata. (Fak. 2:1-6) Barattoonni qorannaa dhuunfaa gochuu barachuun isaanii, barreeffamoota keenyatti fayyadamanii gaaffiiwwan Kitaaba Qulqulluutiif deebii kennuuf isaan dandeessisa. Wanta baratan hojii irra oolchuuf carraaqqii cimaan isaan godhan rakkoowwan Kiristiyaanota taʼuu isaaniitiin isaan irra gaʼu dandamachuuf isaan qopheessa.—Luq. 6:47, 48.

Kana Gochuu Kan Dandeenyu Akkamitti?

Qayyabannaa gochuu jalqabuu isaanii dura gargaarsa Yihowaa argachuuf kadhachuun barbaachisaa akka taʼe addeessi.—Yoh. 14:26; 1 Qor. 2:10.
Jalqabumaa kaasiitii qayyabannaa Kitaaba Qulqulluutiif dursee akka qophaaʼu isa jajjabeessi. Barreeffama kee isa ittiin qayyabsiistu itti argisiisiitii jechoota ykn gaaleewwan ijoo taʼan qofa akkamitti jala sararuu akka dandaʼu isa barsiisi.
Barataan kee gaaffiiwwan gaafatamu jecha mataa isaatiin deebii akka kennu godhi. Qayyabannaan keessan gaaffii fi deebii gogaa taʼe, kan baratichi akkasumaan dubbisee, kallattiidhaan kitaabicha irraa itti deebisu akka taʼu hin godhin.
Barataan kee kutaa Kitaaba Qulqulluu muraasa guyyaa guyyaadhaan akka dubbisu jajjabeessi. Karaa buʼa qabeessa taʼeen kana gochuu akka dandaʼuuf sagantaa dubbisa Kitaaba Qulqulluu Weeb saayitii jw.org/am irra jiru itti argisiisi. Guyyaa guyyaadhaan Kitaaba Qulqulluu dubbisuu barsiifata godhachuun gara kuteenya kan gaafatu taʼus, kana gochuuf carraaquun faayidaa guddaa qaba.—Far. 1:2, 3.
Barataan kee Laayibrarii Masaraa Eegumsaa ykn LAAYIBRARII INTARNEETII IRRAA fayyadamuudhaan akkamitti gaaffiiwwan Kitaaba Qulqulluutiif deebii argachuu akka dandaʼu itti argisiisi. Qubeewwan barreeffamoonni yeroo baayʼee gumii irratti itti fayyadamnu ittiin adda baafaman akka hubatu isa gargaari.

Jiʼa Kanatti Akkana Gochuuf Yaali:

Dhuma mata duree xiqqaa ykn boqonnaatti barataan kee wanta barate hima muraasaan walitti qabee akka ibsu isa gaafadhu. Nama Kitaaba Qulqulluu qayyabsiistu hin qabdu taanaan, kutaa Kitaaba Qulqulluu tokko ykn keeyyata Masaraa Eegumsaa tokko hima muraasaan walitti qabanii ibsuu shaakaluudhaan dandeettii dubbistee hubachuu irratti qabdu fooyyessuuf carraaqi.