Dhuma Sirna Kanaa Amanannaadhaan Eeggadhaa

Yeroo dhihootti Yihowaan addunyaa kanatti obsa argisiisuu isaa ni dhaaba. Amantaan sobaa ni balleeffama, saboonni gamtaa uuman saba Waaqayyoorratti haleellaa banu, achiis Yihowaan Armaagedoonitti hamoota ni balleessa. Kiristiyaanonni taʼeewwan guguddaa kana hawwiidhaan eeggatu.

Dhugaadha, waaʼee rakkina guddaa wanta hunda hin beeknu. Fakkeenyaaf, yoom akka jalqabu sirriitti hin beeknu. Humnoonni siyaasaa dhaabbilee amantaarratti haleellaa banuuf wanti isaan kakaasu maal akka taʼe hin beeknu. Haleellaan saboonni saba Waaqayyoorratti banan yeroo hammamiitiif akka turu ykn maalfaa akka dabalatu hin beeknu. Yihowaan Armaagedoonitti hamoota balleessuuf maaliitti akka fayyadamus sirriitti hin beeknu.

Haa taʼu malee, Kitaabni Qulqulluun odeeffannoo yeroo gara fuulduraa amanannaa fi ija jabinaan eeggachuuf nu barbaachisu hunda nuu kenna. Fakkeenyaaf, dhuma “guyyoota dhumaa” keessa jiraachaa akka jirru beekna. (2Xi 3:1) Amantaa dhugaan akka hin balleeffamneef haleellaan amantaawwan irratti banamu akka ‘gabaabbatu’ beekna. (Mat 24:22) Yihowaan saba isaa akka oolchu beekna. (2Ph 2:9) Qaamni Yihowaan hamoota akka balleessuu fi tuuta uummataa guddaa Armaagedoon irraa akka oolchuuf filate qajeelaa akka taʼee fi humna guddaa akka qabus beekna.—Mul 19:11, 15, 16.

Taʼeewwan gara fuulduraatti raawwataman namoonni ‘sodaadhaan akka gaggaban’ godhu. Nuti garuu bara duriitti Yihowaan saba isaa akkamitti akka oolchee fi wanta gara fuulduraa ilaalchisee dubbate dubbisuu fi irratti xiinxaluudhaan, fayyinni keenya akka dhihaate beeknee ‘kaanee dhaabbachuu fi mataa keenya ol qabachuu’ dandeenya.—Luq 21:26, 28.