Maanguddootaa—Isin Gumiidhaaf Qabeenya Guddaadha
“Wantan dargaggummaa kootti raawwachaa ture yommuun yaadu, baayʼee na ajaaʼibsiisa. Amma garuu waanan dulloomeef wantan duraan raawwachaa ture hojjechuu hin dandaʼu.”—Keenii, waggaa 83.
Tarii atis waan dulloomteef wanta duraan raawwachaa turte raawwachuu akka hin dandeenye sitti dhagaʼama taʼa. Waggoota hedduudhaaf amanamummaadhaan Yihowaa kan tajaajilte taʼus, humni kee waan xiqqaateef ilaalcha gaarii ofiif hin qabdu taʼa. Fakkeenyaaf, wanta yeroo ammaatti raawwachaa jirtu, wanta kanaan dura raawwachaa turtee wajjin wal bira qabda taʼa. Taanaan, ilaalcha akkasii injifachuuf maaltu si gargaara?
YIHOWAAN MAAL AKKA GOOTU BARBAADA?
‘Yihowaan maal akkan godhu barbaada?’ jedhii of gaafadhu. Yaadni Keessa Deebii 6:5 irratti argamu si jajjabeessuu dandaʼa. Caqasichi akkana jedha: “Atis Waaqa kee Yihowaa garaa kee guutuudhaan, lubbuu kee guutuudhaan, humna kee guutuudhaanis jaalladhu.”
Akka caqasni kun jedhutti Yihowaan garaa, lubbuu fi humna kee guutuudhaan akka isa tajaajiltu barbaada. Kana beekuun kee, warra kaanii wajjin akka wal bira of hin qabne ykn wanta amma gochaa jirtu wanta kanaan dura gochaa turtee wajjin akka wal bira hin qabne si gargaara.
Dargaggummaa keetti Yihowaadhaaf maal kennaa turte? Tajaajiltoonni Yihowaa hedduun wanta hundarra wayyu kennaa akka turan isaanitti dhagaʼama. Atis yeroo sanatti wanta qabdu keessaa isa hundarra caalu kennaa turte. Ammas haala keerratti hundaaʼuudhaan wanta dandeessu gochaa jirta taʼa. Ilaalcha akkasii yoo qabaatte, Yihowaadhaaf hammuma kanaan duraa kennaa akka jirtu hubachuu dandeessa. Yeroo sanatti wanta hundarra wayyu isaaf kennaa turte, ammas wanta hundarra wayyu isaaf kennaa jirta.
Dargaggummaa keetti Yihowaadhaaf wanta hundarra wayyu kennaa turte; ammas bara dullumaa keetti wanta hundarra wayyu isaaf kennaa jirta
WARRA KAAN GARGAARUU NI DANDEESSA
Waaʼee wanta gochuu hin dandeenyee qofa yaaduu mannaa, carraa hedduu warra kaan gargaaruuf argatterratti yaadi. Kiristiyaana maanguddoo waan taateef, amma wanta dargaggummaa keetti gochuu hin dandeenye tokko tokko gochuu ni dandeessa. Fakkeenyaaf, akkas gochuu dandeessa:
Muuxannoo kee warra kaanitti himi. Mee caqasoota armaan gadiirratti yaadi:
Daawit Mooticha: “Ani dargaggeessan ture, amma garuu dulloomeera, taʼus namni qajeelaan kam iyyuu yommuu gatamu, ijoolleen isaas yommuu nyaata kadhatan hin argine.”—Far. 37:25.
Iyyaasuu: “Kunoo, ani duʼuufan jedha; waadaawwan gaggaarii Waaqni keessan Yihowaan isiniif gale hundumaa keessaa jechi tokko illee utuu hin raawwatamin akka hin hafne isin garaa keessan guutuu fi lubbuu keessan guutuudhaan akka gaariitti beektu. Hundi isaanii iyyuu isiniif raawwatamaniiru. Isaan keessaa jechi tokko illee utuu hin raawwatamin hin hafne.”—Iya. 23:14.
Tarii atis dargaggummaa keetti namoota jajjabeessuuf yaada kanaa wajjin wal fakkaatu dubbatteetta taʼa. Haa taʼu malee, Daawitii fi Iyyaasuun yaada kana kan dubbatan wanta waggoota hedduudhaaf arganii fi dhagaʼanirratti hundaaʼanii waan taʼeef, wanti isaan dubbatan kun humna guddaa qaba.
Atis yeroo dheeraadhaaf Yihowaa tajaajilteetta taanaan, wanta Yihowaan siif ykn warra kaaniif godhe dubbachuu dandeessa. Yihowaan sabasaa karaa adda taʼeen akka gargaare yeroo itti argite ni yaadattaa? Taanaan waaʼee kanaa warra kaanitti himuu ni dandeessa. Waaʼee kanaa warra kaanitti himuun si jajjabeessuu dandaʼa. Tarii kanaan dura akkas gochuudhaan jajjabina argattee taʼuu dandaʼa. Warri kaanis muuxannoo kee dhagaʼuun isaanii baayʼee isaan jajjabeessuu dandaʼa.—Rom. 1:11, 12.
Karaan warra kaan jajjabeessuu itti dandeessu inni kan biraan hamma siif dandaʼame walgaʼii gumiirratti qaamaan argamuudha. Walgaʼiirratti argamuun kee warra kaan ni jajjabeessa, siinis ni fayyada. Keeniin ishiin olitti ibsamte akkana jetteetti: “Walgaʼiirratti argamuun koo akkan abdii hin kutanne na gargaareera. Galma Walgaʼiitti obboloonnii fi obboleettonni jaalala utuu natti argisiisanii akkamittan gadda? Kennaawwan xixinnoo isaaniif kennuudhaan dinqisiifannaan warra kaaniif qabu ibsuufan yaala. Obbolootaa fi obboleettota koo wajjin sochiiwwan hafuuraarratti hirmaachuu koo ittan fufa.”
YIHOWAAN WANTA ISIN RAAWWATTAN HUNDUMAA NI DINQISIIFATA
Kitaaba Qulqulluu keessatti namoonni sababa dullumaatiin hamma barbaadan hojjechuu hin dandeenye hedduun ibsamaniiru; taʼus Yihowaan isaan jaallata. Mee Simiʼoon isa maanguddoo taʼee fi yeroo Yesuus dhalatetti jiraate akka fakkeenyaatti haa ilaallu. Yeroo gara mana qulqullummaa dhaqutti dargaggoonni hojii barbaachisaa yeroo hojjetan argee taʼuu hin oolu. Garuu inni hoo? Akka ilaalcha namaatti umuriisaa kanatti Yihowaa biratti gatii guddaa akka hin qabne yaadee taʼuu dandaʼa. Yihowaan garuu ilaalcha kanarraa adda taʼe qaba ture. Simiʼoon “nama qajeelaa fi nama Waaqayyoof bule” akka taʼetti isa ilaaleera. Akkasumas Yesuus isa daaʼima ture akka argu gochuudhaan isa eebbiseera. Waaʼee daaʼima gara fuulduraatti Masiihii taʼu kanaa raajii dubbachuufillee isatti fayyadameera; “hafuurri qulqulluunis isa irra ture.” (Luq. 2:25-35) Yihowaan dulluma isaarratti utuu hin taʼin, amantii cimaa inni qaburratti xiyyeeffateera.
Yihowaan, Simiʼoon Yesuus isa daaʼima ture akka arguu fi daaʼimni kun gara fuulduraatti Masiihii akka taʼu raajii akka dubbatu gochuudhaan isa eebbiseera
Atis akka durii humna qabaachuu baattus Yihowaan tajaajila amanamummaadhaan raawwattuuf iddoo guddaa akka kennu mirkanaaʼaa taʼuu ni dandeessa. Akka ilaalcha Yihowaatti kennaan namni tokko kennu, “fudhatama kan argatu, hamma qabuun yoo kenne malee, hamma hin qabneen yoo kenne miti.”—2 Qor. 8:12.
Kana yaadatti qabachuudhaan wanta gochuu dandeessurratti xiyyeeffadhu. Fakkeenyaaf, yeroo gabaabaadhaaf yoo taʼellee, yeroo ammaatti gosa tajaajilaa kamirratti hirmaachuu dandeessa? Kana malees, isaaniif bilbiluu ykn xalayaa isaaniif erguudhaan obboloota jajjabeessuu ni dandeessaa? Obboloota jajjabeessuuf jaalalaan kakaʼanii wantoota xixiqqoo gochuunillee faayidaa guddaa qaba. Keessumaa namni yeroo dheeraadhaaf Yihowaa tajaajile yommuu akkas godhu wanti inni godhu sun caalaatti humna qabaata.
Isin maanguddoonni, humni keessan daangaa qabaatus, Yihowaa tajaajiluuf wanta hedduu gochuu dandeessu. Muuxannoo Baha Afriikaa irraa argamee fi saanduqa “Lubbuu Ishii Oolchiteetti” jedhu keessatti ibsame ilaali.
Waggoota hedduudhaaf Yihowaa tajaajiluu fi ammas tajaajiluu kee itti fufuudhaan amanamummaan ati argisiiste warra kaan akka jajjabeessu yaadadhu. Jabaatanii dhaabbachuurratti fakkeenya gaarii taata. Kanaafuu, ‘Waaqayyo jalʼaa akka hin taane, inni hojii kee, akkasumas qulqulloota tajaajiluu fi tajaajiluu kee itti fufuudhaan jaalala maqaa isaatiif argisiiste akka hin irraanfanne’ mirkanaaʼaa taʼuu ni dandeessa.—Ibr. 6:10.
HAMMA SIIF DANDAʼAME WARRA KAAN GARGAARUURRATTI XIYYEEFFADHU
Qorannoowwan akka argisiisanitti maanguddoonni warra kaan gargaaran hedduun fayyaa gaarii qabu, sirriitti yaadu, akkasumas umurii dheeraa jiraatu.
Dhugaadha, hojii gaarii hojjechuun rakkinoota dullumaa wajjin wal qabatanii dhufan hunda hin balleessu. Cubbuu isa madda dullumaa fi duʼaa taʼe balleessuu kan dandaʼu Mootummaa Waaqayyoo qofadha.—Rom. 5:12.
Haa taʼu malee, warri kaan Yihowaa akka beekan gargaaruu dabalatee tajaajilli isin Yihowaadhaaf dhiheessitan, abdiin keessan akka cimu godha; fayyaa keessaniifillee gaarii taʼuu dandaʼa. Maanguddootaa, Yihowaan tajaajila isin isaaf dhiheessitaniif iddoo guddaa akka kennuu fi gumiinis fakkeenya amantii keessan akka dinqisiifatu yaadadhaa.