Wanti Namoonni Duʼuu Jala Gaʼan Akka Argan Dubbatan Sirrii Dhaa?

Deebii Kitaaba Qulqulluu

Namoonni duʼuu jala gaʼan hedduun qaama isaanii irraa adda akka baʼan ykn ifa calaqqisu ykn bakka baayʼee miidhagaa taʼe akka argan dubbatu. Kitaabni Recollections of Death jedhamu, ‘Namoonni tokko tokko haalli kun addunyaa kan biraa arguuf carraa akka argatan kan argisiisu akka taʼe godhanii yaadu’ jedheera. Kitaabni Qulqulluun haala kana ilaalchisee wanta ibsu qabaachuu baatus, dhugaa buʼuuraa, kun mulʼata jireenya itti aanu argisiisu akka hin taane ibsu qabateera.

Namoonni duʼan homaa hin beekan.

Kitaabni Qulqulluun namoonni duʼan “homaa hin beekan” jechuudhaan dubbata. (Lallaba 9:5) Yeroo duunu bakka biraa jiraanna ykn ilaalcha biraa qabaanna jechuu utuu hin taʼin jireenyaa ala taana jechuu dha. Barumsi erga foon keenya duʼee booda lubbuun jiraachuu ishii itti fufti jedhu, Kitaaba Qulqulluu irratti kan hundaaʼe miti. (Hisqiʼel 18:4) Kanaafuu, wanti namni tokko yeroo duʼuu jala gaʼu isatti mulʼatu kam iyyuu samii, Siʼool ykn jireenya duʼa booda jiru kan argisiisu taʼuu hin dandaʼu.

Alaazaar jireenya duʼa boodaa ilaalchisee maal jedheera?

Seenaan Kitaaba Qulqulluu waaʼee Alaazaar ibsu, Alaazaar dhugumaan duʼee akka ture kan argisiisu dha: Alaazaar erga duʼee guyyaa afur booda Yesuus duʼaa isa kaaseera. (Yohaannis 11:38-44) Alaazaar erga duʼee booda jireenya gaarii jiraachaa ture utuu taʼee, Yesuus duʼaa isa kaasee gara lafaatti isa deebisuun isaa gara jabina taʼa ture. Haa taʼu malee, Kitaabni Qulqulluun Alaazaar erga duʼee booda jireenya kan biraa jiraachaa akka ture wanta ibsu hin qabu. Alaazaar jireenya gaarii jiraachaa ture utuu taʼe waaʼee isaa akka dubbatu beekamaa dha. Yesuus, Alaazaar yeroo duʼetti homaa iyyuu akka hin beekne argisiisuuf duʼa isaa hirribaa wajjin wal fakkeesseera.—Yohaannis 11:11-14.