MACAAFNI QULQULLUUN YEROO HARʼAATTI NI FAYYADAA?

HIILTAN ispoortii buunyaa ni jaallata ture. Umurii isaa waggaa torbatti, alattis taʼe bakka dorgommiitti namootaa wajjin wal reebuu jalqabe! Barumsa sadarkaa lammaffaa yeroo baratutti, hiriyoota isaa wajjin nama reeban barbaaduuf naannaʼu turan. “Nan hata, qumaara nan taphadha, poornoogiraafii nan ilaala, dubartoota nan rakkisa, akkasumas warra koo nan arrabsan ture. Amalli koo rakkisaa waan taʼeef warri koo abdii natti kutatanii turan. Barumsa sadarkaa lammaffaa ergan xumuree booda manaan baʼe” jedheera.

Waggaa 12 booda manatti yeroo deebiʼu, warri isaa ilma isaanii taʼuu isaa amanuun isaan rakkisee ture! Tasgabbaaʼaa, nama of toʼatuu fi nama nama kabaju taʼee ture. Jijjiirama ajaaʼibsiisaa akkasii gochuuf kan isa gargaare maali? Erga manaa baʼee booda, jireenyi isaa garamitti adeemaa akka jiru yaaduu jalqabe. Jireenya isaa jijjiiruuf kan isa gargaaru taʼuu isaa ilaaluuf Macaafa Qulqulluu qoree ture. Hiiltan akkana jedheera: “Wantan Macaafa Qulqulluu irraa dubbise hojii irran oolche. Kunis namummaa koo isa moofaa akkan dhiisuu fi ajaja Efesoon 6:2, 3 irratti warra koo akkan kabajuuf naa kenname hojii irra akkan oolchu godheera. Jireenya koo keessatti yeroo jalqabaatiif gammachuu dhugaan argadhe; warra koofis gammachuu guddaan argamsiise; isaan rakkisuu nan dhiise!”

Seenaan Hiiltan, Macaafni Qulqulluun faayidaa akka qabuu fi seerawwan buʼuuraa achi keessatti ibsaman jireenya namootaa jijjiiruuf humna akka qaban addeessa. (Ibroota 4:12) Seerawwan buʼuuraa kana keessaa kan akka amanamummaa, of toʼachuu, hiriyaa gaaʼelaatiif amanamaa taʼuu fi jaalalaa haa ilaallu. Seerawwan buʼuuraa kun jireenya namaa gammachiisaa kan godhan akkamitti akka taʼes ni ilaalla.