QAALAʼIINSA JIREENYAA DANDAMACHUU
Dhugaa Jiru Amanii Fudhadhu
Gatiin miʼootaa suuta suuta dabalaa yommuu deemu, keessumaa mindaan keenyas hammasuma dabalaa deema taanaan nutti beekamuu dhiisuu dandaʼa. Haataʼu malee, gatiin miʼootaa akkuma tasaa yoo dabalee fi mindaan keenya isuma duraanii yoo taʼe, keessumaa maatii kan qabnu yoo taʼe dhiphachuu fi yaaddaʼuu dandeenya.
Gatiin miʼootaa akka hin daballe gochuu hin dandeenyu. Haataʼu malee, dhugaa jiru amannee fudhachuun keenya nu fayyada.
BARBAACHISAA KAN TAʼE MAALIIFI?
Namoonni dhugaa jiru amananii fudhatan . . .
ni tasgabbaaʼu. Yommuu tasgabboofnu caalaatti sirriitti yaaduu fi murtoo gaarii gochuu dandeenya.
barsiifatawwan gaarii hin taanerraa ni fagaatu. Fakkeenyaaf, tajaajila arganneef kaffaluu dhiisuun ykn maallaqa qisaasessuun gaarii miti.
waaʼee maallaqaa miseensota maatii isaanii wajjin wal hin falman.
karaawwan itti dandamatan argachuuf yaalu. Kunimmoo wantoota dursa kennaniif irratti sirreeffama gochuu fi wantoota dhugumaan isaan barbaachisan adda baafachuu dabalata.
WANTA GOCHUU DANDEESSU
Akka haalasaatti sirreeffama godhi. Yeroo gatiin miʼootaa saffisaan ol kaʼutti kan dandaʼamu taanaan baasii keenya hirʼisuun gaariidha. Namoonni tokko tokko jireenya humna isaaniitii ol taʼe jiraachuuf yaalu; kunimmoo bishaan saffisaan yaaʼu tokko asii ol daakuu wajjin wal fakkaachuu dandaʼa. Namoonni akkasii akka of dadhabsiisan beekamaadha. Maatii qabda yoo taʼe wanta maatii keetiif barbaachisu guutuun si yaaddessuu dandaʼa. Kun wanta sirraa eegamudha. Taʼus kana yaadadhu: Miseensonni maatii kee wanta kamiyyuu caalaa, jaalala kee, yeroo kee fi xiyyeeffannaa kee argachuu barbaadu.
Jireenya qananii humna keenyaa ol taʼe jiraachuuf yaaluun, bishaan saffisaan yaaʼu tokko asii ol daakuu wajjin wal fakkaachuu dandaʼa