Gorsa Amantii, Amalaafi Jaalala Ilaalchisee Kenname

YAAQOOBIIFI Yihudaan, obboloota Yesus turan. Phexrosiifi Yohannisimmoo ergamoota Yesus 12an keessaa tokko turan. Namoonni arfan kun, walumaa galatti ergaa torba kan barreessan si’a ta’u, ergaan kunis Caaffata Qulqullaa’oo afaan Giriikii keessatti argama. Tokkoon tokkoon ergaawwan kanaa, maqaa nama ergicha barreesseetiin waamama. Ergaawwan kun, Kiristiyaanonni Yihowaadhaafi Mootummaasaatiif amanamoo akka ta’an gargaaruuf barreeffaman.

Kiristiyaanonni amantiisaanii hojiidhaan argisiisuu qabu. Amantii akka qaban dubbachuu qofti ga’aa miti. Amantii dhugaan hojiidhaaf nama kakaasa. Yaaqoob, “amantiin hojii gaarii hin argisiifne du’aa dha” jedheera. (Yaaqoob 2:26) Yommuu rakkinni namarra ga’u, amantiidhaan tarkaanfii fudhachuun jabina namaaf argamsiisa. Kiristiyaanni tokko milkaa’ina argachuu yoo barbaade, Waaqayyo ogummaa akka isaaf kennu amanuudhaan kadhachuu qaba. Jabinnimmoo, Waaqayyo biratti fudhatama namaaf argamsiisa. (Yaaqoob 1:2-6, 12) Kiristiyaanni tokko amanamaa yoo ta’e, Yihowaan isa gargaara. Yaaqoob, “Waaqayyotti dhi’aadhaa, innis isinitti in dhi’aata” jedheera.—Yaaqoob 4:8.

Amantiin Kiristiyaana tokkoo, qorumsaafi dhiibbaawwan gocha gadhee akka raawwatu isa godhan mo’uuf kan isa gargaaru ta’uu qaba. Bara sana amalli gadheen babal’atee waan tureef, Yihudaan Kiristiyaanonni ‘amantiidhaaf akka lolan’ isaanii barreessuuf dirqameera.—Yihudaa 3.

Kiristiyaanonni amala gaarii qabaachuu qabu. Yihowaan, waaqeffattoonnisaa karaa hundumaan qulqulloota akka ta’an isaanirraa eega. Phexros, “Adeemsa keessan hundumaan qulqulloota ta’aa! Inni caaffata qulqullaa’aa keessatti, ‘Ani [Yihowaan] qulqulluu waanan ta’eef, isinis qulqulloota ta’aa!’ jedheera” jechuudhaan barreesseera. (1 Phexros 1:15, 16) Phexros, “Kristos immoo isiniif dhiphatee, faana isaa duukaa akka buutaniif fakkeenya isiniif kenneera” waan jedheef, Kiristiyaanonni fakkeenya Yesus hordofuu qabu. (1 Phexros 2:21) Kiristiyaanonni seera Waaqayyoo eeguusaaniitti rakkinni yoo isaanirra ga’ellee, ‘yaada garaa isaan hin ceephaane’ qabu. (1 Phexros 3:16, 17) Phexros, Kiristiyaanonni guyyaa firdii Waaqayyoofi addunyaa haaraa “qajeelummaan keessa buufatu” eeggachaa yeroo jiranitti, amalaafi gocha qulqulluu nama Waaqayyoo ta’uusaanii argisiisu akka qabaatan isaan gorseera.—2 Phexros 3:11-13.

Kiristiyaanonni jaalalasaanii argisiisuu qabu. Yohannis ergamaan, “Waaqayyo jaalala” jechuudhaan barreesseera. Akkasumas, Waaqayyo “cubbuu keenyaaf furee” akka ta’uuf Ilmasaa erguudhaan, jaalala guddaa nuuf qabu akka argisiise ibseera. Kiristiyaanonni, wanta isaanii godhame kanaaf dinqisiifannaasaanii akkamitti argisiisuu qabu? Yohannis, “Michoota ko! Waaqayyo akkana erga nu jaallatee, nuufis immoo wal jaallachuun in ta’a” jechuudhaan barreesseera. (1 Yohannis 4:8-11) Karaa jaalala akkasii itti argisiisnu keessaa inni tokko, warra hidhata amantii keenya ta’an keessummeessuudha.—3 Yohannis 5-8.

Haata’u malee, waaqeffattoonni Yihowaa jaalala isaaf qaban argisiisuu kan danda’an akkamitti? Yohannis, “Waaqayyoon jaallachuu jechuunis abboommota isaa eeguu dha; abboommonni isaa immoo ba’aa ulfaatoo miti” jechuudhaan deebii kenneera. (1 Yohannis 5:3; 2 Yohannis 6) Namoonni Waaqayyoof abboomaman, isa biratti jaallatamoo akka ta’an beeku; akkasumas abdiidhaan ‘jireenya barabaraa eeggatu.’—Yihudaa 21.

—Yaaqoob; 1 fi 2 Phexros; 1, 2 fi 3 Yohannis; Yihudaa irratti kan hundaa’e.