Masiihichi ni Mulʼate

DAANIʼEL raajichi raajii erga dubbatee waggaa 500 booda, maleekaa Waaqayyoo kan taʼe Gabriʼeel durba Maariyaam jedhamtuu fi sanyii Daawit Mootichaa taatetti mulʼate. Gabriʼeel, “Yaa ishii baayʼee eebbifamtuu nana, nagaan siif haa taʼu, Yihowaan sii wajjin jira” ishiidhaan jedhe. (Luqaas 1:28) Maariyaam garuu ni sodaatte. Nagaan Gabriʼeel ishii gaafate hiika maalii qaba?

Gabriʼel itti fufuudhaan akkana jedhe: “Yaa Maariyaam, Waaqayyo duratti fudhatama waan argatteef hin sodaatin. Kunoo, ulfooftee ilma ni deessa; maqaa isaas Yesuus jettee moggaasta. . . . Yihowaanis teessoo abbaa isaa Daawit isaaf ni kenna; . . . Mootummaan isaas dhuma hin qabaatu.” (Luqaas 1:30-33) Misiraachoo nama gammachiisu akkamiiti! Maariyaam Masiihicha, jechuunis ‘sanyii’ isa yeroo dheeraadhaaf eegamaa ture ni deessi!

Waggaa itti aanutti, Yesuus Beetaliheem keessatti dhalate. Halkan sana maleekaan tokko tiksitoota naannoo sana jiraniin akkana jedhe: “Kunoo, ani misiraachoo . . . gammachuu guddaa argamsiisu isinitti nan hima. Harʼa magaalaa Daawit keessatti fayyisaan isiniif dhalateera; innis Kiristoos Goofticha dha.” (Luqaas 2:10, 11) Yeroo booda, maatiin Yesuus gara Naazireet jechuunis, gara bakka inni itti guddatee dhaqan.

Dhaloota Kiristoos Booda bara 29⁠tti, jechuunis bara Masiihichi itti mulʼachuu qabutti, Yesuus ‘umurii isaa gara waggaa 30⁠tti’ raajii Waaqayyoo taʼee tajaajiluu eegale. (Luqaas 3:23) Namoonni baayʼeen inni Waaqayyo biraa ergamee akka dhufe hubatanii turan. “Raajii guddaan tokko nu gidduutti kaʼeera” jedhan. (Luqaas 7:16, 17) Haa taʼu malee, Yesuus maal barsiise?

Yesuus namoonni Waaqayyoon akka jaallatanii fi akka waaqeffatan barsiiseera: Akkana jedhe: “Waaqni keenya Yihowaan, Yihowaa tokkicha dha; atis Waaqa kee Yihowaa garaa kee guutuudhaan, lubbuu kee guutuudhaan, sammuu kee guutuudhaan, akkasumas humna kee guutuudhaan jaalladhu.” (Maarqos 12:29, 30) Akkasumas, “Waaqa kee Yihowaa waaqeffadhu; isa qofaaf tajaajila qulqulluu dhiheessi” jedheera.—Luqaas 4:8.

Yesuus namoonni akka wal jaallatan jajjabeesseera: “Nama akka ofii keetti jaalladhu” jedheera. (Maarqos 12:31) Akkasumas, “Wanta namoonni akka isiniif godhan barbaaddan hundumaa isinis isaaniif godhaa. Wanti Seerichii fi Raajonni jedhanis kanuma” jedheera.—Maatewos 7:12.

Yesuus hinaaffaadhaan waaʼee Mootummaa Waaqayyoo namootatti himeera: “Misiraachoo Mootummaa Waaqayyoo magaalota kaanittis lallabuun qaba; sababiin isaas, ani kanaafan ergame” jedheera. (Luqaas 4:43) Mootummaan Waaqayyoo hammana barbaachisaa kan taʼe maaliifi?

Kitaabni Qulqulluun Mootummaan Waaqayyoo bulchiinsa samii isa gara fuulduraatti lafa bulchu akka taʼe barsiisa. Waaqayyo, Yesuus Masiihicha mootii mootummaa kanaa godhee muudeera. Daaniʼel raajichi, Waaqayyo samii irratti Masiihichaaf ‘bulchiinsa, ulfinaa fi mootummaa’ akka kennu dursee dubbateera. (Daaniʼel 7:14) Mootummichi lafti Jannata akka taatu godha; namoota Waaqayyoon tajaajilaniifis jireenya bara baraa argamsiisa. Kun misiraachoo guddaa mitii?