Yesuusii fi Maatiin Isaa Gara Yerusaalem Deeman

Yeroon isaa yeroo arfaasaa ti. Kanaaf, yeroon Maatiin Yoseef akkuma waggaa waggaadhaan godhan, michootaa fi firoota isaanii wajjin gara Yerusaalem itti deeman gaʼeera. Bakka kana kan deeman akka Seerichi ajajutti Ayyaana Faasikaa ayyaaneffachuufi dha. (Keessa Deebii 16:16) Yerusaalem Naazireet irraa gara kiiloo meetira 120 fagaatti. Yeroon isaa, yeroo hunda isaaniitti hojiin baayʼatuu fi yeroo isaan baayʼee itti gammadani dha. Yesuus amma umuriin isaa waggaa 12 siʼa taʼu, guyyaa ayyaanni kun itti kabajamuu fi guyyaa gara mana qulqullummaa deebiʼee itti dhaqu hawwii guddaadhaan eegaa jira.

Ayyaanni Faasikaa, Yesuusii fi maatii isaatiif ayyaana guyyaa tokkoo qofa miti. Guyyaan Ayyaana Faasikaatti aanee jiru, Guyyaa Ayyaanni Maxinoo inni guyyaa torbaaf turu itti jalqabu dha. (Maarqos 14:1) Guyyoonni kun kutaa tibba Ayyaana Faasikaa akka taʼanitti ilaalamu. Mana isaanii isa Naazireetitti argamuu kaʼanii gara Yerusaalem deemanii, Yerusaalem keessa turanii, achiis hanga mana isaaniitti deebiʼanitti torban lama fudhata. Haa taʼu malee, waggaa kanatti Yesuusii wajjin haala wal qabateen wanti isaan mudate waan jiruuf kana caalaa isaanitti fudhata. Rakkinni kun uumamuu isaa kan baran Yerusaalemii utuu deebiʼaa jiranii ti.

Yoseefii fi Maariyaam yeroo karaa irra jiranitti, Yesuus firootaa fi michoota isaanii wajjin waan dhufaa jiru isaanitti fakkaate. Haa taʼu malee, iddoo tokko buluuf yommuu jedhanitti barbaadanii isa dhaban. Kanaaf, namoota sana bira isa barbaaduu dhaqan; garuu isa argachuu hin dandeenye. Ilmi isaanii lafa inni buʼe dhaban! Achiis isa barbaacha gara Yerusaalemitti deebiʼan.

Guyyaa guutuu isa barbaadaa kan oolan taʼus, argachuunii hin dandeenye. Guyyaa lammaffaa irrattis isa argachuu hin dandeenye. Dhuma irrattis guyyaa sadaffaatti, galmawwan mana qulqullummaa keessaa isa tokko keessa, barsiisota Yihudootaa muraasa gidduu taaʼee isa argan. Yesuus, dhaggeeffachaa fi gaaffii hedduu isaan gaafachaa kan ture siʼa taʼu, barsiisonni sunis hubannaa isaa ajaaʼibsiifatan.

Yeroo kanatti Maariyaam, “Yaa ilma ko, maaliif akkana nu goote? Anii fi abbaan kee baayʼee dhiphannee si barbaadaa turre” isaan jette.—Luqaas 2:48.

Yesuus bakka inni jiru beekuu dhiisuun isaanii akka isa dinqisiise haala argisiisuun deebii kenne. “Maaliif ana barbaaddan? Ani mana Abbaa koo keessa taʼuu akkan qabu hin beektanii?” isaaniin jedhe.—Luqaas 2:49.

Erga wal arganii booda, Yesuus Yoseefii fi Maariyaamii wajjin gara Naazireetitti kan deebiʼe siʼa taʼu, isaaniif ajajamuu isaas itti fufe. Ogummaa fi qaamaanis guddachaa deeme. Amma iyyuu ijoollee taʼus, Waaqayyoo fi nama duratti surraa qaba ture. Eeyyee, Yesuus wantoota hafuuraatiif xiyyeeffannaa kennuu qofa utuu hin taʼin, warra isaa kabajuudhaanis ijoollummaa isaatii jalqabee fakkeenya gaarii taʼeera.