Intalli Tokko Deebitee Jiraatte!

Yaayiros, Yesuus dubartii dhiigni ishii dhangalaʼaa ture yommuu fayyisu arge. Kanaaf, Yaayiros “Intalli koo yoona duuteetti” jedhee yoo yaades, Yesuus ishiis fayyisuu ni dandaʼa. (Maatewos 9:18) Yoo duute iyyuu Yesuus ishii ni fayyisaa laata?

Yesuus dubartii fayyisee wajjin utuu dubbachaa jiruu, dhiironni muraasni mana Yaayirosii dhufanii, “Intalli kee duuteetti. Kana booda maaliif Barsiisaa dhamaasta?” isaan jedhan.—Maarqos 5:35.

Kun oduu baayʼee nama naasisu dha! Namni hawaasicha keessatti kabaja guddaa qabu kun amma nama gargaarsa hin qabne taʼe. Intalli tokkittiin inni qabu jalaa duute. Yesuus garuu oduu isaan Yaayirositti himan kana dhagaʼee gara isatti garagalee, “Amani qofa malee, hin sodaatin” jedhee isa jajjabeesse.—Maarqos 5:36.

Achiis Yesuus Yaayirosii wajjin gara mana isaa deeme. Yeroo mana isaatti dhihaatan namoonni utuu wacanii dhagaʼan. Namoonni kun booʼaa, iyyaa fi gaddaan qoma isaanii rurrukutaa jiru. Yesuus ol seenee, “Intalattiin rafaa jirti malee hin duune” jechuudhaan yaada nama ajaaʼibsiisu dubbate. (Maarqos 5:39) Namoonni yeroo kana dhagaʼan isatti kolfan. Intalattiin akka duute beeku. Taʼus, akkuma nama tokko hirriba cimaa keessaa dammaqsuun dandaʼamu, Yesuusis humna Waaqayyo irraa argatetti fayyadamee nama duʼaa kaasuu akka dandaʼu argisiisuuf jedha.

Yesuus Pheexiros, Yaaqoob, Yohaannisii fi warra intalattii irraa kan hafe namoota kaan gad baase. Yesuus namoota shanan kanaa wajjin kutaa reeffi intalattii jirutti ol seene. Achiis harka intalattii qabee, “‘Xaaliitaa quumii’ jedheen; hiikni isaas, ‘Intaloo siin nan jedha, “Kaʼi!”’ jechuu dha.” (Maarqos 5:41) Intalattiin battaluma sanatti kaatee asiif achi deemuu jalqabde. Yaayirosii fi haati manaa isaa yeroo kana argan hammam akka gammadan yaadi! Yesuus intalattiin duʼaa kaʼuu ishii caalaatti mirkaneessuuf, wanta nyaatamu akka ishiidhaaf kennan isaanitti hime.

Kanaan dura Yesuus namoota yeroo fayyisu wanta inni isaaniif godhe namootatti akka hin dubbanne isaan dhowwa ture; warra intala kanaattis kanuma hime. Isaan garuu baayʼee waan gammadaniif, oduu kana “naannoo sana hundatti” babalʼisan. (Maatewos 9:26) Atumti iyyuu namni jaallattu tokko utuu duʼaa kaafamee waaʼee isaa gammachuudhaan hin dubbattuu? Yesuus namoota yeroo duʼaa kaasu kun isa lammaffaa dha.