QOʼANNAA 18

Barumsa Dabalataa kan Kennu

1 Qorontos 9:19-23

YAADA IJOO: Dhaggeeffattoonni kee wanta buʼaa qabu tokko akka baratan akka itti dhagaʼamu gochuudhaan yaada isaanii kakaasi.

Wanta dhaggeeffattoonni kee sana dura beekan yaadi. Wantuma isaan sana dura dhagaʼan irra deebitee dubbachuu mannaa, barumsicha kallattii kan biraatiin akka ilaalan isaan gargaari.

Qabxiiwwan baramoo taʼan saffisaan ibsi, yaadawwan haaraa taʼan garuu suuta jedhii dhiheessi.
Qorannaa godhi, akkasumas irratti xiinxali. Qabxiiwwan ijoo taʼan fakkeenyaan ibsuuf, yeroo dandaʼamutti yaadawwan baayʼee hin beekamne ykn taʼeewwan haaraa taʼanitti fayyadami. Waaʼee barumsa keetii, akkasumas walitti dhufeenya barumsichaa fi odeeffannoowwan caqasuu yaadde gidduu jiru gad fageenyaan yaadi.

Barumsicha yommuu qoʼattu, gaaffiiwwan akka ‘maal, maaliif, yoomi, eessa, eenyuu fi akkamitti’ jedhan of gaafachuudhaan gad fageenyaan yaaduuf fedhii kee kakaasi. Haasaa kee yommuu dhiheessitu hundatti, gaaffiiwwan kana keessaa tokko tokko kaasuu fi deebii kennuudhaan barumsa kee miidhagsi.
Faayidaa barumsa keetii argisiisi. Qabxiiwwan Kitaaba Qulqulluu irratti hundaaʼan jireenya dhaggeeffattoota kee guyyaa guyyaa keessatti akkamitti akka isaan gargaaran ibsi. Haalawwan, ilaalchawwanii fi gochawwan dhaggeeffattoota kee ilaallatan irratti ibsa kenni.