Sii fi Abbootii Fardeenii Arfan

Fardeen arfanii fi warri isaan gulufan waanuma ija keenyaan argaa jirru hamma nutti fakkaatutti, saffisa guddaadhaan gara fuulduraatti gulufaa jiru! Fardi inni jalqabaa adii siʼa taʼu, inni ittiin gulufus mootii haaraa ulfina gonfate dha. Isa boodaan immoo fardi diimaan kan dhufe siʼa taʼu, inni ittiin gulufus guutummaatti lafa irraa nagaa akka balleessu aangoon isaaf kenname. Fardi inni sadaffaan itti aanu immoo gurraacha limixii siʼa taʼu, inni ittiin gulufu harka isaatti madaallii qabatee ture; achiis ergaa gaddisiisaan hanqinni nyaataa akka taʼu ibsu ni dhagaʼame. Fardi inni arfaffaan daalacha siʼa taʼu, dhukkubnii fi golfaan nama ajjeesu akka taʼu argisiisa; inni ittiin gulufus Duʼa dha. Awwaalli immoo namoota duʼan liqimsaa itti dhihaatee isa duukaa buʼa ture!—Mulʼata 6:1-8.

“Yeroo jalqabaatiif waaʼee fardeen arfan kanaa yommuun dubbisu baayʼee sodaadheen ture. Guyyaan Murtii dhufaa akka jiru natti dhagaʼame, ani immoo guyyaa kanaaf waan hin qophoofneef badiisa irraa hin oolu jedheen yaadee ture.”—Kiristaal.

“Waaʼeen abbootii fardeenii arfan halluu adda addaa qabaniin gulufanii baayʼee na dinqisiisee ture. Hiika mulʼanni kun qabu ergan hubadhee booda garuu, wanti hundi ifa naaf taʼeera.”—Eed.

Ati hoo waaʼee abbootii fardeenii Kitaaba Mulʼataa keessatti ibsaman yommuu dubbistu, akka Kiristaal moo akka Eed sitti dhagaʼame? Kanas taʼe sana, mulʼanni waaʼee abboota fardeenii gulufan kanaa seenaa namoonni hedduun beekanii fi Kitaaba Mulʼataa isa kutaa Kitaaba Qulqulluu isa xumuraa taʼe keessatti ibsaman keessaa isa tokko dha. Hiikkaa mulʼata kanaa hubachuun kee dhuunfaatti si fayyaduu akka dandaʼu beektaa? Taanaan akkamitti? Waaqayyo, wantoota kitaaba raajii kana keessatti barreeffaman dubbisuun, barachuunii fi wantoota baranne hojii irra oolchuun gammachuu dhugaa akka nuuf argamsiisu waadaa nuuf galeera.—Mulʼata 1:1-3.

Namoonni tokko tokko mulʼanni waaʼee abboota fardeenii arfan kanaa dubbatu kan isaan sodaachisu taʼus, raajiin kun kan ibsame siin sodaachisuuf miti. Kanaa mannaa, namoonni miliyoonaan lakkaaʼaman, mulʼanni kun amantii namaa kan cimsuu fi waaʼee gara fuulduraa abdii amansiisaa kan namaaf kennu taʼuu isaa hubataniiru. Atis raajii kana irraa faayidaa akkasii argachuu ni dandeessa! Kanaaf, dubbisuu kee akka itti fuftu si jajjabeessina.