Maatiidhaan Tajaajilarratti Hirmaachuuf —Sagantaa Maatii Qabaadhaa
1 Yihowaan ijoollee xixinnoo maqaasaa faarsan yeroo argu ni gammada. (Far. 148:12, 13) Bara Yesus lafarra turetti ‘mucooliinii fi daa’imoonni illee isa galateeffataniiru.’ (Mat. 21:15, 16) Haalli yeroo har’aatti argamuus kanuma fakkaata. Warra kan taatan, ijoolleen keessan tajaajila Kiristiyaanaarratti hinaaffaadhaan Yihowaa akka galateeffatan kan isaan gargaaruu dandeessan akkamitti? Akkuma waa’ee walga’iiwwan gumii dubbaturratti ibsametti, wanti inni guddaan fakkeenya ta’uu keessanidha. Abbaan tokko wanta abbootii baay’eetti dhaga’amu: “Ijoolleen wanta isaanitti himtan caalaa wanta isin gootan gochuutu isaanitti tola!” jechuudhaan ibseera.
2 Obboleettiin warri Waaqayyoon sodaatan ishee guddisan tokko akkas jechuudhaan ibsiteetti: “Sanbadduraa ganama yeroo irribaa kaanu, gara tajaajilaa deemuu keenya gaafannee hin beeknu. Tajaajila akka dhaqnu beekna turre.” Haaluma walfakkaatuun, maatiidhaan tajaajilarratti boba’uuf sagantaa torbaniif baastanirratti cichuudhaan, hojii lallabaarratti hirmaachuun barbaachisaa ta’uunsaa yaada ijoollee keessan keessa akka bulu gochuu dandeessu. Kunimmoo ijoolleen keessan isin ilaaluudhaan akka baratan qofaa utuu hin ta’in isinis ilaalcha, amalaafi dandeettiisaanii isa guddachaa adeemu akka hubattan isin gargaara.
3 Leenjii Irraa Jalaan Itti Fufu: Ijoolleen tajaajilatti akka gammadan gochuuf, karaa bu’a qabeessa ta’een akka irratti hirmaatanitti qophii gochuu isaan barbaachisa. Obboleettiin keeyyata lammaffaarratti caqsne dabaltee akkas jetteetti: “Hojii lallabaa isaanirratti warra keenyaa wajjin kan deemnuuf isaan hordofuuf qofa hin turre. Hirmaannaan keenya balbala rukutuufi waraqaa afeerrii kennuu qofa ta’uyyuu, hamma tokko hirmaannaa akka goone beekna turre. Sanbadduraafi Dilbata gara tajaajilaa ba’uu keenya dura, of eeggannoodhaan waan qophoofnuuf maal akka dubbannu beekna turre.” Torban torbaniin daqiiqaa muraasa fudhattanii, yeroo qayyabannaa maatii gootan ykn yeroo kan biraatti ijoollee keessan tajaajilaaf qopheessuudhaan leenjisuu dandeessu.
4 Maatiidhaan ta’anii tajaajilarratti hirmaachuun, dhugaan laphee ijoollee keessan keessatti akka bulu gochuuf carraa dabalataa isinii kenna. Abbaan Kiristiyaana ta’e tokko, mandaroota bakka inni jiraaturraa fagaatanii argamanitti tiraaktii raabsuuf intalasaa wajjin dhaqaa gala kiiloo meetra 20 miillaan adeema ture. Intallisaa kun, “Abbaan koo dhugaan laphee koo keessa akka bulu kan godhe adeemsa yeroo sanatti goonurratti ture” jechuudhaan haala yeroo sanatti ture yaadatti. (Kes. 6:7) Isinis, maatiidhaan tajaajiluu kutaa sagantaa maatii keessan gochuudhaan eebba walfakkaatu argachuu dandeessu.