Saanduqa Gaaffii

◼ Abbaafi haati sa’aatii ijoolleesaanii waliin qayyabsiisan gabaasuu danda’uu?

Adda durummaadhaan, “adabaa fi barsiisa gooftaatiin” ijoollee guddisuu kan qaban abbootii yoo ta’aniyyuu, haadhotiinis ijoolleesaanii barsiisuurratti ni hirmaatu. (Efe. 6:4) Macaafni Qulqulluun, “gorsa abbaa keetii dhaga’i, barsiisa haadha keetiis hin tuffatin” jechuudhaan ijoollee gorsa. (Fak. 1:8) Karaa warri ijoolleesaanii itti leenjisan keessaa inni tokko, qayyabannaa Macaafa Qulqulluu geggeessuudha.

Kanaan dura, abbaafi haati qayyabannicharratti kan hirmaatan yoo ta’eyyuu, sa’aatii qayyabannicharratti dabarfame kan qabatu isa qayyabannaa geggeessu qofa ture. Amma garuu sirreeffamni godhameera. Abbaafi haati ijoolleesaanii kan waliin qayyabsiisan yoo ta’e, lamaanuu torbanitti hamma sa’aatii tokkoo qabachuu danda’u. Warri ijoolleesaanii barsiisuuf torbanitti sa’aatii tokko caalaa akka dabarsan beekamaadha. Abbaafi haati ijoolleesaanii leenjisuuf carraaqqii walirraa hin cinne godhu. (Kes. 6:6-9) Haata’u malee, gabaasni tajaajilaa ji’a ji’aan deebifamu harki caalaansaa, sa’aatii tajaajilarratti darbe kan argisiisu ta’uu qaba. Kanaafuu, torbanitti sa’aatii tokko caalaa yoo qayyabsiisan, al tokkoo ol yoo geggeessan ykn ijoollee tokkoo ol yoo qayyabsiisaniyyuu, torbanitti sa’aatii tokko caalaa gabaasa gochuun hin danda’amu. Ji’atti qayyabannaa Macaafa Qulqulluu tokkoofi torbanitti deddeebii gaaffii tokko gabaasa gochuu kan qabu abbaa ykn haadha qofadha.