Guyyaa Addaa Qayyabannaa Macaafa Qulqulluuf Itti Namoota Afeerru
1 Amajjii kaasee, gumiiwwan ji’oota hundaatti Sanbadduraafi Dilbata qayyabannaa Macaafa Qulqulluu afeeruurratti kan xiyyeeffatan ta’a. Kunis akka gumichaaf mijaa’utti Sanbadduraa ykn Dilbata ta’uu danda’a. Gaafa sana namni haasofsiisan afeerrii qayyabannaa dhihaateef yoo dide, babal’istoonni kitaaba Barumsa Macaafa Qulqulluu ykn barruulee raabsuu danda’u. Jaarsoliifi tajaajiltoonni gumii hundi sochii babal’istoonni qayyabannaa Macaafa Qulqulluu jalqabsiisuuf godhan qindeessuuf guutummaatti hirmaachuufi isaan gargaaruu qabu.
2 Koreen Tajaajilaa Gumii, torban afeerriin qayyabannaa Macaafa Qulqulluu itti dhiheeffamu ni murteessa. Babal’istoonni manaa gara manaatti tajaajiluuf akka qophaa’aniifi namoota kanaan dura fedhii argisiisanii turan qayyabannaa Macaafa Qulqulluu akka afeeran yeroo yerootti yaadachiisni kennamuufii qaba.
3 Akkamitti Akka Qophoofnu: Qayyabannaa Macaafa Qulqulluu jalqabsiisuuf yaadawwan miiltoo Tajaajila Mootummaa Amajjii 2006fi kitaaba Ragaa Dhiheessuu ful. 12rraa argachuu dandeenya. Obboloonni tokko tokko tiraaktii kan akka Dhugaasaa Beekuu Barbaaddaa? jedhanitti fayyadamuu filatu ta’a. Akkasumas Tajaajilli Mootummaa Hagayya 2007, ful. 3 namoota barruulee fudhatan qayyabannaawwan Macaafa Qulqulluu jalqabsiisuu akkamitti akka dandeenyu yaada kennaa. Jaarsoliifi tajaajiltoonni gumii walga’ii tajaajila dirree gabaabaa ta’eefi daqiiqaa 10 hanga 15 fudhatu kan geggeessan si’a ta’u, yeroo kanatti yaada qayyabannaa Macaafa Qulqulluu jalqabsiisuuf gargaaru tokko ykn lamarratti mari’atu ykn hojiin argisiisaan dhiheessu.
4 Namoonni hundi afeerraa qayyabannaa Macaafa Qulqulluu dhiheessinuuf akka hin fudhanne ykn yeroo dheeraaf qayyabannaa akka itti hin fufne beekamaadha. Yihowaan namoota hoolotatti fakkeeffaman gara jaarmiyaasaatti waan harkisuuf, qayyabannaa namoota afeeruu seesuu hin qabnu. (Yoh. 6:44) Itti gaafatamummaan keenya sanyii dhugaa facaasuu qofa utuu hin ta’in, kunuunsuufi bishaan obaasuudhaan hidda godhatee akka jabaatu gochuu si’a ta’u, kunis namoota garaa qajeeloo qaban Macaafa Qulqulluu qayyabsiisuu dabalata. Akkas gochuudhaan Waaqayyoo wajjin hojjechuuf mirga arganna.—1 Qor. 3:9, hiika bara 1899.