Tajaajilli Keenya Jaalala Waaqayyoof Qabnu Kan Argisiisudha
1. Jaalalli Yesus, Waaqayyoof qabu maal akka godhu isa kakaasee ture?
1 Jaalalli, Yesus tajaajilasaa akka raawwatu isa kakaaseera. Tajaajilasaa wajjin haala wal qabateen wanti Yesus raawwate hundi Yihowaaf jaalala akka qabu ragaa kan ta’udha. Yesus, “Ani abbaa jaallachuu koo, akka abboommii abbaan anaaf kennettis hojjechuu koo biyyi lafaa haa beeku” jedheera. (Yoh. 14:31) Nuyis duuka buutota Yesus waan taaneef, tajaajila keenyaan jaalala guddaa Waaqayyoof qabnu ibsuuf mirga arganneerra.—Mat. 22:37; Efe. 5:1, 2.
2. Jaalalli Yihowaaf qabnu tajaajila keenyarratti dhiibbaa gaarii kan geessisu akkamitti?
2 “Maqaan Kee Qulqulluu Ta’ee Haa Eegamu”: Carraa arganne hundatti fayyadamnee, hinaaffadhaan yommuu waa’ee Yihowaafi mootummaasaa warra kanitti dubbannu, jaalala Waaqayyoof qabnu kan ibsinu ta’uusaarrayyuu, maqaansaa akka qulqullaa’u gumaacha goona. (Far. 83:18; His. 36:23; Mat. 6:9) Akkuma Yesus godhe, nuyis tajaajila keenya itti fufuudhaan maqaan Yihowaa akka qulqullaa’uufi fedhiinsaa akka raawwatamu hawwii guddaa akka qabnu argisiisna.—Mat. 26:39.
3. Jaalalli Yihowaadhaaf qabnu rakkoowwan akka moonu kan nu gargaaru karaawwan kamiini?
3 Jaalalli Rakkoowwan Akka Moonu Nu Kakaasa: Jaalalli Yihowaadhaaf qabnu rakkoo hundaa akka moonu nu taasisa. (1 Qor. 13:4, 7) Yesus rakkoowwan hedduun tajaajilasaa akka hin raawwanne isa gochuu danda’an isa mudatanii turan. Haata’u malee, yommuu rakkoon isa mudateetti, jaalalli guddaan inni Yihowaadhaaf qabuufi hawwiin inni fedhii Abbaasaa raawwachuuf qabu rakkoo kana mo’uuf isa gargaareera. (Mar. 3:21; 1 Phe. 2:18-23) Nuyis rakkoowwan hedduun kan nu mudatan si’a ta’u, jaalalli Waaqayyoof qabnu garuu kana akka moonu nu gargaara. Fakkeenya Yesus hordofuudhaan tajaajila keenyarratti waan nuu danda’ame hundaa yommuu raawwannu, gara kuteeyyiifi kan duubatti hin jenne ta’uu dandeenya. Mormiin, fayyaa dhabuun, dullumni ykn namoonni dantaa kan hin qabne ta’uunsaanii dhiibbaa kan nurratti godhan ta’anis, tajaajila keenya karaa bu’a qabeessa ta’een raawwachuudhaan jaalala Yihowaadhaaf qabnu akka hin argisiisne nu dhowwuu hin danda’an.
4. Jaalalli Yihowaadhaaf qabnu mirga akkamii nuu argamsiisa?
4 Jaalalli humna guddaa qaba, nutis tajaajila keenyaan Waaqayyoon garaa guutuudhaan akka jaallannu argisiisuuf dandeettii qabna. (1 Qor. 13:13) Yeroo maqaan Yihowaa barabaraaf qulqullaa’uuf baay’ee dhihaate keessa jirru kanatti, jaalalli keenya ‘itti caalaa kan deemu haata’u.’—Filp. 1:9; Mat. 22:36-38.