Waraqaan Afeerrii Ayyaana Yaadannoo Addunyaa Maratti Ni Raabsama!
1. Ayyaana Yaadannoo dura addunyaa maratti duula addaa akkamii gochuuf karoorfameera?
1 “Kanas seenaa kootiif godhadhaa!” (Luq. 22:19) Dhugaa Baatonni Yihowaa abboommii Yesus kanaaf ajajamuudhaan, du’a Yesus kabajuudhaaf Bitootessa 30, 2010, namoota fedhii qabanii wajjin walga’u. Waraqaan afeerrii Ayyaana Yaadannoo addaa kun addunyaa maratti Bitootessa 13 hanga 30tti raabsama.
2. Waraqaa afeerrii ayyaana yaadannoo akkamitti raabsuu dandeenya?
2 Akkamitti Raabsama? Fakkii waraqaa afeerrii sanarra jiru akka ilaaluuf nama afeertu sanaaf erga kennitee booda, akkas jechuu dandeessa: “Bitootessa 30, namoonni miliyoonaan lakkaa’aman Ayyaana Yaadannoo du’a Yesus kabajuuf addunyaa maratti walga’u. Atiifi maatiinkees walga’ii kanarratti akka argamtan isin afeeruufan dhufe. Michoonnikees sii wajjin dhufuu danda’u. Sa’aatiifi bakki ayyaanichi itti kabajamu asirratti argama.” Haallisaa mijaa’aa taanaan, ajaja Caaffanni Qulqullaa’oon dhimma kanarratti kennan itti argisiisuuf Luqaas 22:19 dubbisuufii dandeessa. Haata’u malee, naannoo tajaajilaa keenya waliin ga’uuf yeroon qabnu muraasa waan ta’eef, waan dubbannu gabaabsuun gaarii ta’uusaa yaadadhu.
3. Eenyuufaa afeeruu dandeenya?
3 Naannoon tajaajilaa keessan bal’aa yoo ta’e, jaarsoliin namoota mana hin jirreef guyyuma jalqabaa waraqaa afeerrii kana keessanii deemuu akka dandeessan qajeelfama isinii kennuu danda’u. Haallisaa kan mijaa’u taanaan, waraqaa afeerrii qofa utuu hin ta’in, barruulee kaan raabsaa. Namoota deddeebii gaaffii gootaniif, namoota Macaafa Qulqulluu qayyabsiistan, warra wajjin hojjettan, wajjin barattan, firoottan, ollaawwaniifi namoota beektan kaan afeeraa.
4. Dinqisiifannaan jaalala Yihowaan furii nuu dhiheessuudhaan nutti argisiiseef qabnu maal gochuuf nu kakaasa?
4 Hirmaannaa Guutuu Gochuuf Qophaa’i: Tibbi Ayyaana Yaadannoo sochii keenya guddifachuuf carraa gaarii nuu bana. Qajeelchaa gargaaraa ta’uuf haalakee mijeessuu ni dandeessaa? Ijoollee ykn barataa Macaafa Qulqulluu guddina gaarii argisiisaa jiru qabdaa? Taanaan, babal’istoota hin cuuphamne ta’anii duula addaa kanarratti hirmaachuuf ga’eessa ta’uuf dhiisuusaanii beekuuf jaarsolii haasofsiisi. Jaalala Yihowaan furii nuu dhiheessuudhaan nutti argisiiseef dinqisiifannaan qabnu, ofii keenyaa argamuu qofa utuu hin ta’in, hanga dandeenye namoonni baay’een akka nu wajjin argaman afeeruuf nu kakaasa.—Yoh. 3:16.