Amala Barsiisaa Gaarii Tokkoof Hunda Caalaa Barbaachisaa Taʼe
1. Amalli barsiisaa tokkoof hunda caalaa barbaachisaa taʼe maalidha?
1 Namni tokko Macaafa Qulqulluu akka gaariitti akka barsiisu kan isa dandeessisu maalidha? Barumsa biyya lafaatii? Muuxannoo qabaachuusaatii? Moo dandeettii uumamaasaati? Amalli barbaachisaa taʼe, isa Seerawwan kaan raawwachuuf gargaaruu, duuka buutota Yesus addaan baasee beeksisu, akkasumas amalawwan Yihowaan qabu keessaa isa hundarra caaluufi nama hawwatudha. (Yoh. 13:35; Gal. 5:14; 1 Yoh. 4:8) Amalli kun jaalaladha. Barsiistonni gaariin amala kana ni argisiisu.
2. Namootaaf jaalala qabaachuun keenya barbaachisaa kan taʼe maaliifi?
2 Namoota Jaalladhu: Barsiisaa Guddicha kan taʼe Yesus, namootatti jaalala kan argisiise yommuu taʼu, kunimmoo akka isa dhaggeeffatan isaan kakaaseera. (Luq. 5:12, 13; Yoh. 13:1; 15:13) Namootaaf kan yaannu yoo taʼe, carraa arganne hundumaatti ni lallabna. Wantoonni akka ariʼatamaafi dantaa dhabummaa jiran lallabuurraa duubatti akka jennu nu hin godhan. Namoota haasofsiisnuuf garaadhaa kan yaannu yoo taʼe, lallabni keenya dhimmawwan isaan yaaddessanirratti akka xiyyeeffatu goona. Yeroo nama qayyabsiisnu sanaa wajjin taanu qofa utuu hin taʼin, qayyabannaa hundumaa geggeessuuf qophaaʼuudhaafis fedhiidhaan yeroo ramaduu qabna.
3. Jaalalli dhugaa Macaafa Qulqulluutiif qabnu tajaajilarratti kan nu gargaaru akkamitti?
3 Dhugaa Macaafa Qulqulluu Jaalladhu: Yesus dhugaa Macaafa Qulqulluu waan jaallatuuf, akka qabeenya guddaatti ilaala ture. (Mat. 13:52, NW) Dhugaa kan jaallannu yoo taʼe, miira hoʼaadhaan dubbachuudhaan miira dhaggeeffattoota keenyaa kakaasuu dandeenya. Jaalalli akkasii hirʼina qabnurratti utuu hin taʼin, ergaa guddaa dabarsinurratti akka xiyyeeffannu waan nu gargaaruuf, sodaa tajaajilarratti qabnu nuu hirʼisuu dandaʼa.
4. Jaalala guddifachuu kan dandeenyu akkamitti?
4 Jaalalakee Guddifadhu: Jaalala namootaaf qabnu guddifachuu kan dandeenyu akkamitti? Jaalala Yihowaaniifi Ilmisaa Yesus nutti argisiisanirratti, akkasumas haala gaddisiisaa karaa hafuuraa namoonni keessatti argamanirratti xiinxaluudhaani. (Mar. 6:34; 1 Yoh. 4:10, 11) Jaalala dhugaa Macaafa Qulqulluutiif qabnummoo, yeroo hunda qayyabannaa dhuunfaa gochuufi xiinxaluudhaan guddifachuu dandeenya. Jaalalli kutaa ija hojii hafuuraati. (Gal. 5:22) Kanaafuu, Yihowaan hafuura qulqulluu akka nuu kennuufi jaalalaan guddachuuf akka nu gargaaru isa kadhachuu dandeenya. (Luq. 11:13; 1 Yoh. 5:14) Sadarkaan barumsa keenyaa, muuxannoon dhugaa keessatti qabnu ykn dandeettiin uumamaa keenya maaliyyuu yoo taʼe, jaalala argisiisuudhaan Macaafa Qulqulluu barsiisuurratti milkaaʼina argachuu dandeenya.