Yaada Garaa Keessan Eegaa
1. Matadureen walgaʼii addaa waggaa tajaajilaa 2013 maalidha? Kaayyoon sagantichaahoo maalidha?
1 Guyyaa guyyaatti, haalawwan yaada garaa keenya nu jalaa mancaasuu dandaʼan nu mudatu. Kanaaf sagantaan walgaʼii addaa waggaa tajaajilaa 2013f baʼe mataduree, “Yaada Garaa Keessan Eegaa” jedhuun qophaaʼeera. (1 Xim. 1:19) Sagantaan kun, tokkoon tokkoon keenya akkaataa kennaa dinqisiisaa uumaa keenyarraa arganne kanatti fayyadamaa jirruuf xiyyeeffannaa guddaa akka kenninu nu gargaaruuf kan qophaaʼedha.
2. Walgaʼii addaarratti gaaffiiwwan gurguddaa kamfaatu deebii argata?
2 Wantoota Kanarratti Xiyyeeffadhaa: Sagantaan kun gaaffiiwwan buʼuuraa yaada garaa ilaalchisee kaʼan torbaaf deebii kenna:
• Wanti yaada garaa balaadhaaf saaxiluu dandaʼu maalidha?
• Yaada garaa keenya leenjisuu kan dandeenyu akkamitti?
• Dhiiga namoota hundumaatti gaafatamuurraa ooluun kan dandaʼamu akkamitti?
• Yaanni keenyaafi akkaataan nuti seera buʼuuraa Macaafa Qulqulluu hojiirra itti oolchinu waaʼee keenya maal ibsa?
• Yaada garaa warra kaanii madeessuurraa fagaachuu kan dandeenyu akkamitti?
• Dargaggootaa, dhiibbaa ejjennoo keessan akka laaffistaniif isaanirra gaʼu moʼuu kan dandeessan akkamitti?
• Namoonni yaada garaasaanii isa hafuura qulqulluutiin geggeeffamu hordofan eebba akkamii argatu?
3. Barumsi walgaʼii addaarratti argannu nu gargaaruu kan dandaʼu akkamitti?
3 Gargaarsa Yihowaatiin carraaqqii Seexanni yaada garaa keenya mancaasuuf godhu moʼuu ni dandeenya. Abbaan keenya inni samii jaalala qabeessa taʼe, karaa Dubbii Waaqayyoofi jaarmiyaasaa, “Karichi isa kana, isa irra adeemaa!” nuun jechaa jira. (Isa. 30:21) Karaa Yihowaan qajeelfama kana itti nuuf kennaa jiru keessaa tokkommoo walgaʼii addaa kanadha. Kanaaf, guutummaa sagantichaarratti argamuuf qophii godha. Barumsa dhihaatu xiyyeeffannaadhaan dhaggeeffadhaa; dhuunfaadhaan akkamitti hojiiirra oolchuu akka dandeessanis yaadaa. Waaʼee sagantichaarratti maatiidhaan mariʼadhaa. Qajeelfama walgaʼii kanarraa argannu hojiirra oolchuun keenya, ‘yaada garaa nu hin ceephaane’ qabaannee itti fufuufi gammachuu biyya lafaa isa liphsuu ijaa gidduutti baduun akka hin gowwoomfamne of eeguuf nu gargaara.—1 Phe. 3:16.