Viidiyoo Haaraa Qayyabannaa Macaafa Qulqulluu Jalqabsiisuuf Gargaaru
Namoonni baayʼeen viidiyoo gabaabaa mataduree, “Macaafa Qulqulluu Qayyabachuu Kan Qabnu Maaliifi?” jedhu qabuufi Weeb saayitii jw.org jedhamurratti argamu daawwachaa jiru. Viidiyoon kun kan qophaaʼe namoonni garaa qajeelaa qaban, afeerraa Macaafa Qulqulluu akka qayyabataniif nuti isaanii dhiheessinu akka fudhatan isaan kakaasuufidha. Viidiyoo kana, gajjallaa fuula jalqabaa Weeb saayitii keenyaarraa mataduree “Macaafa Qulqulluu Tola Qayyabachuu Barbaaddaa?” jedhu cuqaasuudhaan ykn QR (quick response) duuba tiraaktota haaraarratti argamu iskaan gochuudhaan argachuun ni dandaʼama. Karaawwan viidiyoo kanatti akka gaariitti fayyadamuu itti dandeenyu tokko tokko armaan gaditti caqasamaniiru.
Deddeebii gaaffii yommuu gootu nama haasofsiisaa jirtu sanaan, “Viidiyoo gabaabaa gaaffiiwwan qabduuf Macaafa Qulqulluurraa deebii argachuu kan dandeessu akkamitti akka taʼe ibsu sitti argisiisuu?” jedhi. Yoo irratti walii gale, moobaayilii keerraa ykn kompiitarasaarraa viidiyoo sana itti argisiisi.
Karaa al idilee taʼeen tajaajila dirreerratti yeroo hirmaannu tiraaktota haaraa raabsaa jirta yoo taʼe, koodii QR jedhamuufi duuba tiraaktichaarratti argamu itti argisiisuudhaan namni sun koodii sana moobaayiliisaatiin akka inni iskaan godhu jajjabeessiin. Koodiin QR jedhamu viidiyoo sana afaanota hedduudhaan kallattiidhaan argachuuf waan gargaaruuf, yeruma sana moobaayiliitti fayyadamuudhaan viidiyoo sana taphachiisuun ni dandaʼama.
Nama sii wajjin hojjetu, sii wajjin baratu, firoota keefi nama beektu kaanitti waaʼee viidiyoo kanaa himi, akkasumas isaanitti argisiisi. Yookiin liinkii viidiyoo sanaa iimeeliidhaan isaanii ergiitii ofumasaaniitii akka ilaalan godhi.
Qophii haaraa kanatti yoo fayyadamne, namoota hedduu qayyabannaa Macaafa Qulqulluu jalqabsiisuudhaan ‘namoota jireenya barabaraa argachuuf yaada garaa sirrii taʼe qaban’ karaa hafuuraa gargaaruu ni dandeenya.—HoE. 13:48, NW.