Ergaa Mootummichaa Babalʼisuuf Carraa Argattanitti Fayyadamaa!
1. Fakkeenya Daawitirraa barumsa akkamii arganna?
1 Daawit Mootichi haalli inni keessa jiru sochiisaa akka jalaa daangessu hin heyyamu ture. Fakkeenyaaf, yeroo tokko Yihowaadhaaf mana ijaaruu barbaadee ture. Kana akka hin goone yommuu dhowwametti garuu, karoorasaa jijjiiruudhaan wantoota ijaarsa mana qulqullummaatiif barbaachisan qopheessuudhaan Solomooniin gargaareera. (1 Mot. 8:17-19; 1 Sen. 29:3-9) Daawit wanta gochuu hin dandeenyerratti utuu hin taʼiin, wanta gochuu dandaʼurratti xiyyeeffateera. Carraa argannutti fayyadamuudhaan ergaa Mootummichaa babalʼisuuf yommuu yaalii goonutti, fakkeenya Daawit hordofuu kan dandeenyu akkamitti?
2. Of qoruu kan dandeenyu akkamitti?
2 Wanta Dandeessan Godhaa: Obboloonni hedduun qajeelchaa gargaaraa ykn qajeelchaa taʼuuf jecha, jireenya salphaa taʼe jiraachuuf sirreeffama godhaniiru. (Mat. 6:22, miiljalee NW) Isinoo fakkeenyasaanii hordofuu ni dandeessuu? Haala keessan kadhannaadhaan erga qortanii booda, “hojii guddaa . . . hojjechuudhaaf karaan” akka isiniif baname ni hubattu taʼa. Taanaan, carraa kanatti fayyadamaa!—1 Qor. 16:8, 9.
3. Haalli keenya qajeelchaa taʼuuf kan nuuf hin heyyamne taʼus, dhugaa baʼuuf carraawwan kamitti fayyadamuu dandeenya?
3 Haataʼu malee, haalli keessan qajeelchaa taʼuuf isin hin dandeessisu yoo taʼehoo? Carraawwan kan biraa akka qabdan hin dagatinaa. Fakkeenyaaf, hojiin keessan namoota Dhugaa Baatota Yihowaa hin taanee wajjin kan wal isin qunnamsiisu taanaan, carraa argattanitti fayyadamuudhaan maaliif isaaniif dhugaa hin baatan? Sababa fayyaatiin mana yaalaa ni deemtu taanaanimmoo namoota gama kanaan gargaarsa isiniif godhaniif dhugaa baʼuu ni dandeessuu? Babalʼistoonni sababii dullumaatiin ykn dhibee fayyaa cimaa taʼeen kan kaʼe haalli isaanii isaan daangessu, daqiiqaa 15 gabaasa gochuu akka dandaʼan qophiin godhamuusaas hin dagatinaa. Gabaasa tajaajila jiʼaa ennaa deebistan, yeroo karaa alidilee taʼeen dhugaa baʼuudhaan dabarsitan, akkasumas tiraaktotaafi waraqaa afeerrii Ayyaana Yaadannoofi walgaʼii naannoo dabalatee barreeffama raabsitan hunda guutuu keessan mirkaneeffadhaa. Yeroon carraawwan xinnoo fakkaatan sanatti fayyadamuudhaan dabarsitan, gabaasa keessan hammam akka isinii guddisu ennaa ilaaltan baayʼee dinqisiifamtu!
4. Maal gochuuf murteessiteetta?
4 Haalli keessa jirru maaliyyuu yoo taʼe, carraa argannu hundatti fayyadamuudhaan misiraachicha babalʼisuuf yaalii haa goonu. Kana kan goonu taanaan, hojii Mootummichaatiif wanta dandeenye hunda akka goone waan hubannuuf gammachuu ni arganna.—Mar. 14:8; Luq. 21:2-4.