Yihowaan Namoota Qulqulluu Taʼan ni Jaallata

“Harka keessan dhiqadhaa. Kutaa keessan qulqulleessaa. Lafa isaa qulqulleessaa. Kosii gataa.” Warri hedduun karaa qaamaa akkamitti qulqulluu taʼuu akka dandaʼan ijoollee isaanii ni barsiisu. Haa taʼu malee, qulqullina ilaalchisee duraan dursee qajeelfama kan kenne Waaqa keenya isa qulqulluu taʼe dha. (Bau 30:18-20; Kes 23:14; 2Qo 7:1) Qaama keenyas taʼe miʼawwan keenya qulqullinaan kan qabnu yoo taʼe Yihowaadhaaf ulfina kennina. (1Ph 1:14-16) Waaʼee mana keenyaa fi naannoo keenyaa hoo maal jechuutu dandaʼama? Namoota karaa irrattii fi bakka bashannanaatti kosii gatan irraa haala faallaa taʼeen, Kiristiyaanonni lafa qulqullinaan qabuuf wanta isaaniif dandaʼame hunda godhu. (Far 115:16; Mul 11:18) Akkaataan itti wantoota xixinnoo kan akka, qola karameellaa, haayilaandii ykn maastikaa itti gannu illee qulqullinaaf ilaalcha akkamii akka qabnu kan mulʼisu dha. Kallattii jireenya keenyaa hundaan, ‘akka tajaajiltoota Waaqayyootti of dhiheessuu’ barbaanna.—2Qo 6:3, 4.

VIIDIYOO WAAQAYYO NAMOOTA QULQULLUU TAʼAN NI JAALLATA JEDHAMU TAPHACHIISI, ACHIIS GAAFFIIWWAN ARMAAN GADII DEEBISUUF YAALAA:

• Namoonni tokko tokko miʼawwan isaanii qulqullinaan qabuu dhiisuu isaaniitiif sababii akkamii dhiheessu?

• Seerri Musee ilaalcha Yihowaan qulqullinaaf qabu kan ibsu akkamitti?

• Utuu waan tokko hin dubbatin waaʼee Yihowaa dhugaa baʼuu kan dandeenyu akkamitti?