Kitaaba Qulqulluu Isa Sagaleedhaan Waraabame Akka Gaariitti Fayyadamaa Jirtuu?

Kitaabni Qulqulluun inni sagaleedhaan waraabamee qophaaʼe maalidha? Kitaabni Qulqulluun inni sagaleedhaan qophaaʼe waraabbii Hiika Addunyaa Haaraa isa haareffameeti. Waraabbiin kun hamma dandaʼame irraa jalaan afaanota hedduudhaan ni qophaaʼa. Kitaaba sagaleedhaan waraabamee qophaaʼe kana wanti adda godhu taatota Kitaaba Qulqulluu keessa jiraniif sagalee namoota garaagaraa fayyadamuu isaati. Ergaa Kitaaba Qulqulluu sirriitti dabarsuuf jechoonni sagalee fi miira sirrii taʼeen dubbifamu.

Namoonni tokko tokko Kitaaba Qulqulluu isa sagaleedhaan qophaaʼe kana irraa fayyadamaa kan jiran akkamitti? Namoonni dhaabbataadhaan waraabbii kana dhaggeeffatan hedduun akkaataa inni Dubbii Waaqayyoo itti ifa godhu jaallataniiru. Namoonni garaagaraa taatota garaagaraa bakka buʼanii yommuu dubbisan dhagaʼuun isaanii taateewwan Kitaaba Qulqulluu yaadaan ilaaluu fi wanta barreeffame caalaatti hubachuuf akka isaan gargaare itti dhagaʼameera. (Fak 4:5) Kana malees namoonni baayʼeen yeroo dhiphatanitti waraabbii kana dhaggeeffachuun isaanii akka isaan tasgabbeesse hubataniiru.—Fr 94:19.

Dubbiin Waaqayyoo sagalee ol kaʼaadhaan yommuu dubbifamu dhagaʼuun keenya jireenya keenya irratti dhiibbaa guddaa geessisa. (2Se 34:19-21) Kitaabni Qulqulluun guutuun isaa ykn gartokkeen isaa afaan hubachuu dandeessuun sagaleedhaan waraabamee qophaaʼeera yoo taʼe, waraabbii kana dhaggeeffachuu sochii hafuuraa dhaabbataadhaan godhatu keessaa tokko godhachuu ni dandeessaa?

VIIDIYOO KITAABA QULQULLUU SAGALEEDHAAN QOPHEESSUU—GABAABFAMEE KAN FUDHATAME JEDHAMU ERGA ILAALTANII BOODA, GAAFFII ARMAAN GADII DEEBISUUF YAALAA:

Kitaaba Qulqulluu sagaleedhaan qopheessuu ilaalchisee wanti si dinqisiise maalidha?