Wantoota Sagaleedhaan Waraabamanitti Fayyadamuu Kan Dandeenyu Akkamitti?
1. Barreeffamoota maxxanfamaniin ala qophii faayidaa qabu akkamiitu jira?
1 Namoonni hedduun dubbii dhugaa nama gammachiisuu fi sirrii taʼe dubbisuuf weebsaayitii jw.org jedhamutti fayyadamu. (Lal. 12:10) Ati wantoota sagaleedhaan waraabamanitti ni fayyadamtaa? Wantoonni sagaleedhaan waraabaman kun, odeeffannoowwan weebsaayitii keenya irra jiran hedduu dhaggeeffachuun akka dandaʼamu godhaniiru. Wantoonni sagaleedhaan waraabaman kan nu fayyadan akkamitti?
2. Qayyabannaa dhuunfaa ykn maatii irratti wantoota sagaleedhaan waraabamanitti fayyadamuu kan dandeenyu akkamitti?
2 Qayyabannaa Dhuunfaa ykn Maatiitiif: Yeroo karaa deemnu ykn yeroo sochii guyyaa guyyaa raawwannu Macaafa Qulqulluu, barruulee ykn barreeffama sagaleedhaan waraabame kan biraa dhaggeeffachuun, yeroo keenyatti akka gaariitii akka fayyadamnu nu gargaara. (Efe. 5:15, 16) Wanta sagaleedhaan waraabame dhaggeeffachaa barreeffama keenya qabannee yoo hordofne, waaqeffannaan maatii keenya bifa adda addaa akka qabaatu goona. Keessumaa dubbisa keenya fooyyeffachuu yoo barbaadne ykn afaan haaraa barachaa kan jirru yoo taʼe, wantoota sagaleedhaan waraabamanitti fayyadamuun keenya nu gargaara.
3. Naannoo tajaajilaa keenyatti wantoota sagaleedhaan waraabamanitti namoonni akkamii fayyadamuu dandaʼu?
3 Tajaajilaaf: Namoonni naannoo tajaajilaa keenya keessa jiranii fi dubbisuuf yeroo akka hin qabne itti dhagaʼamu, wantoota sagaleedhaan waraabaman dhaggeeffachuuf fedhii ni qabaatu taʼa. Yookiin immoo namoota afaan kan biraa dubbatanii fi ergaa Mootummichaa ‘afaan itti dhalataniin’ yoo dhagan fedhii qabaachuu dandaʼan arganna taʼa. (HoE. 2:6-8) Naannoowwan tokko tokkotti, dhaggeeffachuun aadaa bakka guddaa qabu dha. Fakkeenyaaf, aadaa namoota Himoong keessatti namoonni seenaa isaanii ijoollee isaaniitiif kan dabarsan dubbiidhaan yeroo taʼu, odeeffannoo dhagaʼan tokko akka gaariitti qabatu. Aadaawwan hedduu Afriikaa keessa jiran keessatti namoonni seenaawwan dhagaʼuudhaan baratu.
4. Namoota naannoo tajaajilaa keenya keessatti argaman gargaaruu ilaalchisee gaaffiiwwan akkamii of gaafachuu qabna?
4 Naannoo tajaajilaa keessanitti, afaan nama haasofsiistaniitiin wanta sagaleedhaan waraabame tokko akka fakkeenyaatti dhageessisuun faayidaa qabaachuu dandaʼaa? Namni tokko barreeffama sagaleedhaan waraabame iimeeliidhaan isaaf erguun keenya isa fayyaduu dandaʼaa laata? Barreeffama sagaleedhaan waraabame CD irratti feenee nama fedhii qabu tokkoof kooppii waraqaadhaan maxxanfamee wajjin erguu ni dandeenyaa? Mala kanatti fayyadamuudhaan tajaajila keenya irratti kitaaba, birooshura, barruulee ykn tiraaktii tokko guutuu isaa namaaf yoo kennine barreeffama akka raabsinetti galmeessuu dandeenya. Wantoonni sagaleedhaan waraabaman qayyabannaa dhuunfaa keenyaafis taʼe, sanyii Mootummichaa yommuu facaasnu akka itti fayyadamnuuf kan nuuf qophaaʼani dha.—1 Qor. 3:6.