GAAFFII DARGAGGOOTAA

Kitaabni Qulqulluun Na Gargaaruu kan Dandaʼu Akkamitti?—Kutaa 3: Dubbisa Kitaaba Qulqulluu Kee Irraa Calaatti Faayidaa Argadhu

Kitaaba Qulqulluu bantee yeroo ilaaltu jechoota baayʼee achi keessa jiran argita. Kun Kitaaba Qulqulluu dubbisuuf abdii akka si kutachiisu hin heyyamin! Kanaa mannaa, Kitaabni Qulqulluun akkuma miinjaala nyaata miyaaʼaa garagaraa qabatee godhii yaadi. Wanta argite hunda nyaachuu hin dandeessu. Haa taʼu malee, hanga si quubsu filachuu dandeessa.

Dubbisa Kitaaba Qulqulluu irraa faayidaa argachuuf wanta dubbistu irratti xiyyeeffachuu qabda. Mata dureen kun kana gochuuf si gargaaruu dandaʼa.

Mata duree kana keessatti

Wanta Kitaaba Qulqulluu irraa dubbistu irratti xiyyeeffachuu kan qabdu maaliifi?

Caalaatti Kitaaba Qulqulluu dubbisuuf carraaqqii yommuu gootu caalaatti faayidaa argachaa deemta. Mee fakkeenya kana ilaali: Baala shaayii yeroo muraasaaf qofa bishaan danfe keessa yoo cuubdee miʼaa xinnoo argatta. Bishaan danfe keessa takka yoo tursite garuu caalaatti miʼaa argatta.

Kubbaayyaa shaahii sarara qabu. Kubbaayyaan tokko bishaan baalli shaahii akka gaariitti hin cuuphamne qabateera. Kubbaayyaa inni kaan immoo bishaan baala shaahii akka gaariitti cuuphame qabateera.

Kitaaba Qulqulluu dubbisuunis kanaa wajjin wal fakkaata. Saffisaan callistee dubbisuu mannaa yeroo fudhadhuutii wanta dubbisaa jirtu irratti yaadi. Barreessaan Faarfannaa 119 akkana godheera. Seera Waaqayyoo ilaalchisee, “Guyyaa guutuu isa irratti nan yaada” jedheera.—Faarfannaa 119:97.

Akkas jechuun garuu guyyaa guutuu Kitaaba Qulqulluu dubbisuu fi waaʼee isaa yaaduu qabda jechuu miti. Yaanni jedhamuu barbaadame akkana: Faarfatichi Dubbii Waaqayyoo irratti yaaduuf yeroo ramadeera. Akkana gochuun murtoowwan gaarii gochuuf isa gargaareera.—Faarfannaa 119:98-100.

“Yeroo tokko haati koo akkana naan jettee turte: ‘Torban keessatti guyyoota torba qabda, torban sana keessa wantoota dhuunfaa kee hedduu raawwatta. Maarree Yihowaadhaaf yeroo muraasa maaliif hin ramaddu? Kun wanta sirrii gochuu qabdudha.’”—Meelanee.

Qajeelfamni Kitaaba Qulqulluu, fakkeenyaaf yeroo michoota filattu ykn wanta dogoggora taʼe akka raawwattu qorumsi yeroo si mudatu murtoo gaarii gochuuf si gargaara.

Dubbisa Kitaaba Qulqulluu irraa guutummaatti faayidaa argachuu kan dandeessu akkamitti?

Karoora baafadhu. Shamarreen Juuliyaa jedhamtu akkana jetteetti: “Kitaaba Qulqulluu dubbisuuf sagantaa baafadhu. Wanta dubbisuuf jettu, yoom akka dubbistuu fi bakka itti dubbistu beeki.”

Shamarree sagantaa dubbisa Kitaaba Qulqulluu kaaleendara irratti barreessaa jirtu.

Bakka mijataa filadhu. Shamarreen Giyaanaa jedhamtu akkana jetteetti: “Bakka sin jeeqne filadhu. Akkasumas maatiin kee akka si hin jeeqneef sagantaa dubbisa Kitaaba Qulqulluu akka qabdu itti himi.”

Meeshaa elektirooniksiitti fayyadamta taanaan ergaa ergamu sagalee akka hin dhageessisne godhi. Tarii Kitaaba Qulqulluu maxxansaan jirutti fayyadamuus dandeessa. Dhugaadha qorannaan godhame barreeffama maxxansaan jiru irraa dubbisuun wanta dubbisaa jiran salphaatti hubachuuf akka gargaaru argisiisa. Iskiriinii irraa yeroo dubbisan garuu xiyyeeffannaa cimaa kennuun ulfaataa taʼuu dandaʼa.

“Iskiriinii irraa dubbisuun yaada koo akka hihiru hubadheera. Meeshaa elektirooniksii ani itti fayyadamu ergaa natti mulʼisa ykn baatiriitu hirʼata ykn Intarneetiitu dhaabata. Kitaaba barreeffamaan jiru ilaalchisee garuu wanti na yaaddessu ifa gaʼaa argachuu qofadha.”—Eelenaa.

Jalqaba kadhadhu. Kutaa Kitaaba Qulqulluu dubbisuuf jettu hubachuu fi yaadatte akkarraa fayadamtuuf akka si gargaaru Yihowaa gaafadhu.—Yaaqoob 1:5.

Kadhannaa kee wajjin haala walsimuun deddeebiʼuuf seenaa waaʼee dubbisaa jirtuu gad fageenyaan qoradhu. Kana gochuu kan dandeessu akkamitti? Appilikeeshinii JW Library ykn Intarneetii irraa Kitaaba Qulqulluu dubbista taanaan caqasa tokko ilaalchisee qorannaa dabalataa gochuuf caqasicha tuquudhaan mata dureewwan waaʼeesaa ibsan argachuu dandeessa.

Gaaffii gaafadhu. Fakkeenyaaf: ‘Seenaan kun waaʼee Yihowaa maal na barsiisa? Waaʼee amala isaa ani hordofuu qabuu ibsaa?’ (Efesoon 5:1) ‘Seenaa kana irraa barumsan jireenya koo keessatti hojii irra oolchuu qabu akkamiin baradha?’ (Faarfannaa 119:105) ‘Wantan dubbisu irraa karaa taʼe tokkoon namoota ittiin gargaaruu nan dandaʼaa?’—Roomaa 1:11.

Akkasumas, ‘Wantin dubbise ergaa Kitaaba Qulqulluu wajjin kan walqabatu akkamitti?’ jedhii of gaafadhu. Keessumaa gaaffiin kun baayʼee barbaachisaadha. Maaliif? Yaadawwan Kitaaba Qulqulluu Uumamaa kaasee hanga Mulʼata Yohaannisitti jiran hundi karaa taʼeen ergaa ijoo tokkoo wajjin walsimu. Kunis Yihowaan karaa Mootummaa isaa isa samii maqaa isaa akka qulqulleessu, bulchuuf mirga akka qabu kan mirkaneessuu fi bulchiinsi isaa hunda irra akka caalu argisiisa.

Hiriyoonni kee maal jedhu

“Seenaa ni jaallatta taanaan baroota lakkoofsaa ykn arkiyooloojii waaʼee mootummoota Kitaaba Qulqulluu keessatti ibsamanii qoʼadhu. Seenaa dhuunfaa barachuu ni jaallatta taanaan waaʼee namoota akka Daawit baradhu. Tokkoon tokkoon namootaa seenaa adda taʼe qabu. Barumsa argachuu barbaaddu qofa irratti xiyyeeffadhu.”—Juudaa.

“Seenaa tokko Kitaaba Qulqulluu irraa yeroon dubbisu gaariis taʼu gadhee taatota hunda hubachuun jaalladha. Kanaafuu akkana jedheen gaafadha: ‘Nama kana irra maaltu gaʼa laata? Amala akkamii argisiise/te? Buʼaan isaa hoo maalidha?’ Achiis, ‘Seenaan kun kan na fayyadu akkamitti?’ jedheen of gaafadha.”—Maakniizii.

“Kitaaba Qulqulluu yeroon dubbisu yaada naannoo seenichaa jiru hubachuuf qorannaa gochuufan yaala. Fakkeenyaaf seenaan kun yoom barreeffame? Seenaa kana kan barreesse eenyu? Kaayyoon kutaa Kitaaba Qulqulluu kana maalidha? Seenaawwan hedduun yeroo harʼaa hojiirra ooluu kan dandaʼudha. Haa taʼu malee gad fageenyaan qorachuun koo, namoota yeroo sana jiraatan akkamitti akka tuqe caalaatti hubachuuf na gargaareera.”—Eel.

“Kitaaba Qulqulluu yeroon dubbisu seenicha nama taʼe tokkoof ibsaa akkan jirutti godheen yaada. Namni sun akka hubatu gargaaruu kanan dandaʼu akkamitti? Qabxicha ifa gochuuf fakkeenya akkamiitti fayyadamu? Waaʼee deebii gaaffiiwwan kanaa yaaduun wantan dubbisaa jiru caalaatti hubachuuf na gargaareera. ‘Wanta tokko barachuuf hunda caalaa gaarii kan taʼe, wanta sana nama kan biraa barsiisuudha.’”—Oowan.