Addunyaa Kun Dhiheenyatti ni Badaa? Apookiliipsiin maali dha?
Jecha “apookiliipsi” jedhamu yommuu dhageessu maaltu gara sammuu keetti dhufa? Badiisa guutummaa addunyaa irratti dhufu, tarii immoo wanta jireenya lafa irra jiru hunda balleessu akka taʼe gootee yaadda taʼa. Namoonni tokko tokko keessumaa immoo gabaasawwan oduu armaan gadii yommuu dubbisan addunyaan kun dhiheenyatti ni bada jedhanii amanu.
“Waraana niwukilarii kaʼuun isaa waan hin oolle dha. Taʼe jedhamee, akka tasaa ykn wal hubachuu dhabuudhaan uumamuu dandaʼa.”—Bulletin of the Atomic Scientists.
“Waggoottan kurnan darbanitti, obomboleettiiwwan hedduun, ibiddawwan bosona irraa kaʼan, ongee, hoʼa garbootaatiin kooraaloonni addaachuun isaanii, dabaluu hoʼaa fi lolaawwan hedduun gaʼaniiru.”—National Geographic.
“Weerarri hawaannisaa waggoota hedduudhaaf taʼeen hin beekne Afriikaatti miidhaa geessiseera.”—The Associated Press.
Maarree lafti ni baddii? Kitaabni Qulqulluun maal jedha?
Lafti irra jiraannu ni baddii?
Lakki. Kitaabni Qulqulluun inni Dubbii Waaqayyo taʼe lafti bara baraaf akka jiraattu nuuf mirkaneessa. (Lallaba 1:4) Waaqayyo lafa uume balleessuu mannaa, namoota ‘lafa mancaasan ni balleessa.’—Mulʼata 11:18.
Addunyaan kun ni badaa?
Akka Kitaabni Qulqulluun jedhutti “addunyaan” balleeffamu, addunyaa ilmaan namootaa Waaqayyoof ulfina hin kenninee fi fedhii ofittummaa isaa hordofu dha. Akkuma bara Nohitti godhe, Waaqayyo “addunyaa namoota Waaqayyoon hin sodaanne” balleessa.—2 Pheexiros 2:5; 3:7.
Akkuma 1 Yohaannis 2:17 jedhutti, “addunyaanii fi hawwiin isaa darbaa jiru.” Caqasni kun Waaqayyo kan balleessu lafa irra jiraannu kana utuu hin taʼin namoota wanta hamaa hojjechuu isaanii itti fufan akka taʼe ibsa.
Dhumni yoom dhufa?
Kitaabni Qulqulluun guyyaa dhumni itti dhufu kallattiidhaan nutti hin himu. (Maatewos 24:36) Haa taʼu malee, dhiheenyatti akka dhufu ibsa. Kitaabni Qulqulluun raajiiwwan armaan gadii dubbateera:
Waraanni, hanqinni nyaataa, golfaanii fi kirkirri lafaa guguddaan “bakka garaa garaatti ni taʼa” jedha.—Maatewos 24:3, 7, 14; Luqaas 21:10, 11; Mulʼata 6:1-8.
Namoonni walumaa galatti garmalee ofittoo taʼu. Fakkeenyaaf, “maallaqa kan jaallatan,” “kan hin galateeffanne,” akkasumas “kan of hin toʼanne” taʼu.—2 Ximotewos 3:1-5.
Namoonni hedduun bara 1914 kaasee haalawwan addunyaa raajii Kitaabni Qulqulluun dubbatuu wajjin akka wal simanii fi dhumni akka dhihaate irratti walii galu. Odeeffannoo dabalataa argachuuf, mata dureewwan “Bara 1914 Ilaalchisee Lakkoofsi Baraa Kitaaba Qulqulluu Maal Ibsa?” akkasumas “Mallattoon “Guyyoota Dhumaa” ykn ‘Dhuma Sirnichaa’ Maali Dha?” jedhan ilaali.
“Apookiliipsiin” akka Kitaaba Qulqulluutti hiika maalii qaba?
Jechi Afaan Giriikiitii “apookiliipsi” jedhuu fi Kitaaba Qulqulluu keessatti argamu “wanta haguugame irraa fuudhuu” ykn “wanta dhokate mulʼisuu” jechuu dha. Yeroo baayʼee jechi kun odeeffannoo dhokate tokko mulʼisuu kan argisiisu dha. Kana malees, Kitaabni Qulqulluun waaʼee ‘mulʼachuu [ykn apookiliipsii] Gooftaa Yesuus,’ jechuunis yeroo inni hammeenya guutummaa lafaa irra jiru hundumaa itti dhabamsiisuu fi namoota Waaqayyoon waaqeffatan badhaasuuf aangoo isaatiin mulʼatu kan argisiisu akka taʼe dubbata.—2 Tasalonqee 1:6, 7; 1 Pheexiros 1:7, 13.
Kitaabni Kitaaba Qulqulluu inni xumuraa wantoota gara fuulduraatti taʼan waan ibsuuf Apookiliipsii ykn Mulʼata jedhama. (Mulʼata 1:1) Kitaabni kun misiraachoo fi ergaa abdii kan qabate dha. (Mulʼata 1:3) Waaqayyo jalʼina haqaa hunda akka balleessuu fi lafa gara jannataatti akka jijjiiru ibsa. Yeroo sanatti, ilmaan namootaa hin dhukkubsatan, hin dhiphatan ykn hin duʼan.—Mulʼata 21:3, 4.
Abdiiwwan dinqisiisoo Kitaaba Qulqulluu keessatti ibsaman kana caalaatti barachuu barbaaddaa? Dhugaa Baatonni Yihowaa kaffaltii malee Kitaaba Qulqulluu si qoʼachiisuu barbaadu. Maarree harʼa maaliif isaan qunnamtu?