Fakkeenya 22:6—“Daaʼima Karaa Inni Irra Deemuu Qabu Barsiisi”

“Daaʼima karaa inni irra deemuu qabu barsiisi; innis yeroo dulloomutti illee isa irraa hin goru.”—Fakkeenya 22:6, Hiika Addunyaa Haaraa.

“Akka itti jiraachuun taʼu mucaa barsiisi! Innis yommuu dulloomu iyyuu irraa hin kaatu.”—Fakkeenya 22:6, Hiika Bara 1997.

Hiika Fakkeenya 22:6

Warri ijoolleen isaanii Waaqayyoon akka jaallatanii fi seera isaa akka kabajan barsiisuudhaan jireenya isaanii gara fuulduraatiif akka isaan gargaaru eeguu dandaʼu.

“Daaʼima karaa inni irra deemuu qabu barsiisi.” Jechi kun “daaʼima tokko karaa sirrii irra deemuu akka jalqabu godhi” jedhamees hiikamuu dandaʼa. Yeroo baayʼee kitaabni Fakkeenyaa warri ijoollee isaanii wanta sirrii fi dogoggora taʼe ilaalchisee xinnummaa isaaniitii eegalee akka barsiisan jajjabeessa. (Fakkeenya 19:18; 22:15; 29:15) Haa taʼu malee, warri akkuma namoota gaʼeessa taʼanii ijoolleen isaaniis mirga filannaa akka qaban ni hubatu. Kanaafuu warri calluma jedhanii wanta ijoolleen isaanii hojjechuu qaban itti himuu mannaa isaaniif ibsuu fi gaʼeessummaa irra akka gaʼan gochuudhaan, gaʼeessota murtoo gaarii gochuufi itti gaafatamummaan itti dhagaʼamu akka ta‵an gargaaruu qabu.—Keessa Deebii 6:6, 7; Qolosaayis 3:21.

Hayyoonni Kitaaba Qulqulluu tokko tokko yaanni kun “daaʼima akka amala isaatti barsiisuu” ykn akkaataa kennaa uumamaan qabuun isa barsiisuu jechuudha jedhu. Ibsi kun dhugaa kan qabu fakkaatus yaanni Afaan Ibrootaa “daaʼima karaa inni irra deemuu qabu” jedhu karaa jireenyaa gaarii fi qajeelaa taʼe kan argisiisudha. Kitaabni Fakkeenyaa namni tokko karaa lama irra deemuu akka dandaʼu ibsa. Inni tokkoffaan “daandii namoota gaggaarii,” “daandii ogummaa” fi “daandii sirrii” jedhama. (Fakkeenya 2:20; 4:11; 23:19) Inni kan biraan immoo “daandii jalʼootaa,” “karaan nama gowwaa” fi “daandii dogoggoraa” jedhamee waamama. (Fakkeenya 4:14; 12:15; 16:29) Daandiin daaʼimni tokko irra “deemuu qabu” “daandii sirrii” jechuunis daandii jireenyaa Kitaabni Qulqulluun inni Dubbii Waaqayyoo taʼe barsiisudha.—Faarfannaa 119:105.

“Innis yeroo dulloomutti illee isa irraa hin goru.” Warri naamusaa Waaqayyo baase daaʼima isaanii yeroo barsiisan jireenya isaa guutuu daandii sirrii irra deemuu itti fufuu dandaʼa. Haa taʼu malee akkana jechuun daaʼimni tokko sirriitti barsiifame illee daandii sirrii ykn seera Waaqayyoo irraa matumaa hin “goru” jechuu miti. Fakkeenyaaf, namni tokko namoota wanta gadhee taʼe akka hojjetan jajjabeessuu wajjin yeroo kan dabarsu taanaan “daandii qajeelaa” dhiisuu fi wanta dogoggora taʼe hojjechuu dandaʼa. (Fakkeenya 2:12-16; 1 Qorontos 15:33) Kun taʼus, warri ijoolleen isaanii qajeelfama Waaqayyoo akka hordofan yeroo barsiisanitti, jireenya isaanii keessatti milkaaʼina guddaa akka argatan gargaaru.—Fakkeenya 2:1, 11.

Yaada naannoo Faarfannaa 22:6​tti argamu

Fakkeenyi boqonnaan 22 gorsa gaggabaabaa haalawwan jireenya keessatti mudatan keessatti ogummaa Waaqayyoo hojiirra oolchuuf nu gargaaran qabateera. Gorsi kun Yihowaaa wajjin walitti dhufeenya gaarii qabaachuun gatii guddaa akkamii akka qabu kan ibsuu fi kunis amala namni tokko gad of qabuu, arjummaa fi jabaatanii hojjechuudhaan argisiisudha. (Fakkeenya 22:1, 4, 9, 29) Karaa biraatiin immoo, caqasoonni kaan warri gorsa Waaqayyoo hin hordofnee fi hiyyeessa hacuucan wanta gadheetu isaan mudata.—Fakkeenya 22:8, 16, 22-27.

Faarfannaa boqonnaan 22 hedduun isaa waaʼee daaʼima barsiisuu kan dubbatu taʼuu baatus, daandii jireenyaa Waaqayyo biratti fudhatama qabuu fi gammachuu dhugaa argamsiisu ni ibsa. (Fakkeenya 22:17-19) Warri daandii jireenyaa kana ijoolleesaanii barsiisuudhaan wanta hundarra caalu akka isaaniif hawwan argisiisuu dandaʼu.—Efesoon 6:1-3.

Viidiyoo qabiyyee kitaaba Fakkeenyaa gabaabsee ibsu kana ilaali.