Gaddakoo Danda’uuf Maaltu Na Gargaara?

MAAYIK, “Miirakoo to’achuuf baay’ee yaaleera” jechuudhaan wanta yeroo abbaansaa du’etti isatti dhaga’ame yaadata. Maayik gadda isatti dhaga’ame to’achuun dhiirummaa isatti fakkaatee ture. Booda garuu akka dogoggore hubateera. Kanaafuu, yeroo akaakayyuun hiriyaasaa du’an maal jedhee akka isa jajjbeessu barateera. Akkas jedha: “Waggoota muraasa dura utuu ta’ee, gatiittiisaa rurrukuteen, ‘Dhiira ta’i!’ isaan jedha ture. Amma garuu harkasaa qabeen, ‘Wanta sitti dhaga’amu kamiyyuu hin dhoksin. Kana gochuun gaddakee mo’uuf si gargaara. Akkan deemu yoo barbaadde nan deema. Akkan si bira turu yoo barbaaddemmoo si bira nan tura. Wanta sitti dhaga’amu garuu dubbachuu hin sodaatin’ nan jedheen.”

Meerii’aanis yeroo abbaan manaashee du’e gadda isheetti dhaga’ame dhoksuuf yaaltee turte. Akkas jetti: “Namoota kaaniif fakkeenya ta’uun qaba jedhee waanan dhiphadhuuf gaddakoo ibsuurraa of qusadheen ture. Yeroo booda garuu, namoota kaaniif jecha akka utubaa jabaadhee dhaabachuuf yaaluunkoo akka na hin gargaarre hubadheera. Haalakoo madaaluudhaan, ‘Yoo boo’uun sirra jiraate boo’i. Baay’ee jabduu fakkaachuuf hin yaalin. Gaddikee siif haa ba’u’ ofiin jechuun jalqabe.”

Maayikis ta’e Meerii’aan, Gadda keessan hin ukkaamsinaa! jechuudhaan gorsa kennuunsaanii sirriidha. Dhugaasaaniiti. Kan akkas jennu maaliifi? Gaddi karaa barbaachisaa miira ofii ittiin ibsan waan ta’eefi. Gaddi keessan akka isiniif ba’u gochuun, dhiphina isinitti dhaga’amu hir’isuu danda’a. Wanta isinitti dhaga’amu akka isinii dhufetti yoo ibsitan, akkasumas hubannaafi odeeffannoo sirrii yoo qabaattan, miira keessan karaa sirrii ta’een ibsuu dandeessu.

Karaan namoonni gaddasaanii itti ibsan akka wal hin fakkaanne beekamaadha. Namni jaallatan sun akka tasaa kan du’e ykn yeroo dheeraaf dhukkubsatee kan du’e ta’uunsaa ykn haalli kan biraan, nama gaddu sanarratti jijjiirama fiduu danda’a. Haata’u malee, gadda keessan ukkaamsuun qaamaafi miira keessan miidhuu akka danda’u haaluun hin danda’amu. Gadda keessan ibsuun fayyaa keessanirratti jijjiirama guddaa fida. Akkamitti? Kana ilaalchisee Caaffanni Qulqullaa’oon gorsa gaarii qabataniiru.

Gadda Ibsuun Kan Danda’amu Akkamitti?

Dubbachuun gadda ibsuuf karaa gaarii ta’uu danda’a. Abbaa amantaa bara durii kan ture Iyoob, ijoolleensaa kurnan erga jalaa du’aniifi balaawwan gaddisiisaan kan biraan erga isarra ga’anii booda akkas jedheera: “Ani jireenya koo nan jibba, of gad dhiisees gadda koo nan dhageessifadha; isa jireenyi koo keessa ba’ee anatti hadhaa’e nan dubbadha.” (Iyoob 1:2, 18, 19; 10:1) Iyoob wanta isatti dhaga’ame ukkaamsuu hin dandeenye. Of gadhiisee ‘dubbachuu’ isa barbaachisee ture. Haaluma wal fakkaatuun, qopheessaa tiyaatirii Ingiliiz kan ture Sheekispiir kitaaba diraamaa Maakbeez jedhamerratti, “Gaddikee akka dubbatu heyyamiif; gaddi hin dubbatamne onnee namaarratti fe’amee isa hurreessa” jedheera.

Miira keessan “michuu” dhugaa obsaafi gara laafinaan isin dhaggeeffatutti dubbachuun keessan, hamma tokko boqonnaa isiniif argamsiisuu danda’a. (Fakkeenya 17:17, hiika bara 1899) Haalawwan nama mudataniifi miira ofii dubbachuun, yeroo baay’ee wantoota kana hubachuufi mo’uuf gargaara. Namni dhaggeeffatu sun gaddi isarra ga’ee kan beekuufi gaddasaa kana haala gaariidhaan kan mo’e taanaan, gorsa gaarii gadda keessan mo’uuf isin gargaaru isinii kennuu danda’a. Haati mucaashee du’aan dhabde tokko dubartii gaddi wal fakkaatu isheerra ga’e haasofsiisuunshee, gaddashee mo’uuf akkamitti akka ishee gargaare yeroo dubbattu, “Dubartiin gaddi akka kootii irra ga’eefi gaddashee mootee jireenyashee itti fufuu dandeesse jiraachuushee beekuunkoo baay’ee na jajjabeesseera” jetteetti.

Wanta isinitti dhaga’amu dubbachuun kan isinitti hin tolle yoo ta’ehoo? Daawit, Saa’oliifi Yonaataan akka du’an yeroo dhaga’e gaddasaa walaloo miira namaa tuquun ibseera. Walaloon inni gaddasaa ibsuuf barreesse kun, yeroo booda kutaa Macaafa Qulqulluu macaafa Saamu’el Isa Lammaffaa ta’eera. (2 Saamu’el 1:17-27; 2 Seenaa 35:25) Haaluma wal fakkaatuun, namoonni tokko tokko yaadasaaniifi miirasaanii barreeffamaan ibsuun isaanitti salphata. Dubartiin abbaan manaa irraa du’e tokko wanta isheetti dhaga’amu hundumaa barreessitee, guyyoota muraasa booda deebistee akka dubbistu ibsiteetti. Kun jajjabaachuuf ishee gargaareera.

Dubbachuudhaanis ta’e barreessuudhaan miira keessan ibsuun gadda keessan irraanfachuuf isin gargaara. Walitti bu’iinsa uumame hiikuufis gargaaruu danda’a. Haati gaddi irra ga’e tokko akkas jetteetti: “Aniifi abbaan manaakoo, hiriyoonni gaa’elaa erga mucaansaanii jalaa du’ee booda wal hiikan akka jiran kan dhageenye ta’us, kun akka nurra ga’u hin barbaanne. Kanaaf, yeroo aarruufi wal komachuu barbaannutti dhimma sanarratti mari’achuudhaan furmaata tokkorra geenya turre. Akkas gochuun keenya caalaatti walitti kan nu dhiheesse natti fakkaata.” Kanaaf, gaddi isinirra ga’e tokko ta’uyyuu wanta isinitti dhaga’ame dubbachuun keessan, haalliifi yeroon namni tokko gaddasaa itti ibsu isa kaanirraa adda ta’uusaa hubachuuf isin gargaaruu danda’a.

Gadda namatti dhaga’ame ibsuuf wanti gargaaru kan biraan boo’uudha. Macaafni Qulqulluun, “Boo’uun yeroo qaba” jedha. (Lallaba 3:1, 4) Michuun keenya tokko yeroo du’u akka boonyu beekamaadha. Imimmaan dhangalaasuun, gadda keenyarraa jajjabaachuuf kan nu gargaarudha.

Shamarreen tokko yeroo haatishee duutetti hiriyaanshee tokko akkamitti akka ishee jajjabeessite ibsiteetti. Akkas jechuudhaan waan yaadattu dubbatti: “Hiriyaankoo narraa addaan baatee hin beektu. Anaa wajjin boossi turte. Na haasofsiisti turte. Miirakoo ifatti baasuu kanan danda’e si’a ta’u, kunis barbaachisaa ture. Boo’uun na hin yeellaasifne.” (Roomaa 12:15 ilaali.) Isinis boo’uun isin yeellaasisuu hin qabu. Akkuma kanaan dura ilaalle, Macaafni Qulqulluun Yesus Kiristosiin dabalatee, fakkeenya dhiirotaafi dubartoota amanamoo ta’aniifi yeelloo tokko malee imimmaan dhangalaasuudhaan gaddasaanii ibsan hedduu qabateera.—Uumama 50:3; 2 Saamu’el 1:11, 12; Yohannis 11:33, 35.

Yeroo muraasaaf miirri keessan hamma tokko jijijjiiramuu danda’a. Utuma isinitti hin beekamin imimmaan keessan ni dhangala’a ta’a. Dubartiin abbaan manaashee irraa du’e tokko galma gabaatii mi’a bituu yeroo adeemtu, (yeroo baay’ee abbaa manaashee wajjin deemti turte) keessumaa nyaatawwan abbaan manaashee jaallatu harkashee bareen yeroo fuutu imimmaanshee to’annaasheetii ala ta’a ture. Akkas isinitti dhaga’amuusaatiif of hin ceepha’inaa. Imimmaan keessan to’achuu akka qabdan isinitti dhaga’amuu hin qabu. Boo’uun uumama namaa akka ta’eefi gadda ofii ibsuuf barbaachisaa ta’uusaa hin dagatinaa.

Komii Namatti Dhaga’amu Danda’uu

Akkuma kanaan dura ibsame, namoonni namni jaallatan yeroo jalaa du’u of komatu. Yaaqoob inni amanamaa ture ilmasaa Yoseef “bineensa hamaatu” isa nyaate jedhee akka amanu yeroo dirqame, baay’ee kan gadde maaliif akka ture hubachuu dandeenya. Yoseef obboloonnisaa nagaa ta’uusaanii akka ilaalu kan isa erge Yaaqoob ture. Kanaaf ‘Yoseefiin maaliifan qofaasaa erge? Bakka bineensoonni baay’atanitti kanan isa erge maaliifi?’ jedhee of ceepha’uu hin oolu.—Uumama 37:33-35.

Namni jaallattan sun kan du’e hamma tokko waan isin dantaa dhabdaniif akka ta’e isinitti dhaga’ama ta’a. Dhugaa ta’us ta’u baatus, komiin karaa sirrii gaddi itti ibsamu keessaa tokko ta’uusaa hubachuun keessan qofti isin gargaaruu danda’a. Yeroo kanattis miira keessan ukkaamsuun barbaachisaa miti. Hangam akka of komattan ibsuun keessan, gadda keessanirraa akka jajjabaattan gochuu danda’a.

Haata’u malee, nama tokko hammamiyyuu kan jaallannu yoo ta’e jireenyasaa to’achuu ykn wanta “yerooniif walittidhufuun” fidurraa isa eeguu akka hin dandeenye hubachuu qabna. (Lallaba 9:11, hiika bara 1899) Kana malees, isa miidhuuf wanti gootan akka hin jirre beekamaadha. Fakkeenyaaf, yeroo dhukkubsate daftanii mana yaalaa kan isa hin geessine akka du’u waan barbaaddaniifii? Matumaa akkas miti! Du’a nama sanaatiif of komachuu qabduuree? Hin qabdan.

Haati tokko intallishee balaa konkolaataatiin erga duutee booda, komii isheetti dhaga’ame akkamitti mo’u akka dandeessu hubatteetti. Akkas jechuudhaan ibsiti: “Kan ishee erge ana waan ta’eef of komadheen ture. Kun garuu gowwummaa akka ture hubadheera. Abbaashee wajjin dhimma tokkoof ishee erguunkoo dogoggora hin qabu ture. Balaa akka tasaa uumamedha.”

‘Garuu wantan dubbachuu ykn gochuu barbaadu baay’een jira ture’ jettanii yaaddu ta’a. Haata’u malee, nu keessaa abbaan ykn haati ykn mucaan tasumaa hin dogoggorre jiraa? Macaafni Qulqulluun, “Nuyi hundumti keenya baay’ee irraa in kaanna; namni dubbii isaatiin irraa hin kaanne nama fiixaan ba’ee dha” jedha. (Yaaqoob 3:2; Roomaa 5:12) Kanaaf cubbuu kan dhaaltan ta’uu keessan amanaa. “Utuun akkas godheera ta’ee” jedhanii sababii tarreessuun, gadda keessanirraa daftanii akka hin jajjabaanne godha malee bu’aa tokkoyyuu hin qabu.

Dhugumaan balleessaa raawwachuu keessaniif sababii ga’aa yoo qabaattan, wanta akka of hin komanne godhu isa guddaa jechuunis dhiifama Waaqayyoo akka argattan yaadadhaa. Macaafni Qulqulluun akkas jechuudhaan nuu mirkaneessa: “Yaa Waaqayyo, utuu ati irra-daddarbaa namatti lakkooftee, silaa eenyutu si dura dhaabata, yaa gooftaa? . . . Cubbuu namaaf dhiisuun si bira jira.” (Faarfannaa 130:3, 4) Duubatti deebi’uus ta’e haala uumame jijjiiruu hin dandeessan. Balleessaa kanaan dura raawwattaniif garuu Waaqayyo dhiifama akka isinii godhu kadhachuu dandeessu. Achiihoo? Waaqayyo balleessaa hojjettan guutummaatti isinii dhiisuuf waadaa erga galee, isinoo ofiif dhiifama gochuu hin qabdanii?—Fakkeenya 28:13; 1 Yohannis 1:9.

Aarii Danda’uu

Kana malees doktoorota, narsoota, michoota ykn nama du’e sanatti aartaniittuu? Kunis miira nama michuusaa du’aan dhabe tokkotti dhaga’amu ta’uusaa hubadhaa. Tarii kan aartan baay’ee waan miidhamtaniif ta’uu danda’a. Barreessaan tokko akkas jedheera: “Tarkaanfii fudhachuudhaan utuu hin ta’in, akka aartan hubachuudhaan qofa balaa aariin keessan isinirraan geessisurraa walaba ta’uu dandeessu.”

Aarii keessan ibsuu ykn nama kan biraatti himuunis isin gargaaruu danda’a. Akkamitti? To’annaa tokko malee iyyuudhaan akka hin taane beekamaadha. Macaafni Qulqulluun aariin yeroo dheeraaf turu balaa akka geessisu akeekkachiisa. (Fakkeenya 14:29, 30) Michuu miira keessan isinii hubachuu danda’utti yoo himattan garuu jajjabaachuu dandeessu. Namoonni tokko tokkommoo yeroo aaran, sochii qaamaa jabaa ta’e gochuun aariisaanii akka isaanirraa galchu hubataniiru.—Efesoon 4:25, 26 dabalataan ilaali.

Miira keessan ifatti dubbachuun gaarii ta’us, of eeggannoo gochuun barbaachisaadha. Miira keessan ibsuufi dheekkamsaan aarii keessan warra kaanitti ba’uun garaagarummaa guddaa qaba. Aaruufi abdii kutachuu keessaniif warra kaan komachuun barbaachisaa miti. Kanaaf wanta isinitti dhaga’amu warra kaanitti himuun sirrii ta’us, aariidhaan ta’uu hin qabu. (Fakkeenya 18:21) Wanti gadda namatti dhaga’amu mo’uuf gargaaru guddaan tokko jira; ittaansinee isarratti mari’anna.

Gargaarsa Waaqayyoo

Macaafni Qulqulluun, “Waaqayyo warra garaan isaanii cabetti dhi’oo dha, warra yaadni isaanii caccabee bullaa’es in fayyisa” jechuudhaan mirkaneessa. (Faarfannaa 34:18) Eeyyee, namni jaallattan tokko yeroo du’u wanta kamiyyuu caalaa kan isin jajjabeessuu danda’u hariiroo Waaqayyoo wajjin qabdanidha. Akkamitti? Yaadawwan hanga ammaatti ibsaman hundi, Macaafa Qulqulluu isa Dubbii Waaqayyoo ta’erratti kan hundaa’an ykn isaa wajjin kan walsimanidha. Hojiirra isaan oolchuun keessan isin gargaaruu danda’a.

Faayidaa kadhannaan qabus salphistanii hin ilaalinaa. Macaafni Qulqulluun, “Wanta yaada sitti ta’u Waaqayyotti gatii dhiisi, inni akka ati hin kufnetti si irkisa” jechuudhaan nu gorsa. (Faarfannaa 55:22) Nama miira keessan isinii hubatu tokkotti dubbachuun keessan isin gargaaruu erga danda’ee, “Waaqayyo jajjabina hundumaaf” wanta garaa keessan keessa jiru dhangalaasuun caalaatti isin hin gargaaruu?—2 Qorontos 1:3.

Kadhannaan qofaasaatti miirri gaariin akka nutti dhaga’amu godha jechuu miti. ‘Inni kadhata namaa dhaga’u,’ tajaajiltootasaa garaadhaa isa kadhataniif hafuura qulqulluu akka kennu waadaa galeera. (Faarfannaa 65:2; Luqaas 11:13) Hafuurri Waaqayyoo ykn humnisaa inni hojiirra jiru, ‘humna humna gararraa’ guyyaa tokkoo gara guyyaa isa kaanitti ce’uuf gargaaru isinii kennuu danda’a. (2 Qorontos 4:7) Waaqayyo tajaajiltootasaa amanamoo, rakkina isaan mudatu kamiyyuu akka mo’an isaan gargaaruu akka danda’u yaadadhaa.

Dubartiin mucaashee du’aan dhabde tokko, isheeniifi abbaan manaashee gaddasaanii danda’uuf kadhannaan akkamitti akka isaan gargaare yaadatti. Akkas jetteetti: “Galgala galgala yeroo mana keenya keessa taanu gaddisaa humnaa ol yommuu nutti ta’u sagalee keenya guddisnee kadhanna turre. Yeroo jalqabaatiif utuu isheen nu duukaa hin jiraatin walga’ii gumiirratti yeroo argamnu, walga’ii koonyaarratti yeroo argamnuufi sochii kamiyyuu yeroo goonu hundatti Waaqayyo humna akka nuu kennu ni kadhanna turre. Ganama ganama kaanee mucaa keenyarraa akka adda baane amanuun yeroo nu rakkisu, Yihowaan akka nu gargaaru ni kadhanna turre. Qofaakoo gara manaatti yeroon deebi’u gadda guddaatu natti dhaga’ama. Kanaaf, qofaakoo gara manaatti yeroon deebi’u hundatti Yihowaan tasgabbii akka naa kennu nan kadhadhan ture.” Dubartiin amanamtuu taate kun kadhannaan guddaa akka ishee gargaare ni amanti; amanuunshees sirriidha. Isinis kadhannaa gochuu keessan yoo itti fuftan, “nagaan Waaqayyoo inni hubannaa namaa hundumaa irra caalus, karaa Kristos Yesus garaa keessanii fi yaada keessan in eega.”—Filiphisiiyus 4:6, 7; Roomaa 12:12.

Gargaarsi Waaqayyo kennu gadda keessanirraa isin jajjabeessuu danda’a. Phaawulos ergamaan, Waaqayyo “rakkina attamii keessatti iyyuu warra kaan akka jajjabeessinuuf, inni rakkina keenya hundumaa keessatti nu in jajjabeessa” jechuudhaan dubbateera. Gargaarsi Waaqayyoo gadda keessan guutummaatti hambisuu baatus, isiniif salphisuu danda’a. Kana jechuun, sana booda hin boossan ykn nama jaallatan sana tasumaa hin yaadattan jechuu utuu hin ta’in, jajjabaachuu dandeessu jechuudha. Yoo jajjabaattanimmoo, namoota akkuma keessan gaddi isaanirra ga’e, rakkinasaanii hubattanii gara laafinaan isaan gargaaruu dandeessu.—2 Qorontos 1:4.