Injifannoowwan Mootummichaa​—Misiraachicha Karaa Seera Qabeessa Taʼeen Labsuu

MANAA gara manaatti utuu tajaajilaa jirtanii poolisoonni gara keessan dhufaa akka jiran fagootti argitan haa jennu. Mana ittaanu deemtanii nama haasofsiisuu akkuma jalqabdaniin obboleessi waliin jirtan poolisoonni gara keessanitti adeemaa waan jiraniif yaannisaa ni hihhirame. Poolisoonni sunis akkuma isin bira gaʼaniin, “Manaa gara manaatti deemtanii Macaafa Qulqulluu lallabaa kan turtan isinii? Odeeffannoon waan nu gaʼeef dhufne!” isiniin jedhan. Isinis karaa ulfina qabuun Dhugaa Baatota Yihowaa taʼuu keessan itti himtan. Sana boodahoo maaltu taʼa laata?

Deebiin gaaffii kanaa haala Dhugaa Baatonni Yihowaa biyyicha keessatti dabarsanirratti kan hundaaʼedha. Biyya keessan keessatti mootummaan Dhugaa Baatota Yihowaatiif ilaalcha akkamii qaba? Mirgi amantii jiraa? Taanaan waggoota hedduu darban keessatti obboloonni ‘misiraachichaaf falmuufi karaa seera qabeessa taʼeen labsuuf’ gumaacha guddaa akka godhan hin shakkisiisu. (Filp. 1:7) Biyya kamiyyuu keessa yoo jiraattan injifannoo Dhugaa Baatonni Yihowaa gama seeraatiin argatan qoruun keessan amantii keessan isiniif cimsa. Kutaa kana keessatti injifannoowwan arganne keessaa muraasasaanii ilaalla. Carraaqqii mataa keenyaatiin injifannoo akkasii argachuu matumaa waan hin dandeenyeef, injifannoon arganne Mootummaan Waaqayyoo dhugumaan bulchaa akka jiru kan nuuf mirkaneessudha.