Хъуыддӕгтӕ
8 Стефаны кӕй амардтой, уый Савл растыл нымадта+.
Уыцы бон райдыдтой Иерусалимы ӕмбырд карзӕй ӕфхӕрын+, ӕмӕ ахуыргӕнинӕгтӕ иууылдӕр Иудейӕ ӕмӕ Самарийыл ныххӕлиу сты+. Ӕрмӕстдӕр ма апостолтӕ баззадысты Иерусалимы. 2 Фӕлӕ, Хуыцауы тас кӕй уыд, уыдон Стефаны бавӕрдтой+ ӕмӕ йыл тынг фӕкуыдтой+. 3 Савл та райдыдта ӕмбырды ныхмӕ ӕгъатырӕй тох кӕнын. Хӕдзӕрттӕм-иу бабырста, нӕлгоймӕгты ӕмӕ-иу сылгоймӕгты ӕддӕмӕ раласта ӕмӕ-иу сӕ ахӕстоны бакодта+.
4 Фӕлӕ, алырдӕмты чи ныххӕлиу, уыдон иу ранӕй иннӕ ранмӕ цыдысты ӕмӕ хъусын кодтой хорз хабар, Хуыцауы ныхас+. 5 Филипп ӕрцыд горӕт Самаримӕ+ ӕмӕ адӕмӕн райдыдта Чырыстийы тыххӕй хъусын кӕнын. 6 Филипп цы дзырдта, уымӕ бирӕ адӕм лӕмбынӕг хъуыстой. Хъуыстой йӕм ӕмӕ, цы диссӕгтӕ арӕзта, уыдонмӕ кастысты. 7 Уым та уыди, дӕлимонтӕ+ кӕй мидӕг уыд, бирӕ ахӕм адӕм, ӕмӕ-иу уыдонӕй дӕлимонтӕ хъӕргӕнгӕ рацыдысты. Стӕй ма, паралич+ кӕй ныццавта, уыдонӕй дӕр ӕмӕ къуылыхтӕй дӕр бирӕтӕ сдзӕбӕх сты. 8 Гъемӕ горӕты цӕрджыты цинӕн кӕрон нал уыди+.
9 Уыцы горӕты уыди иу лӕг, Симон, зӕгъгӕ. Раздӕр уыд кӕлӕнгӕнӕг+ ӕмӕ йӕ кӕлӕнтӕй Самарийы адӕмы дисы ӕфтыдта. Уый йӕхи хуыдта номдзыд адӕймаг+. 10 Ӕмӕ-иу ӕм мӕгуырӕй-хъӕздыгӕй иууылдӕр лӕмбынӕг хъуыстой ӕмӕ дзырдтой: «Ацы лӕгмӕ ис стыр тых Хуыцауӕй». 11 Хъусгӕ та йӕм уымӕн кодтой, ӕмӕ сӕ бирӕ рӕстӕджы дӕргъы йӕ кӕлӕнтӕй дисы ӕфтыдта. 12 Фӕлӕ сын Филипп Хуыцауы паддзахады+ тыххӕй ӕмӕ Йесо Чырыстийы номы тыххӕй хорз хабар куы фехъусын кодта, уӕд ыл баууӕндыдысты ӕмӕ донаргъуыд райстой, нӕлгоймӕгтӕ дӕр ӕмӕ сылгоймӕгтӕ дӕр+. 13 Симон йӕхӕдӕг дӕр сси уырнӕг, ӕмӕ, донаргъуыд куы райста, уӕд ӕдзухдӕр уыди Филиппимӕ+. Ӕмӕ, Филипп цы нысӕнттӕ ӕмӕ цы стыр, хъомысджын хъуыддӕгтӕ арӕзта, уыдон уынгӕйӕ дисӕй мард.
14 Самариӕгтӕ Хуыцауы ныхасыл кӕй баууӕндыдысты+, уый апостолтӕ Иерусалимы куы фехъуыстой, уӕд сӕм Петр ӕмӕ Иоанны арвыстой. 15 Уыдон сӕм ӕрцыдысты ӕмӕ сын скуывтой, цӕмӕй Хуыцауы сыгъдӕг тыхӕй схайджын уыдаиккой+, 16 уымӕн ӕмӕ Хицау Йесойы номыл донаргъуыд райстой, фӕлӕ сӕ иуыл дӕр Хуыцауы сыгъдӕг тых нӕма ӕрцыд+. 17 Гъемӕ-иу сыл Петр ӕмӕ Иоанн сӕ къухтӕ ӕрӕвӕрдтой+, ӕмӕ-иу Хуыцауы сыгъдӕг тыхӕй схайджын сты.
18 Симон уый куы федта, ӕмӕ, апостолтӕ сӕ къухтӕ кӕуыл ӕвӕрынц, уыдон Хуыцауы сыгъдӕг тыхӕй схайджын вӕййынц, уӕд сӕм ӕхцаимӕ бацыд+ 19 ӕмӕ сын загъта: «Мӕнӕн дӕр-ма ахӕм тых раттут, цӕмӕй-иу, мӕ къухтӕ кӕуыл ӕрӕвӕрон, уыдон Хуыцауы сыгъдӕг тыхӕй схайджын уой». 20 Фӕлӕ йын Петр загъта: «Де ’взист демӕ фесӕфӕд – ды Хуыцауы стыр лӕвар ӕхцайӕ балхӕнынмӕ хъавыдтӕ+. 21 Ацы хъуыддаджы дӕуӕн хай нӕй, уымӕн ӕмӕ дӕ зӕрдӕ Хуыцауы раз сыгъдӕг нӕу+. 22 Ӕрфӕсмон кӕн де ’взӕр хъуыддӕгтыл ӕмӕ Йегъовӕйӕн лӕгъстӕ кӕн+, кӕд дын дӕ фыдвӕнд ныххатыр кӕнид, 23 уымӕн ӕмӕ йӕ уынын, дӕ зӕрдӕ маргӕй йедзаг кӕй у+ ӕмӕ фыддзинады цагъар кӕй дӕ»+. 24 Уӕд Симон загъта: «Сымах-ма скувут мӕн тыххӕй+ Йегъовӕмӕ, цӕмӕй, цы загътат, уыдонӕй мыл мацы ’рцӕуа».
25 Петр ӕмӕ Иоанн уым бӕстон куы фӕхъусын кодтой ӕмӕ Йегъовӕйы ныхас куы фӕдзырдтой, уӕд Иерусалиммӕ аздӕхтысты. Ӕмӕ фӕндагыл бирӕ самариаг хъӕуты хорз хабар хъусын кодтой+.
26 Филиппӕн та Йегъовӕйы зӕд+ загъта: «Ацу хуссарырдӕм, Иерусалимӕй Газӕмӕ цы фӕндаг цӕуы, уымӕ». Уыцы фӕндаг цӕуы ӕдзӕрӕг быдырыл. 27 Ӕмӕ Филипп дӕр уырдӕм ацыд. Уыцы рӕстӕг ууылты фӕцӕйцыд иу ефиопаг+ хицау+ – Ефиопийы ус-паддзахы* хӕзнатӕ иууылдӕр кӕй бар уыдысты, уый. Уыцы лӕг ӕрцыд Иерусалиммӕ Хуыцауӕн кувынмӕ+, 28 ӕмӕ ныр фӕстӕмӕ здӕхт ӕмӕ йӕ бӕхуӕрдоны бадгӕйӕ хъӕрӕй каст пехуымпар Исайы чиныг+. 29 Уӕд Хуыцау йӕ сыгъдӕг тыхӕй Филиппӕн загъта+: «Уӕртӕ уыцы бӕхуӕрдон баййаф ӕмӕ йӕ фарсмӕ цу». 30 Филипп базгъордта бӕхуӕрдонмӕ ӕмӕ фехъуыста, уыцы лӕг хъӕрӕй кӕй каст пехуымпар Исайы чиныг. Уӕд ӕй Филипп бафарста: «Цы кӕсыс, уый ӕмбарыс?» 31 Уый йын загъта: «Исчи мын ӕй куы нӕ бамбарын кӕна, уӕд ӕй куыд хъуамӕ ӕмбарон?» Ӕмӕ Филиппӕн ныллӕгъстӕ кодта, зӕгъгӕ-ма бӕхуӕрдонмӕ схиз ӕмӕ мӕ фарсмӕ ӕрбад. 32 Уыцы лӕг Фыстадӕй каст мӕнӕ ацы бынат: «Фыс ӕргӕвдынмӕ куыд фӕкӕнынц, афтӕ йӕ акодтой, ӕмӕ уӕрыкк йе ’лвынӕджы раз куыд сабыр фӕлӕууы, афтӕ уымӕн дӕр йӕ дзыхӕй иу ныхас дӕр не схауд+. 33 Бафхӕрдтой йӕ, раст тӕрхон ын не скодтой+. Йӕ равзӕрды хабӕрттӕ йын бӕстон чи радзурдзӕн? Уый зӕххӕй фесӕфдзӕн»+.
34 Уӕд ефиопаг хицау Филиппӕн загъта: «Дӕ хорзӕхӕй, зӕгъ-ма мын, ацы ран пехуымпар кӕй кой кӕны: йӕхи ӕви ӕндӕр искӕй?» 35 Филипп дӕр дзурын райдыдта+. Фыстадӕй+ уыцы бынатӕй райдайгӕйӕ йын Йесойы тыххӕй хорз хабар ӕмбарын кодта. 36 Уалынмӕ донмӕ бахӕццӕ сты, ӕмӕ ефиопаг хицау загъта: «Мӕнӕ дон! Цы мӕ хъыгдары донаргъуыд райсын?»+ 37* –– 38 Уӕд йӕ бӕхуӕрдон бауромын кодта ӕмӕ дыууӕйӕ дӕр, Филипп ӕмӕ ефиопаг хицау, донмӕ ныххызтысты, ӕмӕ йын Филипп донаргъуыд радта. 39 Куыддӕр донӕй схызтысты, афтӕ Йегъовӕ йӕ сыгъдӕг тыхӕй Филиппы уырдыгӕй акодта+, ӕмӕ йӕ ефиопаг хицау нал федта, уымӕн ӕмӕ дарддӕр цингӕнгӕ цыд йӕ фӕндагыл. 40 Филипп та ацыд Азотмӕ, ӕмӕ ӕппӕт горӕтты дӕр хорз хабар хъусын кодта+, цалынмӕ Кесаримӕ+ нӕ бахӕццӕ, уӕдмӕ.