Йезекил

16 Ӕмӕ мын Йегъовӕ дарддӕр афтӕ загъта: 2 «Адӕймаджы фырт, Иерусалимӕн радзур+ йе ’лгъаг миты тыххӕй+. 3 Зӕгъ: „Афтӕ зӕгъы Дунедарӕг Хуыцау Йегъовӕ Иерусалимӕн: „Ды фӕзындтӕ ӕмӕ райгуырдтӕ ханаайнӕгты зӕххыл+. Дӕ фыд уыди аморей+, дӕ мад та – хеттаг+. 4 Дӕ райгуырды бон, куы райгуырдтӕ+, уӕд дын дӕ бикъ нӕ алыг кодтой, нӕ дӕ ныннадтой, цӕмӕй ссыгъдӕг уыдаис, цӕххӕй дӕ нӕ байсӕрстой ӕмӕ дӕ хӕцъилты нӕ батыхтой. 5 Ничи дын фӕтӕригъӕд кодта, никӕй зӕрдӕ дыл фӕрыст+, цӕмӕй дын уыдӕттӕй исты сарӕзтаид. Фӕлӕ дӕ быдыры аппӕрстой, уымӕн ӕмӕ дӕ дӕ райгуырды бон се сӕфт федтой.

6 Ӕз дӕ рӕзты фӕцӕйцыдтӕн ӕмӕ федтон, кӕй хуыссыс тугӕйдзагӕй, дӕ къӕхтӕ тилыс. Ӕмӕ дӕуӕн, тугӕйдзаг чи уыди, уымӕн, загътон: „Хъуамӕ цӕрай!“+ О, загътон дын, тугӕйдзаг чи уыди, уымӕн: „Хъуамӕ цӕрай!“ 7 Быдыры кӕрдӕг куыд уа, афтӕ дӕ сбирӕ кодтон, нымӕц дӕр дын нӕ уыд. Ӕмӕ ды хъуамӕ сыстыр уыдаис+, суыдаис бӕрзонд ӕмӕ ӕрлӕууыдаис ӕппӕты рӕсугъддӕр аивгӕнӕнты+. Нырма бӕгънӕг ӕмӕ гом куы уыдтӕ, уӕд дыл фӕзынд риутӕ ӕмӕ дын рацыд рӕсугъд дзыккутӕ“.

8 „Ӕз дӕ рӕзты фӕцӕйцыдтӕн, ӕмӕ дӕ куы федтон, уӕд уый уыди дӕ уарзондзинады рӕстӕг+. Уӕд дӕ мӕ дарӕсы фӕдджийӕ ӕрӕмбӕрзтон+, дӕ бӕгънӕг буар дын бахгӕдтон ӕмӕ дын расомы кодтон ӕмӕ демӕ скодтон бадзырд+,– зӕгъы Дунедарӕг Хуыцау Йегъовӕ,– ӕмӕ афтӕмӕй сдӕ мӕн+. 9 Ӕз дӕ ныннадтон+, дӕ тугтӕ дын ӕрӕхсадтон ӕмӕ дӕ сойӕ байсӕрстон+. 10 Ӕмӕ дын дӕ уӕлӕ скодтон нывӕфтыд дарӕс+, дӕ къӕхтыл дын скодтон фӕлмӕн сӕракӕй* хуыд дзабыртӕ+, дӕ сӕрыл дын ӕрбатыхтон ӕппӕты хуыздӕр кӕттаг+ ӕмӕ дӕ ӕрӕмбӕрзтон зынаргъ хъуымацӕй. 11 Скодтон дыл аивгӕнӕнтӕ, дӕ къухтыл дын бакодтон цонгдарӕнтӕ+, дӕ хъуырыл – фӕрдгуытӕ+. 12 Дӕ фындзыл дын бакодтон фындзылдаргӕ цӕг+, дӕ хъустыл – хъусцӕджытӕ+ ӕмӕ дын дӕ сӕрыл ӕркодтон рӕсугъд кадыхуд+. 13 Ды дӕхи рӕсугъд кодтай сызгъӕринтӕ ӕмӕ ӕвзистӕй, дӕ уӕлӕдарӕс уыди ӕппӕты хуыздӕр кӕттагӕй, зынаргъ хъуымацӕй ӕмӕ уыди нывӕфтыд+. Ды хордтай ӕппӕты хуыздӕр ссад, мыд ӕмӕ сой+. Ӕмӕ сдӕ тынг рӕсугъд ӕмӕ сдӕ уый аккаг, цӕмӕй ӕрбадтаис паддзахбадӕныл“»+.

14 «„Ӕмӕ адӕмты ’хсӕн айхъуыст дӕ рӕсугъддзинады кой, уымӕн ӕмӕ йӕм фау ӕрхӕссӕн нӕ уыд, ӕз дӕ кӕмӕй схайджын кодтон, уыцы кады тыххӕй“+,– зӕгъы Дунедарӕг Хуыцау Йегъовӕ».

15 «„Фӕлӕ ды дӕ рӕсугъддзинады тыххӕй дӕхиуыл фервӕссыдтӕ+ ӕмӕ, хъуыстгонд кӕй уыдтӕ, уымӕ гӕсгӕ хӕтын райдыдтай+ ӕмӕ, дӕ рӕзты чи цыди, уыдонӕй алкӕимӕ дӕр хӕтыдтӕ+ – дӕ рӕсугъддзинад-иу уый баци. 16 Дӕ дзаумӕттӕй-иу райстай ӕмӕ-иу дӕхицӕн скодтай кувӕн бынӕттӕ+, сӕ хуызтӕ алыхуызон кӕмӕн уыдысты, ахӕмтӕ, ӕмӕ уым хӕтыдтӕ+. Фӕлӕ ахӕм хъуыддӕгтӕн хъуамӕ сӕ кой дӕр ма уа, ахӕмӕй хъуамӕ макуы мацы ’рцӕуа. 17 Ды-иу райстай дӕ рӕсугъд аивгӕнӕнтӕ, мӕ сызгъӕринӕй ӕмӕ ме ’взистӕй конд чи уыд, ӕз дын кӕй радтон+, уыдон, ӕмӕ-иу дӕхицӕн скодтай нӕлгоймаджы нывтӕ+ ӕмӕ семӕ хӕтыдтӕ+. 18 Дӕ нывӕфтыд уӕлӕдарӕс-иу райстай ӕмӕ-иу сӕ уымӕй ӕрӕмбӕрзтай. Сӕ разы-иу сын ӕрӕвӕрдтай мӕ сой ӕмӕ мӕ буд+. 19 Ӕз дын кӕй лӕвӕрдтон, уыцы хӕринаг – кӕй дын хӕрын кодтон+, уыцы сой, мыд ӕмӕ ӕппӕты хуыздӕр ссад – уый-иу сын сӕ разы ӕрӕвӕрдтай, цӕмӕй сын йӕ тӕф ӕхсызгон уыдаид+, ӕмӕ афтӕ уыди ӕдзухдӕр“,– зӕгъы Дунедарӕг Хуыцау Йегъовӕ».

20 «„Ды-иу райстай дӕ фыртты ӕмӕ дӕ чызджыты, кӕй мын ныййардтай, уыдоны+, ӕмӕ сӕ уыдонӕн нывондӕн хастай+. Ау, кӕй хӕтыс, уый дын фаг нӕу? 21 Ды мын мӕ фыртты мардтай+, арты сӕ сыгътай* ӕмӕ сӕ афтӕмӕй уыдонӕн лӕвӕрдтай+. 22 Ӕмӕ ӕппӕт уыцы ӕлгъаг митӕ куы кодтай ӕмӕ куы хӕтыдтӕ, уӕд дӕ зӕрдыл не ’рлӕууыдысты де ’рыгон бонтӕ, бӕгънӕг ӕмӕ гом куы уыдтӕ, уыцы бонтӕ. Уӕд хуыссыдтӕ тугӕйдзагӕй ӕмӕ дӕ къӕхтӕ тылдтай+. 23 Ӕмӕ та-иу де ’ппӕт ӕвзӕрдзинӕдты фӕстӕ („Додой дӕ къона, додой“+,– зӕгъы Дунедарӕг Хуыцау Йегъовӕ) 24 ды дӕхицӕн ныккалдтай обау, горӕты алы фӕзы-иу скодтай кувӕн бынат+. 25 Алы фӕндагӕн дӕр-иу йӕ райдианы скодтай кувӕн бынат+, ӕмӕ дӕ рӕсугъддзинад ӕгад кодтай+. Дӕ рӕзты чи цыди, уыдонӕй алкӕмӕн дӕр дӕхи лӕвӕрдтай+ ӕмӕ дӕ хӕлд митӕ фылдӕрӕй-фылдӕр кодтай+. 26 Ды хӕтыдтӕ Египеты фырттимӕ+, сӕ буары ӕрра монцтӕ кӕмӕн судзынц, уыцы сыхӕгтимӕ+. Ӕмӕ ноджы фылдӕр хӕтыдтӕ, цӕмӕй мӕ ӕфхӕрай. 27 Уый тыххӕй дӕм ӕз мӕ къух сисдзынӕн+, дӕ хӕринаджы хай дын фӕкъаддӕр кӕндзынӕн+ ӕмӕ дӕ ратдзынӕн, йе сӕфт дӕ чи уыны, уыцы сылгоймӕгты къухтӕм+, филистимаг чызджыты+ къухтӕм, цӕмӕй дын, цы сӕ фӕнды, уый бакӕной+,– уыцы сылгоймӕгтӕ фефсӕрмы сты дӕ хӕлд митӕй+.

28 Ды хӕтыдтӕ Ассирийы фырттимӕ, уымӕн ӕмӕ дын бафсис нӕ уыди+. Семӕ хӕтыдтӕ, фӕлӕ дын уӕддӕр фаг нӕ уыди. 29 Ӕмӕ хӕтын райдыдтай суанг Ханааны зӕххыл+ дӕр ӕмӕ халдейтимӕ+ дӕр, фӕлӕ дын уый дӕр фаг нӕ уыди. 30 Ахӕм митӕ кӕй кӕныс, налат+ хӕтаг сылгоймаджы+ куыст кӕй кӕныс, уый тыххӕй дӕм мӕ маст куыд тынг судзы+, уый куы зонис! – зӕгъы Дунедарӕг Хуыцау Йегъовӕ.– 31 Алы фӕндагӕн дӕр-иу йӕ райдианы обау куы ныккалдтай ӕмӕ-иу горӕты алы фӕзы дӕхицӕн кувӕн бынат куы скодтай, уӕддӕр-иу хӕтаг сылгоймаджы хуызӕн нӕ уыдтӕ, уымӕн ӕмӕ дӕу мызд нӕ хъуыди. 32 Йӕ лӕгыл гадзрахатӕй чи рацӕуы, уыцы ус йӕ лӕджы бӕсты йӕхимӕ бауадзы ӕндӕрты+. 33 Алы хӕтаг сылгоймагӕн дӕр фӕдӕттынц лӕвӕрттӕ+. Фӕлӕ ды та дӕхӕдӕг кӕныс лӕвӕрттӕ де ’ппӕт уарзӕттӕн+, дӕттыс сын гӕртӕмттӕ, цӕмӕй дӕм алы рӕттӕй цӕуой+ ӕмӕ демӕ хӕтой. 34 Дӕуӕн дӕ хабар иннӕ хӕтаг сылгоймӕгты хабары хуызӕн нӕу. Ды куыд кӕныс, иннӕ хӕтаг сылгоймӕгтӕй афтӕ ничи кӕны – ды дӕхӕдӕг дӕттыс мызд, дӕуӕн та мызд ничи дӕтты. Афтӕмӕй дӕ хабар уайы бынтон иннӕрдӕм“.

35 Уӕдӕ, мӕнӕ хӕтаг сылгоймаг+, байхъус Йегъовӕйы ныхасмӕ+. 36 Афтӕ зӕгъы Дунедарӕг Хуыцау Йегъовӕ: „Дӕ буары ӕрра монцты фӕдыл кӕй цӕуыс+, де ’фсӕрмыйаг уӕнгтӕ кӕй ныггом кӕныс+ ӕмӕ дӕ уарзӕттимӕ+ ӕмӕ де ’лгъаг фаджыс-хуыцӕуттимӕ кӕй хӕтыс+ ӕмӕ ма сын дӕ фыртты дӕр кӕй дӕттыс ӕмӕ сын сӕ туг кӕй калыс+, 37 уый тыххӕй ӕз ӕрӕмбырд кӕндзынӕн де ’ппӕт уарзӕтты, кӕй рӕвдыдтай, уыдоны, стӕй, кӕй уарзтай, уыдоны дӕр ӕмӕ, де сӕфт кӕмӕй уыдтай, уыдоны дӕр. Алы рӕттӕй сӕ ӕрӕмбырд кӕндзынӕн, дӕ ныхмӕ сӕ ракӕндзынӕн ӕмӕ дын де ’фсӕрмыйаг уӕнгтӕ сӕ разы ныггом кӕндзынӕн, ӕмӕ дын де ’фсӕрмыйаг уӕнгтӕ иууылдӕр фендзысты+.

38 Ӕз дын тӕрхон кӕндзынӕн, йӕ лӕгыл гадзрахатӕй чи рацыд+, стӕй, туг+ чи калы, уыцы сылгоймӕгтӕн цы тӕрхонӕй тӕрхон кӕнынц, ахӕм тӕрхонӕй. Ӕз дыл сӕххӕст кӕндзынӕн мӕ карз тӕрхон, ныккалдзынӕн дыл мӕ фыдӕх ӕмӕ мӕ маст+. 39 Ӕмӕ дӕ сӕ къухмӕ ратдзынӕн, ӕмӕ дын уыдон дӕ обау зӕххӕмвӕз скӕндзысты+, дӕ кувӕн бынӕттӕ дын ныппырх кӕндзысты+, дӕ уӕлӕдарӕс дын ӕррӕдувдзысты+, дӕ рӕсугъд аивгӕнӕнтӕ дын байсдзысты+ ӕмӕ дӕ ныууадздзысты бӕгънӕг ӕмӕ гомӕй. 40 Стӕй дын дӕ ныхмӕ адӕмы ӕрӕмбырд кӕндзысты+, дуртӕй дӕ фӕхойдзысты+ ӕмӕ дӕ сӕ хъаматӕй ныххуынчъытӕ кӕндзысты+. 41 Дӕ хӕдзӕрттыл дын арт бафтаудзысты+ ӕмӕ дыл бирӕ сылгоймӕгты цӕстыты раз мӕ тӕрхӕттӕ сӕххӕст кӕндзысты+. Ӕз афтӕ бакӕндзынӕн, ӕмӕ нал уыдзынӕ хӕтаг сылгоймаг+ ӕмӕ мызд дӕр никӕмӕнуал дӕтдзынӕ. 42 Ӕмӕ дӕм уӕд мӕ фыдӕх нал судздзӕн+, нал дӕм мӕсты кӕндзынӕн+. Ӕз лӕудзынӕн ӕнцад ӕмӕ ӕфхӕрды бынаты нал уыдзынӕн“.

43 „Де ’рыгон бонтӕ дӕ кӕй ферох сты+ ӕмӕ мын ӕппӕт уыцы хъуыддӕгтӕй кӕй маст кодтай+, уый тыххӕй дын ӕз дӕ хъуыддӕгтӕ дӕхи сӕрӕн баййафын кӕндзынӕн+,– зӕгъы Дунедарӕг Хуыцау Йегъовӕ,– ӕмӕ нал кӕндзынӕ де ’ппӕт ӕлгъаг хъуыддӕгтӕ ӕмӕ дӕ хӕлд митӕ.

44 Дӕу тыххӕй ӕмбисонд чи хӕсса+, уый хӕсдзӕн ахӕм ӕмбисонд: „Мад цы у, чызг дӕр уый!“+ 45 Ды дӕ дӕ мады чызг+, йӕ лӕгӕй+ ӕмӕ йӕ фырттӕй йе сӕфт чи уыдта, уый чызг. Ды дӕ хотӕн дӕ сӕ хо, сӕ лӕгтӕй ӕмӕ сӕ фырттӕй се сӕфт чи уыдта, уыдоны хо. Сымахӕн уӕ мад уыди хеттаг+, уӕ фыд та – аморей“»+.

46 «„Дӕ хистӕр хо у Самари+ йӕ дӕлбар горӕттимӕ+, цӕры дӕ галиу фарс. Дӕ кӕстӕр хо та, дӕ рахиз фарс чи цӕры, уый – Содом+ йӕ дӕлбар горӕттимӕ+. 47 Ды айдагъ сӕ фӕндӕгтыл нӕ цыдтӕ, стӕй айдагъ уыдоны ӕлгъаг митӕ нӕ бафӕзмыдтай+, фӕлӕ бирӕ нӕ рацыд, афтӕ уыдонӕй фӕфыддӕр дӕ, де ’ппӕт фӕндӕгтыл уыдонӕй фыддӕр хъуыддӕгтӕ кодтай+. 48 Ӕз, удӕгас Хуыцау, сомы кӕнын мӕхицӕй,– зӕгъы Дунедарӕг Хуыцау Йегъовӕ,– дӕ хо Содом ӕмӕ йӕ дӕлбар горӕттӕ ахӕм митӕ нӕ кодтой, ды ӕмӕ дӕ дӕлбар горӕттӕ цы митӕ кодтат+. 49 Дӕ хо Содомӕн йӕ тӕригъӕд уый мидӕг уыд, ӕмӕ йӕхӕдӕг дӕр ӕмӕ йӕ дӕлбар горӕттӕ+ дӕр уыдысты сӕрбӕрзонд+, къӕбӕрцух никуы ӕййӕфтой+ ӕмӕ, сабыр цард кӕй кодтой+, уый тыххӕй уыдысты ӕнӕмӕт, ӕмӕ ӕфхӕрд адӕймаджы+ ӕмӕ мӕгуыр адӕймаджы къух та уый никуы бафидар кодта+. 50 Куыд хъал уыдысты, афтӕ хъалӕй баззадысты+ ӕмӕ мӕ разы дарддӕр кодтой ӕлгъаг митӕ+. Ӕмӕ сӕ ӕз дӕр ӕппынфӕстаг фесӕфтон, уымӕн ӕмӕ уый раст уыди мӕ цӕсты+.

51 Самарийы+ тӕригъӕдтӕ дӕ тӕригъӕдтӕн се ’мбис дӕр нӕ уыдысты. Де ’лгъаг митӕ уыдоны ӕлгъаг митӕй фӕфылдӕр сты. Ӕмӕ, цы ’лгъаг митӕ кодтай, уыдоны тыххӕй дӕ хоты схонӕн уыди рӕстгӕнджытӕ+. 52 Ӕмӕ дӕ дӕ хоты раст кӕнын куы бахъӕуа, уӕд ды хӕсдзынӕ ӕгады ном. Дӕ тӕригъӕдтӕ уыдоны тӕригъӕдтӕй ӕлгъагдӕр кӕй уыдысты, уымӕ гӕсгӕ уыдон дӕуӕй растдӕр сты+. Уӕдӕ дӕм худинаг кӕсӕд ӕмӕ хӕсс ӕгады ном, уымӕн ӕмӕ дӕ хоты схонӕн ис рӕстгӕнджытӕ“.

53 „Ӕз ӕрӕмбырд кӕндзынӕн, сӕ адӕмӕй уацары чи ис, уыдоны+ – Содом ӕмӕ йӕ дӕлбар горӕттӕй уацары чи ис, уыдоны, ӕмӕ, Самари ӕмӕ йӕ дӕлбар горӕттӕй уацары чи ис, уыдоны. Стӕй ӕрӕмбырд кӕндзынӕн, дӕ адӕмӕй семӕ уацары чи ис, уыдоны дӕр+, 54 цӕмӕй хӕссай ӕгады ном+. Ӕмӕ-иу уыдонӕн сӕ зӕрдӕтӕ кӕмӕй ӕрсабыр кодтай, ӕппӕт уыцы хъуыддӕгты тыххӕй дӕхимӕ ӕгад кӕсдзынӕ+. 55 Дӕ хо Содом ӕмӕ йӕ дӕлбар горӕттӕ, раздӕр куыд уыдысты, фӕстӕмӕ афтӕ суыдзысты, ӕмӕ дӕ хо Самари дӕр ӕмӕ йӕ дӕлбар горӕттӕ, раздӕр куыд уыдысты, афтӕ суыдзысты. Ӕмӕ ды дӕр ӕмӕ дӕ дӕлбар горӕттӕ суыдзыстут, раздӕр куыд уыдыстут, афтӕ+. 56 Сӕрбӕрзонд куы уыдтӕ, уыцы бон дӕ хо Содомы уый аккаг не скодтай, цӕмӕй дӕ дзыхӕй йӕ кой ссыдаид+, 57 цалынмӕ дӕхи ӕвзӕрдзинӕдтӕ нӕ раргом сты+, уӕдмӕ – афтӕ уыди, Сирийы чызджытӕ+, йӕ алыварс чи ис, уыдон ӕмӕ дӕ филистимӕгты чызджытӕ+ куы ’фхӕрдтой, алырдыгӕй дӕ куы хынджылӕг кодтой, уӕд дӕр+. 58 Дӕ хӕлд митӕ+ ӕмӕ де ’лгъаг хъуыддӕгтӕ уыдзысты дӕхиуыл“+,– зӕгъы Йегъовӕ».

59 «Афтӕ зӕгъы Дунедарӕг Хуыцау Йегъовӕ: „Ӕз дын дӕхи ми бакӕндзынӕн+, уымӕн ӕмӕ мын ды мӕ бадзырд фехӕлдтай+ ӕмӕ мын мӕ сомы ницӕмӕ ӕрдардтай. 60 Ӕмӕ ӕз ӕрхъуыды кӕндзынӕн, демӕ де ’рыгон бонты кӕй скодтон, уыцы бадзырд+, ӕмӕ демӕ сфидар кӕндзынӕн ӕнусон бадзырд+. 61 Дӕ зӕрдыл ӕрлӕудзысты дӕ фӕндӕгтӕ+ ӕмӕ дӕхимӕ ӕркӕсдзынӕ ӕгад, дӕ хоты – дӕ хистӕрты дӕр ӕмӕ дӕ кӕстӕрты дӕр – куы суазӕг кӕнай, уӕд. Ӕмӕ дын сӕ ратдзынӕн, цӕмӕй уой дӕ чызджытӕ+, фӕлӕ уый, демӕ конд чи уыди, уыцы бадзырдмӕ гӕсгӕ нӕ уыдзӕн“+.

62 „Ӕз демӕ сфидар кӕндзынӕн бадзырд+, ӕмӕ йӕ базондзынӕ, ӕз кӕй дӕн Йегъовӕ, 63 цӕмӕй дӕ де ’ппӕт хъуыддӕгтӕй куы ссыгъдӕг кӕнон+, уӕд дӕ зӕрдыл лӕууа, цытӕ арӕзтой, уый, худинаг дӕм кӕса+ ӕмӕ дӕ ӕгады уавӕры тыххӕй дӕ бон дӕ дзых схӕлиу кӕнын дӕр ма уа“+,– зӕгъы Дунедарӕг Хуыцау Йегъовӕ».