Хъуыддӕгтӕ

20 Адӕм куы ’рсабыр сты, уӕд Павел ахуыргӕнинӕгтӕм фӕдзырдта ӕмӕ сӕ бафидар кодта, стӕй сын хӕрзбон загъта+ ӕмӕ араст Македонимӕ+. 2 Уыцы рӕтты цӕугӕйӕ Павел ахуыргӕнинӕгты бирӕ хорз ныхӕстӕй фидар кодта+. Ӕмӕ уый фӕстӕ ацыди Грецимӕ. 3 Уым фӕци ӕртӕ мӕйы. Уырдыгӕй хъавыд Сиримӕ науыл ацӕуынмӕ, фӕлӕ, дзуттӕгтӕ йӕ ныхмӕ сусӕгвӕнд кӕй скодтой+, уымӕ гӕсгӕ аскъуыддзаг кодта Македонийыл аздӕхын. 4 Йемӕ рацыдысты вериаг Пирры фырт Сосипатр+, фессалоникӕгтӕй – Аристарх+ ӕмӕ Секунд, дервиаг Гай, Тимофей+, стӕй уӕд Азийы бӕстӕйӕ Тихик+ ӕмӕ Трофим+. 5 Уыдон ацыдысты нӕ разӕй ӕмӕ нӕм Троадӕйы+ ӕнхъӕлмӕ кастысты. 6 Мах та Донгонд дзулты бӕрӕгбоны+ фӕстӕ Филипптӕй науыл рацыдыстӕм ӕмӕ сӕм Троадӕмӕ+ фондз бонмӕ ныххӕццӕ стӕм. Уым фестӕм авд боны.

7 Къуырийы фыццаг бон*+, къӕбӕр бахӕрынмӕ куы ӕрӕмбырд стӕм, уӕд, Павел ныхасы рацыд, уымӕн ӕмӕ дыккаг бон цӕуинаг уыд. Гъемӕ суанг ӕмбисӕхсӕвмӕ фӕдзырдта. 8 Кӕм ӕрӕмбырд стӕм, уыцы уӕллаг уаты+ сыгъди бирӕ цырӕгътӕ. 9 Рудзынгыл бадт иу лӕппу, Евтих, зӕгъгӕ. Павел ма ныхас кодта, афтӕ Евтихыл хуыссӕг фӕтых, тарф фынӕй баци ӕмӕ ӕртыккаг уӕладзыгӕй рахауд ӕмӕ амард. 10 Уӕд Павел дӕлӕмӕ ӕрхызт, ныддӕлгоммӕ йыл ис+, йӕ хъӕбысы йӕ ӕрбакодта ӕмӕ загъта: «Ӕрсабыр ут, ӕгас у*»+. 11 Уый фӕстӕ Павел уӕлӕмӕ схызт, дзул ӕрсаста ӕмӕ хӕрын райдыдта. Ӕмӕ ма семӕ бирӕ фӕныхас кодта, суанг боныцъӕхтӕм. Стӕй йӕ фӕндагыл араст. 12 Лӕппуйы дӕр фӕстӕмӕ ӕрбакодтой ӕмӕ тынг фӕцин кодтой, удӕгас кӕй у, ууыл.

13 Мах ацыдыстӕм, науыл сбадтыстӕм ӕмӕ араст стӕм Ассмӕ – уым хъуамӕ Павелы дӕр немӕ науыл сбадын кодтаиккам, куыд нын бафӕдзӕхста, афтӕ, уымӕн ӕмӕ йӕхӕдӕг фистӕгӕй цӕуинаг уыди. 14 Ӕмӕ Ассы немӕ куы баиу, уӕд ӕй науыл сбадын кодтам ӕмӕ араст стӕм Митиленӕмӕ. 15 Иннӕ бон уырдыгӕй рацыдыстӕм ӕмӕ ӕрлӕууыдыстӕм сакъадах Хиосы раз. Дыккаг бон бахӕццӕ стӕм Самосмӕ, иннӕ бон та ӕрцыдыстӕм Милетмӕ, 16 уымӕн ӕмӕ Павел аскъуыддзаг кодта, Ефесмӕ+ кӕй нӕ бацӕудзӕн, цӕмӕй Азийы ма бафӕстиат уыдаид – Иерусалиммӕ+ тагъд кодта, гӕнӕн ӕмӕ амалӕй Фӕндзайӕм бонмӕ уым куыд уыдаид.

17 Фӕлӕ Милетӕй Ефесмӕ ӕмбырды хистӕр нӕлгоймӕгтӕм+ арвыста, ӕнхъӕлмӕ уӕм кӕсын, зӕгъгӕ. 18 Куы йӕм ӕрцыдысты, уӕд сын загъта: «Сымах ӕй зонут, Азимӕ+ цы бон ӕрцыдтӕн, уӕдӕй фӕстӕмӕ уе ’хсӕн куыд цардтӕн, уый+. 19 Хуыцауӕн* цагъарау+ лӕггад кодтон тынг сӕрныллӕгӕй+ ӕмӕ цӕссыгкалгӕйӕ, стӕй-иу дзуттӕгты фыдвӕндты+ тыххӕй фыдӕвзарӕнты бахаудтӕн. 20 Ӕз хъусӕй нӕ лӕууыдтӕн – пайда уын цы уыди, уый уын дзырдтон ӕмӕ уӕ ахуыр кодтон+ адӕмы раз дӕр ӕмӕ хӕдзарӕй-хӕдзармӕ дӕр+. 21 Дзуттӕгтӕн дӕр ӕмӕ грекъӕгтӕн дӕр бӕстон ӕмбарын кодтон*+, кӕй хъуамӕ ӕрфӕсмон кӕной+, Хуыцаумӕ кӕй хъуамӕ раздӕхой ӕмӕ нӕ Хицау Йесойыл кӕй хъуамӕ баууӕндой. 22 Ныр мӕ Хуыцауы сыгъдӕг тых+ кӕны Иерусалиммӕ, фӕлӕ мӕм уым цы ’нхъӕлмӕ кӕсы, уый нӕ зонын. 23 Зонын ӕрмӕстдӕр уый, ӕмӕ мын алы горӕты дӕр Хуыцауы сыгъдӕг тых+ фӕзӕгъы, ахӕстон ӕмӕ мӕм зындзинӕдтӕ кӕй ӕнхъӕлмӕ кӕсы+. 24 Фӕлӕ мӕм мӕ цард* нымады дӕр нӕу+, ӕрмӕстдӕр мӕ фӕнды мӕ фӕндагыл кӕронмӕ азгъорын+ ӕмӕ мын Хицау Йесо цы бахӕс кодта+, уый сӕххӕст кӕнын+ – Хуыцауы стыр хорзӕхы тыххӕй хорз хабар адӕмӕн бӕстон хъусын кӕнын+.

25 Ӕмӕ йӕ ныр зонын: сымахӕй, Хуыцауы паддзахады тыххӕй кӕмӕн хъусын кодтон, уыдонӕй мӕ ничиуал фендзӕн. 26 Ӕмӕ мын абон сымах ут ӕвдисӕнтӕ, ӕз ӕппӕт адӕмы тугӕй+ дӕр сыгъдӕг кӕй дӕн, 27 уымӕн ӕмӕ ӕз хъусӕй нӕ лӕууыдтӕн – хъусын уын кодтон, Хуыцауы фӕндмӕ+ цыдӕриддӕр хауы, уый. 28 Уӕдӕ лӕмбынӕг кӕсут+ уӕхимӕ+ дӕр ӕмӕ ӕнӕхъӕн дзугмӕ+ дӕр. Уыцы дзугӕн уӕ Хуыцауы сыгъдӕг тых сӕвӕрдта фыййӕуттӕй*+, цӕмӕй хизат Хуыцауы дзуг*+, йӕ Фырты тугӕй+ кӕй балхӕдта, уыцы дзуг. 29 Ӕз зонын, мӕ ацыды фӕстӕ уӕм кӕй бацӕудзӕн, дзугыл чи нӕ ауӕрддзӕн, ахӕм тугдзых бирӕгътӕ+. 30 Уӕхи ’хсӕн дӕр фӕзындзӕн, рӕстдзинад чи зыгъуыммӕ кӕндзӕн+, ахӕм адӕймӕгтӕ, цӕмӕй ахуыргӕнинӕгты сӕ фӕдыл акӕной+.

31 Уӕдӕ къӕрцхъус ут ӕмӕ ма рох кӕнут, ӕртӕ азы+ дӕргъы уӕ ӕз алкӕй дӕр ӕхсӕвӕй-бонӕй мӕ цӕссыг калгӕйӕ ӕдзух раст зондыл кӕй арӕзтон+. 32 Ныр уӕ фӕдзӕхсын Хуыцауыл+ ӕмӕ, йе стыр хорзӕхы тыххӕй чи дзуры, уыцы ныхасыл – уыцы ныхасы фӕрцы бафидар уыдзыстут+ ӕмӕ ӕппӕт сыгъдӕджытимӕ иумӕ бынтӕ райсдзыстут+. 33 Ӕз никуы бабӕллыдтӕн нӕдӕр искӕй ӕвзистмӕ, нӕдӕр йӕ сызгъӕринмӕ, нӕдӕр йӕ дарӕсмӕ+. 34 Уӕхӕдӕг ӕй зонут, мӕхи тыххӕй ӕмӕ, мемӕ чи уыди, уыдоны тыххӕй мӕнӕ ацы къухтӕй кӕй куыстон+. 35 Ӕз уын алцӕмӕй дӕр равдыстон, афтӕ кусгӕйӕ+ лӕмӕгътӕн кӕй хъуамӕ ӕххуыс кӕнат+. Ӕмӕ хъуамӕ уӕ зӕрдыл дарат Хицау Йесойы ныхӕстӕ, уымӕн ӕмӕ уый йӕхӕдӕг загъта: «Райсынӕй раттын+ амондджындӕр хъуыддаг у».

36 Уыцы ныхӕсты фӕстӕ иннӕтимӕ иумӕ йӕ зонгуытыл+ ӕрлӕууыд ӕмӕ скуывта. 37 Ӕмӕ иууылдӕр тынг ныккуыдтой ӕмӕ Павелӕн хъӕбыстӕ+ ӕмӕ пъатӕ кодтой+, 38 уымӕн ӕмӕ сын афтӕ кӕй загъта, нал мӕ фендзыстут+, зӕгъгӕ, уый сын уӕлдай зын уыд. Стӕй йӕ науы онг ахизын кодтой+.