Иов

38 Уӕд Йегъовӕ Иовмӕ тыхдымгӕйы+ астӕуӕй дзурын райдыдта ӕмӕ йын загъта:

 2 «Уый мын чи зыгъуыммӕ кӕны мӕ фӕнд

Ӕнӕмбаргӕ ныхӕстӕй?+

 3 Тыхджын лӕгау-ма дӕ астӕу ӕрбалвас,

Ӕз дӕ фӕрсдзынӕн, ды та мын дзуапп дӕтт+.

 4 Зӕххӕн бындур куы ӕвӕрдтон, уӕд кӕм уыдтӕ?+

Зӕгъ мын ӕй, кӕд ӕй зоныс, уӕд.

 5 Цӕйас хъуамӕ уыдаид, уый чи сбӕрӕг кодта? Зоныс ӕй?

Кӕнӕ йыл барӕн бӕндӕн чи айвӕзта?

 6 Йӕ бындуртӕ цӕуыл фидаргонд сты+

Ӕмӕ йын йӕ фисыны дур чи сӕвӕрдта,

 7 Сӕууон стъалытӕ+ иумӕ фырцинӕй куы зарыдысты,

Хуыцауы фырттӕ+ иууылдӕр фырцинӕй куы хъӕр кодтой, уӕд?

 8 Денджызӕн йӕ фӕндагыл дуӕрттӕ чи сӕвӕрдта?+

Уый ӕддӕмӕ бырста, сывӕллон мады хуылфӕй ӕддӕмӕ куыд бырса, афтӕ.

 9 Ӕз ыл мигътӕ скодтон,

Саудалынджы йӕ батыхтон.

10 Закъӕттӕ йын сфидар кодтон,

Дуарӕхгӕнӕн ын скодтон ӕмӕ йын дуӕрттӕ сӕвӕрдтон+

11 Ӕмӕ йын загътон: „Айонг дӕ бон у ӕрбацӕуын, фӕлӕ амӕй дарддӕр нӕ+.

Ам ис арӕн дӕ хъал уылӕнтӕн“+.

12 Цӕрӕнбонты райсомы рухсӕн искуы бардзырд раттай?+

Искуы сӕуӕхсидӕн йӕ бынат бацамыдтай,

13 Цӕмӕй зӕххӕн йӕ кӕрӕттыл схӕца

Ӕмӕ йыл цы фыдгӕнджытӕ ис, уыдоны ӕрцӕгъда?+

14 Ӕлыг мыхуыры бын куыд фӕивы+, афтӕ зӕхх фӕивы,

Ӕмӕ алцыдӕр йӕ бынаты слӕууы, раст цыма сӕхиуыл сӕ дарӕс ӕрбакӕнынц, афтӕ.

15 Фыдгӕнджыты рухс ист ӕрцӕуы+,

Ӕмӕ бӕрзонд ист цонгӕн йӕ хъару асӕтты+.

16 Денджызтӕ кӕм сӕвзӕрынц, уым искуы уыдтӕ?

Кӕнӕ арф дӕттӕ+ басгарынмӕ искуы ацыдтӕ?+

17 Мыййаг, мӕлӕты дуӕрттӕ+ ссардтай,

Дӕ бон у саудалынджы+ дуар фенын?

18 Зӕххы фӕтӕнтӕ кӕуылты сты, уый дӕ зонд ахсы?+

Кӕд ӕппӕт адӕттӕ базыдтай, уӕд мын сӕ зӕгъ.

19 Кӕм ис, рухсы цӕрӕнбынатмӕ чи цӕуы, уыцы фӕндаг?+

Кӕм ис йӕ бынат талынгӕн?

20 Дӕ бон сӕ у сӕ арӕнтӕм фӕхӕццӕ кӕнын,

Дӕ бон у, сӕ хӕдзӕрттӕм цы фӕндаг цӕуы, уый базонын?

21 Мыййаг сӕ уый тыххӕй зоныс, ӕмӕ уӕд райгуырдтӕ+

Ӕмӕ дӕ царды бонтӕ бирӕ сты?

22 Искуы бацыдтӕ, миты ӕвӕрӕнтӕ кӕм сты, уырдӕм?+

Дӕ бон у ихы ӕвӕрӕнтӕ фенын?+

23 Уыдон ӕз дарын бӕллӕхы бонмӕ,

Тох ӕмӕ хӕсты бонмӕ+.

24 Кӕм ис, рухс цы фӕндагыл кӕлы

Кӕнӕ скӕсӕйнаг дымгӕ+ зӕххыл цы фӕндагыл зилы, уый?

25 Донӕн фӕд чи акодта,

Чи скодта фӕндаг тӕрккъӕвдайы мигътӕн ӕмӕ арвнӕрдӕн+,

26 Цӕмӕй къӕвда ныууара, адӕймагӕн йӕ кой дӕр кӕм нӕй, уыцы зӕххыл+,

Зӕххон лӕг кӕм нӕ цӕры, уыцы ӕдзӕрӕг быдырыл,

27 Цӕмӕй донӕй бафсада, тыхдымгӕ кӕм рацыд ӕмӕ кӕм ницыуал баззад, уыцы бынӕттӕ

Ӕмӕ дзы кӕрдӕг сзайын кӕна?+

28 Зӕгъ-ма, къӕвдайӕн фыд ис?+

Кӕнӕ ӕртӕхӕн цард чи ратты?+

29 Их кӕй хуылфӕй рацӕуы

Ӕмӕ ӕрвон халасӕн+ чи ратты цард?

30 Дӕттӕ нал фӕзынынц, цыма дуры бын фӕвӕййынц, афтӕ,

Арф дӕттӕн сӕ цъар ныхъхъӕбӕр вӕййы+.

31 Дӕ бон у Кимы стъалыгуппары* бӕттӕнтӕ бабӕттын

Кӕнӕ Кесилы стъалыгуппары* бостӕ райхалын?+

32 Дӕ бон у Маззароты стъалыгуппар* йӕ афоныл ракӕнын

Ӕмӕ Асы стъалыгуппар* йӕ фырттимӕ акӕнын?

33 Арвӕн йӕ закъӕттӕ базыдтай+,

Науӕд дӕ бон у афтӕ бакӕнын, цӕмӕй зӕххыл дӕр сӕ бар цӕуа?

34 Дӕ бон у мигътӕм фӕхъӕр кӕнын,

Цӕмӕй уыйбӕрц дон ныууара, ӕмӕ дӕ ивылд дӕттӕ сӕ быны фӕкӕной?+

35 Дӕ бон у арвӕрттывдтытӕ искуыдӕм арвитын, цӕмӕй сӕ куыст бакӕнынмӕ ацӕуой

Ӕмӕ дӕм уый фӕстӕ ӕрбаздӕхой ӕмӕ зӕгъой, мӕнӕ стӕм, зӕгъгӕ?

36 Мигъты зонд+ чи бавӕрдта

Кӕнӕ, арвыл цы диссӕгтӕ вӕййы, уыдонӕн ӕмбарындзинад+ чи радта?

37 Кӕмӕ ис уыйбӕрц зонд, цӕмӕй мигътӕ банымайа?

Кӕнӕ кӕй бон у, арвыл цы доны дурынтӕ ис, уыдон ӕркъул кӕнын?+

38 Уӕд рыг лӕхъир цъыф фесты

Ӕмӕ сыджыты къуыбӕрттӕ кӕрӕдзийыл баныхӕсынц.

39 Дӕ бон у домбайӕн амӕттаг ӕрцахсын

Кӕнӕ ӕнӕфсис ӕвзонг домбӕйтты бафсадын+,

40 Се ’мбӕхсӕн бынӕтты куы ’рбадынц+,

Сӕ бынӕтты куы ’рхуыссынц ӕмӕ куы фенхъӕлмӕ кӕсынц, уӕд?

41 Халонӕн* хӕринаг чи ’рцӕттӕ кӕны+,

Йӕ лӕппынтӕ Хуыцаумӕ ӕххуысмӕ куы фӕдзыназынц,

Хӕринагагурӕг куы фӕразил-базил кӕнынц, уӕд?