Йесо арвыста 70 ахуыргӕнинаджы

НӔ ЭРӔЙЫ 32 аз. Фӕззӕг. Йесо аргъуыд куы райста, уӕдӕй рацыд ӕртӕ азы. Цалдӕр боны размӕ Йесо йӕ ахуыргӕнинӕгтимӕ уыд Иерусалимы Халагъудты бӕрӕгбоны ӕмӕ ма ныр дӕр, ӕвӕццӕгӕн, сты сахармӕ хӕстӕг. Йесойӕн ма зӕххыл лӕггад кӕнынӕн баззад ӕхсӕз мӕйы ӕмӕ уыцы рӕстӕджы уый хъусын кӕны Иорданы фаллаг фарс Иудейы кӕнӕ та Перейы. Ацы территори дӕр хъуамӕ куыстгонд ӕрцӕуа.

Ӕцӕг н. э. 30 азы Йесо иухатт аст мӕйы бӕрц хъусын кодта Иудейы. Фӕлӕ йӕ н. э. 31 азы Куадзӕны иудейтӕ марынмӕ куы хъавыдысты, уӕдӕй фӕстӕмӕ иу афӕдз ӕмӕ ӕрдӕг ахуыр кодта ӕрмӕстдӕр Галилейы. Уыцы рӕстӕджы уый сарӕзта, уӕдмӕ йын чи нӕ уыд, ахӕм стыр, хорз цӕттӕгонд хъусынгӕнджыты къорд. Ӕмӕ ныр райдыдта йӕ фӕстаг, уӕрӕх уацамындон кампани Иудейы.

Йесо уыцы кампани райдыдта, 70 ахуыргӕнинаджы кӕй равзӕрста ӕмӕ сӕ дыгӕйттӕй кӕй арвыста, уымӕй. Афтӕмӕй Паддзахады хъусынгӕнджыты 35 къайы кусын райдыдтой уыцы территорийы. Уыдон цӕуынц, фӕстӕдӕр Йесо йӕ апостолтимӕ цы сахартӕ ӕмӕ хъӕутӕм фӕнд кӕны ацӕуын, уырдӕм.

Йесо уыцы 70 ахуыргӕнинагӕн нӕ дзуры, цӕмӕй ӕмбырдгӕнӕнтӕм цӕуой, фӕлӕ сын фӕдзӕхсы, цӕмӕй адӕммӕ хӕдзӕрттӕм цӕуой, ӕмӕ сын амоны: «Цы хӕдзармӕ бацӕуат, раздӕр дзурут: „фарн ацы хӕдзарӕн!“ Ӕмӕ куы уа уым фарны фырт, уӕд уӕ фарн ӕрцӕудзӕн ууыл». Цы хъуамӕ хъусын кӕной? Йесо дзуры: «Ӕмӕ дзурут уыдонӕн: „ӕрхӕстӕг сымахмӕ Хуыцауы Паддзахад“». Уыцы 70 ахуыргӕнинаджы архайды тыххӕй иу куысты дзырдӕуы: «Сӕ Ахуыргӕнӕгау-иу уыдон дӕр кӕдӕм бацыдысты, уым-иу хӕдзарӕй-хӕдзармӕ хъусын кодтой» («Matthew Henry’s Commentary»).

Йесо иу аз раздӕр йӕ 12 ахуыргӕнинаджы уацамындон кампанийы Галилеймӕ куы арвыста, уӕд сын цы уынаффӕтӕ ратта, ахӕм уынаффӕтӕ дӕтты ныр 70 ахуыргӕнинагӕн дӕр. Фӕдзӕхсы сӕ, сӕ ныхмӕ кӕй цӕудзысты, амоны сын, хӕдзары хицауӕн, цӕй тыххӕй ӕрбацыдысты, уый куыд хъуамӕ бамбарын кӕной ӕмӕ сын уыимӕ дӕтты рынчынты дзӕбӕх кӕныны тых дӕр. Сӕ фӕстӕ Йесо куы ’рцӕуа, уӕд бирӕты бафӕнддзӕн, ахӕм диссӕгтӕ кӕй ахуыргӕнинӕгтӕ аразынц, уыцы Ахуыргӕнӕджы фенын.

Уыцы 70 ахуыргӕнинаджы уацамынд ӕмӕ сӕ фӕстӕ Йесойы куыст бирӕ нӕ ахаста. Тагъд рӕстӕджы Паддзахады хъусынгӕнджыты 35 къайы фӕстӕмӕ Йесомӕ ӕрбаздӕхтысты. «Хицау! хӕйрӕджытӕ дӕр кӕсынц нӕ коммӕ, Дӕу номы тыххӕй»,— цингӕнгӕйӕ дзурынц уыдон. Кӕй зӕгъын ӕй хъӕуы, сӕ лӕггаддзинадӕн ахӕм диссаджы фӕстиуджытӕ кӕй ис, уый тынг ӕхсызгон у Йесойӕн, ӕмӕ сын дзуры: «Ӕз федтон хӕйрӕджы ӕрхаугӕ арвӕй, арвырттывдау; мӕнӕ, дӕттын сымахӕн кӕлмытыл ӕмӕ уырынгонтыл лӕууыны бар».

Йесо зоны, рӕстӕджы фӕуды Хуыцауы Паддзахад куы райгуыра, уӕд Сайтан ӕмӕ йӕ хӕйрӕджытӕ уӕларвӕй ӕппӕрст кӕй ӕрцӕудзысты. Ныр адӕмӕн сӕ бон ӕнӕуынгӕ хӕйрӕджыты сурын кӕй у, уый дӕр у йӕ фидӕны ӕрцыды бӕлвырдгӕнӕн. Уымӕ гӕсгӕ фидӕны Сайтан уӕларвӕй кӕй ӕрхаудзӕн, ууыл Йесо дзуры куыд ӕнӕдызӕрдыггаг фактыл. Уӕдӕ 70 ахуыргӕнинагӕн сӕ бон кӕлмытӕ ӕмӕ уырынгонтыл лӕууын кӕй у, уымӕн ис символикон нысаниуӕг. Йесо дзуры: «Фӕлӕ уӕддӕр ууыл ма цин кӕнут, удтӕ уӕ коммӕ кӕй кӕсынц; фӕлӕ цин кӕнут ууыл, уӕ нӕмттӕ уӕлӕрвты фыст кӕй сты».

Йесо тынг амондджын у ӕмӕ хъӕрӕй кадджын кӕны йӕ Фыды, йӕ хуымӕтӕг лӕггадгӕнджытӕй ахӕм диссаджы хуызы кӕй пайда кӕны, уый тыххӕй. Уый дзуры йӕ ахуыргӕнинӕгтӕн: «Тӕхудиаг сты уыцы цӕстытӕ, сымах цы уынут, уыдон чи уыны! Уымӕн ӕмӕ зӕгъын сымахӕн, бирӕ пехуымпартӕ ӕмӕ паддзӕхты фӕндыд сымах цы уынут, уый фенын, ӕмӕ нӕ федтой, ӕмӕ хъусын, сымах цы хъусут, ӕмӕ нӕ фехъуыстой». Лукайы 10:1—24; Матфейы 10:1—42; Раргомад 12:7—12.

▪ Йесо йӕ лӕггаддзинады фыццаг ӕртӕ азы кӕм хъусын кодта ӕмӕ фӕстаг ӕхсӕз мӕйы та кӕм хъусын кӕны?

▪ Йесо уацамынды кӕй арвыста, уыцы 70 ахуыргӕнинаджы адӕмимӕ кӕм хъуамӕ ныхас кодтаиккой?

▪ Цӕмӕн загъта Йесо, зӕгъгӕ, хӕйрӕджы уӕларвӕй ӕрхаугӕ федта?

▪ Йесойы 70 ахуыргӕнинагӕн сӕ бон кӕлмытӕ ӕмӕ уырынгонтыл лӕууын кӕй у, уый цы нысан кӕны?