Библийы 23 чиныг – Исай

Ныффыста йӕ: Исай

Кӕм ӕрцыд фыст: Иерусалимы

Фыст фӕцис: н. э. агъоммӕ 732 азы фӕстӕ

Цы рӕстӕгыл дзы цӕуы дзырд: н. э. агъоммӕ 778 азмӕ ӕв. – 732 азы фӕстӕ

АСТӔУККАГ Скӕсӕны паддзахӕдтӕн ӕмӕ гыццылдӕр бӕстӕтӕн тӕссаг уыд ассириаг ӕгъатыр паддзахы бабырстӕй. Адӕмы ’хсӕн паддзахы ныхмӕ сусӕгвӕнд скӕнын ӕмӕ цӕдисӕттӕ ссарынӕй дарддӕр ӕндӕр ницӕй кой уыд (Ис. 8:9–13). Цӕгаты аздӕхӕг Израил хъуамӕ тагъд рӕстӕджы уыцы ӕхсӕнпаддзахадон змӕсты амӕттаг фӕуыдаид, хуссары та уал Иудӕйы паддзӕхтӕ хъуамӕ паддзахиуӕг кодтаиккой, фӕлӕ уыдонмӕ дӕр хорзӕй ницы ӕнхъӕлмӕ каст (4 Пад., 15–21 сӕртӕ). Арӕзт ӕрцыд ног хӕцӕнгӕрзтӕ, ӕмӕ уый адӕмы ноджы стырдӕр тасы бафтыдта (2 Пар. 26:14, 15). Кӕм хъуамӕ агуырдтаид адӕймаг ӕххуыс ӕмӕ ирвӕзындзинад? Иудӕйы гыццыл паддзахады адӕм ӕмӕ сауджынтӕ кӕд Иегъовӕмӕ йӕ номӕй куывтой, уӕддӕр сӕ зӕрдӕтӕ бынтон ӕндӕр ран уыдысты – уыдон ӕххуыс агуырдтой фыццаг Ассирийӕ, стӕй та Египетӕй (4 Пад. 16:7; 18:21). Иегъовӕйӕн сӕ йӕ бон кӕй уыд фервӕзын кӕнын, ууыл нал ӕууӕндыдысты. Кӕд гуымирытӕн комкоммӕ нӕ табу кодтой, уӕддӕр адӕмӕн сӕ фылдӕр лӕггад кодтой цӕстмӕ, ӕрмӕстдӕр ӕгъдӕуттӕ ӕххӕст кодтой, Хуыцауӕй та нӕ тарстысты.

² Уӕдӕ чи дзурдзӕн Иегъовӕйы номӕй? Чи хъусын кӕндзӕн йӕ ирвӕзынгӕнӕг тыхы тыххӕй? «Мӕнӕ ӕз! Мӕн арвит»,– райхъуыстис разыйы дзуапп. Уый уыд Исай, уый размӕ дӕр ма чи хъусын кодта, уыцы пехуымпар. Уый уыдис н. э. агъоммӕ 778 азмӕ ӕввахс, хъотырджын паддзах Ози цы аз амард, уыцы аз (Ис. 6:1, 8). Исайы ном нысан кӕны «Иегъовӕйы ирвӕзындзинад», ӕмӕ у Йесойы номы нысаниуӕджы хуызӕн («Иегъовӕ у Ирвӕзындзинад»), ӕрмӕст гыццыл ӕндӕрхуызон. Райдианӕй суанг кӕронмӕ Исайы пехуымпарад адӕймаджы ’ргом здахы, Иегъовӕ кӕй у ирвӕзындзинад, уымӕ.

³ Исай уыдис Амосы фырт (нӕ йӕ хъӕуы хӕццӕ кӕнын Иудӕйы ӕндӕр пехуымпар Амосимӕ) (1:1). Фыстад ницы дзуры йӕ райгуырд ӕмӕ йӕ мӕлӕты тыххӕй, фӕлӕ дзуттаг таурӕгъмӕ гӕсгӕ фыдзӕрдӕ паддзах Манасси Исайы хырхӕй йӕ астӕуыл алыг кӕнын кодта. (Абар Дзуттытӕм 11:37.) Йӕ фыстытӕ куыд ӕвдисынц, афтӕмӕй цардис Иерусалимы йӕ ус-пехуымпаримӕ ӕмӕ, ӕппынкъаддӕр, дыууӕ фыртимӕ, йӕ фыртты нӕмттӕн уыдис пехуымпарадон нысаниуӕг (Ис. 7:3; 8:1, 3). Уый лӕггад кодта Иудӕйы ӕппынкъаддӕр цыппар паддзахы рӕстӕджы – Ози, Иоафам, Ахаз ӕмӕ Езекийы рӕстӕджы – ӕвӕццӕгӕн, н. э. агъоммӕ иу-778 азӕй (Ози куы амарди, уӕд, кӕнӕ, гӕнӕн ис, раздӕр) ӕмӕ ма н. э. агъоммӕ 732 азы фӕстӕ дӕр цасдӕр рӕстӕг (Езекийы 14-ӕм аз), иудзырдӕй, 46 азӕй къаддӕр нӕ лӕггад кодта. Зӕгъӕн ис, ӕмӕ уӕдмӕ йӕ пехуымпарӕдтӕ фыст фӕци (1:1; 6:1; 36:1). Йӕ рӕстӕджы ма уыд ӕндӕр пехуымпартӕ дӕр: Иудӕйы – Михей, цӕгаты та – Оси ӕмӕ Одед (Мих. 1:1; Оси 1:1; 2 Пар. 28:6–9).

⁴ Исайӕн пехуымпарадон тӕрхӕттӕ Иегъовӕ кӕй фыссын кодта, уый бӕлвырд кӕны Исайы 30:8-ӕм стихӕй: «Ныр ацу, ӕмӕ сын ӕй сӕ разы ныффыс фӕйнӕгыл, ӕмӕ йӕ чиныгмӕ дӕр бахӕсс, цӕмӕй баззайа ӕвдисӕнӕн ӕнустӕм». Рагон дзуттаг раввинтӕ разы уыдысты, чиныг Исайы фыст кӕй у, ууыл, ӕмӕ йӕ стыр пехуымпарты чингуыты ’хсӕн сӕвӕрдтой фыццаг (Исай, Иереми ӕмӕ Иезекил).

⁵ Иуӕй-иутӕ дзурынц, зӕгъгӕ, чиныджы ӕвзаг 40-ӕм сӕрӕй фӕстӕмӕ кӕй фӕивта, уый ууыл дзурӕг у, ӕмӕ йӕ ӕндӕр фыссӕг, ома «Дыккаг Исай» кӕй ныффыста. Фӕлӕ уым дызӕрдыггагӕй ницы ис, уымӕн ӕмӕ йӕ хъуыды ивы. Исайы номӕй цы чиныг хуыйны, уый Исай йӕхӕдӕг кӕй ныффыста, уымӕн ис бирӕ бӕлвырдгӕнӕнтӕ. Цӕвиттонӕн, дзырдбаст «Израилы Сыгъдӕг» Исайы чиныджы ӕмбӕлы 12 хатты 1–39 сӕрты ӕмӕ 13 хатты 40–66 сӕрты – ӕмткӕй 25 хатты,– афтӕмӕй Дзуттаг Фыстыты иннӕ рӕтты та ӕмбӕлы ӕрмӕстдӕр 6 хатты. Чиныг ӕнӕхъӕнӕй иу адӕймаджы фыст кӕй у, уый ма бӕлвырд кӕны апостол Павел дӕр, пехуымпарадӕн йӕ алы хайӕ дӕр кӕй пайда кӕны ӕмӕ чиныджы фыссӕгыл иу адӕймаджы, ома Исайы, кӕй нымайы, уымӕй. (Абар Ромӕгтӕм 10:16, 20; 15:12 ӕмӕ Исай 53:1; 65:1; 11:1.)

⁶ Банысан кӕнын хъӕуы, 1947 азы, Мард денджызы цӕгат-ныгуылӕнварс Хирбет-Кумранмӕ ’ввахс цы лӕгӕт ис, уым кӕй ссардтой цалдӕр рагон документы. Схуыдтой сӕ «Мард денджызы тыхтонтӕ», ӕмӕ уыдоны ’хсӕн уыдис Исайы пехуымпарад дӕр. Уый фыст у, масоретты дуджы размӕ цы ӕвзаг уыд ӕмӕ ныронг кӕуыл дзурынц, ахӕм рӕсугъд дзуттаг ӕвзагыл, цӕуы йыл 2 000 азы бӕрц, хауы н. э. агъоммӕ дыккаг ӕнусы кӕронмӕ. Уӕдӕ ацы текст, Дзуттаг Фыстытӕ кӕй бындурыл сты арӕзт, уыцы масоретаг къухфыстытӕн сӕ иууыл рагондӕрӕй фыст ӕрцыд иу мин азы бӕрц раздӕр. Масоретаг къухфыстытимӕ абаргӕйӕ дзы гыццыл хицӕндзинӕдтӕ ис йӕ растфыссынады ӕмӕ йӕ хъуыдыйӕдты сконды, фӕлӕ дины ахуырӕдты нӕ хицӕн кӕнынц. Уымӕй хуыздӕр бӕлвырдгӕнӕн ма цы уа, абон нӕ Библийы, Исай Хуыцауы удцырынӕй цы ныффыста, уый кӕй ис ӕцӕгдӕр. Уымӕй уӕлдай ма, уыцы рагон тыхтонтӕ дзурӕг сты, дыууӕ «Исайы» кой чи кӕны, уыцы ахуыргӕндты ныхмӕ дӕр, уымӕн ӕмӕ дзы 40-ӕм сӕры фыццаг хъуыдыйад райдыдта иуырдыгӕй, 39-ӕм сӕры фӕстаг рӕнхъӕй, ӕмӕ фӕуд кӕны иннӕрдыгӕй. Уӕдӕ бӕрӕг у, чи йӕ рафыста, уый афтӕ нӕ хъуыды кодта, зӕгъгӕ, уыцы чиныг дарддӕр ӕндӕр фыссӕг кӕй фыста кӕнӕ дыууӕ хайыл кӕй дих кӕныa.

⁷ Исайы чиныджы ӕцӕг хабӕрттыл кӕй цӕуы дзырд, уымӕн ис бирӕ бӕлвырдгӕнӕнтӕ. Чырыстон Грекъаг Фыстыты фысджытӕ, Моисейы ныхӕстӕй фӕстӕмӕ, афтӕ арӕх ӕндӕр никӕцы пехуымпары ныхӕстӕ ӕрхӕссынц. Ӕцӕг хабӕрттӕ дзы кӕй ис фыст, уымӕн ма ис бирӕ историон ӕмӕ археологон бӕлвырдгӕнӕнтӕ дӕр, зӕгъӕм, ассириаг паддзӕхты историон фыстытӕ, уыдонимӕ иумӕ Сеннахиримы ӕхсӕзкъуымон призмӕ, цыран уый фыссы, Иерусалимыл куыд ӕрхъула кодтой, уый тыххӕйb (Исай, 36, 37 сӕртӕ). Кӕддӕры Вавилонӕй цы кӕлддзӕгтӕ баззад, уыдон нырмӕ дӕр ӕвдисӕнӕн лӕууынц, Исайы 13:17–22-ӕм стихты цы ис фыст, уый кӕй сӕххӕст, уымӕнc. Исай иу-200 азы раздӕр кӕй ном ныффыста, уыцы паддзах Кир иудейты куы ссӕрибар кодта ӕмӕ уыдон Вавилонӕй фӕстӕмӕ сӕ райгуырӕн зӕхмӕ куы ӕрыздӕхтысты, уӕд уыцы мингай адӕмӕй алкӕцы дӕр уыд удӕгас ӕвдисӕн Исайы пехуымпарӕдты сӕххӕстӕн. Гӕнӕн ис, ӕмӕ Кирӕн уыцы пехуымпарадон фыст фенын кодтой, уымӕн ӕмӕ, иудейтӕй чи баззад, уыдоны куы сӕрибар кодта, уӕд дзырдта, уый Иегъовӕйы бардзырдмӕ гӕсгӕ кӕй сарӕзта (Ис. 44:28; 45:1; Езд. 1:1–3).

⁸ Исайы чиныджы иууыл диссагдӕр сты Мессиайы тыххӕй пехуымпарӕдтӕ. Йесойыл чи сӕххӕст, ахӕм цаутӕ уыйбӕрц ныффыста Исай, ӕмӕ ма йыл «Евангели хъусынгӕнӕг пехуымпары» ном дӕр сӕвӕрдтой. Исайы чиныджы 53-ӕм сӕр бирӕ рӕстӕджы дӕргъы уыдис «зынӕмбарӕн» – Апостолты куыстыты 8-ӕм сӕры цы ефиопаг евнухы кой цӕуы, ӕрмӕст уымӕн нӕ, фӕлӕ иудейтӕн ӕмткӕй дӕр. Уыцы пехуымпарады афтӕ ирдӕй ӕвдыстӕуы, Йесо цы хъизӕмӕрттӕ хъуамӕ бавзӕрстаид, уыдон, ӕмӕ сӕ цыма йӕхи цӕстӕй чи федта, ахӕм адӕймаг ныффыста. Исайы чиныджы ацы диссаджы сӕры цы пехуымпарӕдтӕ ис, уыдон куыд сӕххӕст сты, уый тыххӕй фыст ис Чырыстон Грекъаг Фыстыты, ӕмӕ уый хорз зыны ацы абарстытӕй: 1 стих – Иоанны 12:37, 38; 2 стих – Иоанны 19:5–7; 3 стих – Маркы 9:12; 4 стих – Матфейы 8:16, 17; 5 стих – 1 Петры 2:24; 6 стих – 1 Петры 2:25; 7 стих – Куыстытӕ 8:32, 35; 8 стих – Куыстытӕ 8:33; 9 стих – Матфейы 27:57–60; 10 стих – Дзуттытӕм 7:27; 11 стих – Ромӕгтӕм 5:18; 12 стих – Лукайы 22:37. Хуыцауы йедтӕмӕ кӕмӕй уыдаиккой ахӕм раст пехуымпарӕдтӕ?

ЦЫ ПАЙДА У

³⁴ Исайы пехуымпарадон чиныгмӕ лӕмбынӕг ӕркӕсгӕйӕ бамбардзыстӕм, цӕй зынаргъ лӕвар у уый Иегъовӕ Хуыцауӕй. Чиныджы ис Хуыцауы бӕрзонд хъуыдыты рухс (Ис. 55:8–11). Библийы ӕцӕгад адӕмӕн чи амоны, уыдонӕн сӕ бон у пайда кӕнын Исайы чиныгӕй – Йесойы фӕсномыг ныхӕсты хуызӕн адӕймаджы зӕрдӕ чи агайы, ахӕм ирд цӕвиттонты хӕзнадонӕй. Иу суджы лыггагӕй арт дӕр чи кӕны ӕмӕ дзы табу кӕнынӕн гуымиры дӕр чи аразы, ахӕм адӕймаджы ӕнӕзонддзинад нын Исай ирдӕй ӕвдисы. Уый нын ӕнкъарын кӕны, адӕймаг ӕгӕр цыбыр хуыссӕныл хуысгӕйӕ ӕмӕ ӕгӕр нарӕг хъӕццулы йӕхи тухгӕйӕ куыд фӕтыхсы, ӕмӕ, рӕйгӕ дӕр чи нӕ кӕны, ахӕм ӕгомыг куыйты хуызӕн пехуымпартӕ куыд тарф фынӕй кӕнынц, уый. Исай нӕ куыд разӕнгард кӕны, афтӕ нӕхӕдӕг куы «агурӕм Иегъовӕйы чиныджы ӕмӕ дзы хъӕрӕй куы кӕсӕм», уӕд фендзыстӕм, куыд ахсджиаг нын у абон Исайы диссаджы пехуымпарад (44:14–20; 28:20; 56:10–12; 34:16).

³⁵ Пехуымпарадон чиныг сӕрмагондӕй ӕргом здахы Хуыцауы Паддзахадмӕ, Мессиа кӕй сӕргъы лӕууы, уымӕ. Иегъовӕ у иууыл кадджындӕр Паддзах, чи нӕ фервӕзын кӕндзӕн, уый (33:22). Ӕмӕ Мессиайы тыххӕй та цы ис зӕгъӕн? Зӕд Мариайӕн фехъусын кодта, цы сывӕллон хъуамӕ райгуыра, уый Давиды паддзахбадӕн кӕй райсдзӕн, ӕмӕ уый ӕвдисы, афтӕмӕй Исайы 9:6, 7-ӕм стихтӕ кӕй сӕххӕст уыдзысты; «ӕмӕ паддзахиуӕг кӕндзӕн Иаковы хӕдзарыл мыккагмӕ, ӕмӕ Йӕ Паддзахдзинадӕн нӕ уыдзӕн кӕрон» (Лук. 1:32, 33). Матфейы 1:22, 23-ӕм стихтӕй бӕрӕг у, Йесо ӕнӕцыд чызгӕй кӕй райгуырд, уымӕй Исайы 7:14-ӕм стих кӕй ӕххӕст кӕны, уый. Уым Йесо хуыйны «Еммануил». Иу-30 азы фӕстӕ Аргъауӕг Иоанн райдыдта хъусын кӕнын, кӕй «ӕрхӕстӕг Уӕларвон Паддзахад». Цыппар Евангелийы фыссӕджы дӕр ӕрхастой Исайы 40:3-ӕм стихы ныхӕстӕ, цӕмӕй равдыстаиккой, уыцы Иоанн кӕй у «хъӕргӕнӕджы хъӕлӕс ӕдзӕрӕг раны» (Матф. 3:1–3; Маркы 1:2–4, НФ; Лук. 3:3–6, НФ; Иоан. 1:23, НФ). Йесо донаргъуыд куы райста, уӕд сси Мессиа – Иегъовӕйы Сӕрст, Иессейы къабаз кӕнӕ уидаг – адӕмтыл хицауиуӕг кӕнынӕн. Ууыл хъуамӕ дарой сӕ ныфс, Исайы 11:1, 10-ӕм стихты куыд фыст у, уымӕ гӕсгӕ (Ром. 15:8, 12).

³⁶ Ӕркӕс ма, дарддӕр куыд фыссы Исай Мессианон Паддзахы тыххӕй! Йесо йӕ хӕслӕвӕрды тыххӕй бакаст Исайы тыхтонӕй, цӕмӕй равдыстаид, Иегъовӕйы Сӕрст кӕй у, уый, ӕмӕ уый фӕстӕ райдыдта «хъусын кӕнын Хуыцауы Паддзахад, уымӕн ӕмӕ»,– зӕгъы Йесо,– «уый тыххӕй ӕрвыст дӕн Ӕз» (Лук. 4:17–19, 43; Ис. 61:1, 2). Исайы 53-ӕм сӕры Йесойы зӕххон лӕггаддзинады тыххӕй ӕмӕ йӕ мӕлӕты тыххӕй цы уыд загъд, уыдонӕй цыппар Евангелийы бирӕ хабӕрттӕ ис фыст. Иудейтӕ кӕд Паддзахады тыххӕй хорз хабар дӕр фехъуыстой ӕмӕ Йесо цы диссӕгтӕ арӕзта, уыдон дӕр федтой, уӕддӕр се ’нӕуырнӕг зӕрдӕтӕй уыдонӕн сӕ нысаниуӕг нӕ бамбӕрстой, растдӕр Исайы 6:9, 10; 29:13 ӕмӕ 53:1 куыд загъд уыд, афтӕ (Матф. 13:14, 15; Иоан. 12:38–40; Ап. к. 28:24–27; Ром. 10:16; Матф. 15:7–9; Маркы 7:6, 7). Йесо уыдонӕн уыди цӕлхдур, фӕлӕ сси фисыны сӕр, Иегъовӕ Сионы кӕй сӕвӕрдта ӕмӕ йӕ монон хӕдзар кӕуыл аразы, уый, Исайы 8:14 ӕмӕ 28:16 пехуымпарадмӕ гӕсгӕ (Лук. 20:17; Ром. 9:32, 33; 10:11; 1 Пет. 2:4–10).

³⁷ Йесо Чырыстийы апостолтӕ дӕр хорз пайда кодтой Исайы пехуымпарадӕй уацамынды. Зӕгъӕм, адӕмы зӕрдӕты уырнындзинад рӕзын кӕнынӕн хъусынгӕнджытӕ кӕй хъӕуы, уый бамбарын кӕнынӕн Павел ӕрхаста Исайы ныхӕстӕ: «Куыд хорз сты фарн ӕмӕ хорздзинад хъусынгӕнджыты къӕхтӕ!» (Ром. 10:15; Ис. 52:7; кӕс ма Ромӕгтӕм 10:11, 16, 20, 21 дӕр). Хорз хабарӕн кӕддӕриддӕр стыр ахадындзинад кӕй уыдзӕн, уый ӕмбарынгӕнгӕйӕ Петр дӕр ӕрхаста Исайы ныхӕстӕ: «Алы буар, ӕвӕдза, у кӕрдӕгау, ӕмӕ адӕймаджы намыс ӕгасӕйдӕр у кӕрдӕджы дидинӕгау; бахус вӕййы кӕрдӕг ӕмӕ йӕ дидинӕг дӕр азгъӕлы. Фӕлӕ Хуыцауы Дзырд баззайы ӕнусмӕ, ай та у, сымахӕн ӕргом амынд чи фӕци, уыцы фарны уац» (1 Пет. 1:24, 25, НФ; Ис. 40:6–8).

³⁸ Диссаджы ӕвзагӕй фыссы Исай фидӕны Паддзахады тыххӕй! Кӕс ма! Уый у «ног арв ӕмӕ ног зӕхх», цыран «паддзах паддзахиуӕг кӕндзӕн рӕстӕй» ӕмӕ кънйӕзтӕ хицауиуӕг кӕндзысты закъонмӕ гӕсгӕ. Цӕй хорз фадат у уый цин кӕнынӕн! (65:17, 18; 32:1, 2). Ӕмӕ та ногӕй Петр Исайы хорз хабары кой кӕны: «Ӕниу мах, Йӕ зӕрдӕвӕрдмӕ гӕсгӕ, ӕнхъӕлмӕ кӕсӕм ног арв ӕмӕ ног зӕххмӕ, кӕцытыл цӕры рӕстдзинад» (2 Пет. 3:13). Ацы диссаджы Паддзахадӕн йӕ иууыл стырдӕр кад ӕвдыстӕуы Раргомады фӕстаг сӕрты (Ис. 66:22, 23; 25:8; Рарг. 21:1–5).

³⁹ Уӕдӕ, Исайы чиныг кӕд карз тӕрхон хӕссы Иегъовӕйы знӕгтӕн ӕмӕ, йӕхи йӕ лӕггадгӕнӕг хонгӕйӕ, цӕстмӕмитӕ чи кӕны, уыдонӕн, уӕддӕр рӕсугъд, аив ӕвзагӕй дзуры Мессиайы Паддзахады ныфсыл, Иегъовӕйы ном цы Паддзахады руаджы ссыгъдӕг уыдзӕн, ууыл. Ацы чиныг нын бирӕ ахсджиаг хъуыдытӕ ӕмбарын кӕны Иегъовӕйы Паддзахады тыххӕй ӕмӕ, «ирвӕзындзинад уымӕй кӕй у», уыцы ныфсӕй нын нӕ зӕрдӕтӕ фидар кӕны (Ис. 25:9; 40:28–31).

[Фиппаинӕгтӕ]