Разныхас

1, 2. Библи цы адӕмы тыххӕй дзуры, уыдонмӕ иу цӕуӕг цӕстдарӕг цы цӕстӕй каст? Уыцы адӕймӕгтӕ дын диссаджы ӕмбӕлттӕ цӕмӕн уаиккой?

«БИБЛИЙЫ цы адӕймӕгты кой цӕуы, уыдоны тыххӕй афтӕ зӕрдиагӕй дзырдта, раст цыма йӕ хорз ӕмбӕлттӕ сты». Ацы ныхӕстӕ загъта иу хо, ацӕргӕ цӕуӕг цӕстдарӕджы раныхасмӕ куы байхъуыста, уый фӕстӕ. Ӕмӕ нӕ фӕрӕдыд. Уыцы ӕфсымӕр Хуыцауы Ныхас бирӕ азты дӕргъы лӕмбынӕг иртӕста ӕмӕ йӕ иннӕтӕн дӕр амыдта. Ӕмӕ, Библийы цы иузӕрдион адӕймӕгты тыххӕй фыст ис, уыдон йӕ зӕрдӕйӕн афтӕ адджын систы, цыма йӕ рагон ӕмбӕлттӕ сты.

² Ӕмӕ ӕцӕгдӕр, Библи кӕй кой кӕны, уыдонӕй нын бирӕтӕ диссаджы ӕмбӕлттӕ нӕ уаиккой? Ды дӕр сӕм ахӕм цӕстӕй кӕсыс? Дӕ цӕстытыл-ма ауайын кӕн, цыма Ной, Авраам, Руф, Илийа кӕнӕ Есфиримӕ фӕцӕуыс ӕмӕ ныхӕстӕ кӕнут. Дӕ рӕстӕг семӕ ӕрвитыс, цӕмӕй сӕ хуыздӕр базонай. Ахӕм ӕмбӕлттимӕ дӕ цард цас рӕсугъддӕр уаид! Цас хорз уынаффӕтӕ дын-иу раттиккой ӕмӕ-иу дӕ сӕ фӕлмӕн ныхасӕй цас ныфс бауадзиккой! (Бакӕс Ӕмбисӕндтӕ 13:20.)

3. а) Хуыцауы рагон иузӕрдион лӕггадгӕнджыты тыххӕй фылдӕр куы базонӕм, уӕд нын уый цы пайда уыдзӕн? ӕ) Цавӕр фарстатӕм ӕркӕсдзыстӕм?

³ Кӕй зӕгъын ӕй хъӕуы, рӕстгӕнджытӕ куы ӕгас кӕной, уӕд нын фадат уыдзӕн, цӕмӕй, Библийы кӕй тыххӕй цӕуы дзырд, уыдонимӕ лӕгӕй-лӕгмӕ базонгӕ уӕм ӕмӕ семӕ балымӕн уӕм (Хъуыд. 24:15). Фӕлӕ уыцы иузӕрдион лӕггадгӕнджыты тыххӕй фылдӕр куы базонӕм, уӕд нын уый абон дӕр стыр ӕххуыс уыдзӕн. Куыд? Ацы фарстайӕн нын апостол Павел дӕтты дзуапп: «Хуыцау сӕ уырнындзинад ӕмӕ сӕ фӕразондзинады тыххӕй хорздзинӕдтӕй зӕрдӕ кӕмӕн бавӕрдта, уыдоны фӕзмут» (Дзут. 6:12). Ацы чиныджы лӕмбынӕг ӕркӕсдзыстӕм, фидар уырнындзинад кӕмӕн уыд, уыцы рагон лӕггадгӕнджытӕй бирӕты цардмӕ. Фӕлӕ уал фыццаг аныхас кӕнӕм, Павелы ныхӕстыл хъуыды кӕнгӕйӕ адӕймагмӕ цы фарстатӕ фӕзыны, уыдоныл: цы у уырнындзинад ӕмӕ нӕ цӕмӕн хъӕуы? Ӕмӕ нӕ бон куыд у уыцы рагон лӕггадгӕнджыты фӕзмын?

Уырнындзинад цы у ӕмӕ нӕ цӕмӕн хъӕуы?

4. Уырнындзинады тыххӕй бирӕтӕ цы хъуыды кӕнынц ӕмӕ уый раст цӕуылнӕ у?

⁴ Уырнындзинад у рӕсугъд миниуӕг. Уыцы диссаджы миниуӕг, ацы чиныджы цы нӕлгоймӕгтӕ ӕмӕ сылгоймӕгты цардмӕ ӕркӕсдзыстӕм, уыдонӕй алкӕй цӕсты дӕр уыди кадджын. Абон бирӕтӕ нӕ зонынц, ӕцӕг уырнындзинад цы у, уый. Афтӕ сӕм кӕсы, ӕмӕ адӕймаг истӕуыл куы феууӕнды, уӕд ын уымӕн бӕлвырдгӕнӕнтӕ нӕ вӕййы. Фӕлӕ афтӕ чи хъуыды кӕны, уыдон рӕдийынц. Ӕцӕг уырнындзинад афтӕ нӕу, ӕмӕ куырмӕй цӕуылдӕр ӕууӕндай. Ахӕм ӕнӕбындур уырнындзинад тынг тӕссаг у, уымӕн ӕмӕ кӕд адӕймаджы абон цыдӕр уырны, уӕддӕр уый ууыл дзурӕг нӕу, ӕмӕ йӕ райсом дӕр уырндзӕн. Стӕй уый дӕр фаг нӕу, ӕмӕ дӕ Хуыцау уырна. Библи куыд зӕгъы, афтӕмӕй «уырнгӕ хӕйрӕджыты дӕр кӕны, ӕмӕ фыртӕссӕй ризынц» (Иак. 2:19).

5, 6. а) Уырнындзинад цавӕр дыууӕ хъуыддагимӕ у баст? ӕ) Нӕ уырнындзинадӕн цавӕр бындур хъуамӕ уа? Ӕрхӕсс цӕвиттон.

⁵ Нӕ зӕрдыл-ма ӕрлӕууын кӕнӕм, ӕцӕг уырнындзинады тыххӕй Библийы цы фыст ис, уый. (Бакӕс Дзуттӕгтӕм 11:1.) Павел куыд загъта, афтӕмӕй уырнындзинад баст у, нӕ бон фенын кӕй нӕу, дыууӕ ахӕм хъуыддагимӕ. Фыццаг: уырнындзинад баст у, ныртӕккӕ цы ис, фӕлӕ адӕймаг «цӕстӕй цы нӕ уыны», уыимӕ. Зӕххон адӕймагӕн йӕ бон фенын нӕу, уӕлӕрвты цы ис, уый, зӕгъӕм, Йегъовӕ Хуыцауы, йӕ Фырты ӕмӕ, ныртӕккӕ уӕлӕрвтӕй разамынд чи дӕтты, уыцы Паддзахад. Дыккаг: уырнындзинад баст у, «адӕймаг цӕмӕ ӕнхъӕлмӕ кӕсы», уыимӕ, ома нырма чи не ’рцыд, уыцы хабӕрттимӕ. Мах нырма нӕ уынӕм, тагъд Хуыцауы Паддзахад цы ног дуне скӕндзӕн, уый. Цымӕ уый ууыл дзурӕг у, ӕмӕ, цӕстӕй цы нӕ уынӕм, уыдӕттыл кӕй ӕууӕндӕм ӕмӕ сӕм кӕй ӕнхъӕлмӕ кӕсӕм, уымӕн бындур нӕй?

⁶ Уый афтӕ нӕу. Павел бамбарын кодта, ӕцӕг уырнындзинадӕн фидар бындур кӕй ис. Загъта, зӕгъгӕ, адӕймаг цӕмӕ ӕнхъӕлмӕ кӕсы, уымӕй йӕ хъуамӕ уа «фидар ныфс». Ам цы дзырдӕй спайда кодта, уый ма ратӕлмац кӕнӕн ис афтӕ дӕр – «цавӕрдӕр исбон адӕймаджы кӕй у, уый чи ӕвдисы, ахӕм документ». Зӕгъӕм, чидӕр дын сфӕнд кодта хӕдзар балӕвар кӕнын. Гъемӕ дын дӕ къухмӕ документ радта ӕмӕ дын загъта: «Мӕнӕ дӕ ног хӕдзар». Кӕй зӕгъын ӕй хъӕуы, йӕ ныхӕстӕ афтӕ ӕмбаргӕ не сты, ӕмӕ уыцы гӕххӕтты гӕбазыл цӕрдзынӕ. Йӕ ныхӕстӕ ууыл дзурӕг сты, ӕмӕ уыцы документӕн стыр тых ис. Ӕмӕ дӕ къухы уыцы документ куы уа, уӕд зӕгъӕн ис, ӕмӕ хӕдзар дӕу у. Афтӕ бӕлвырдгӕнӕнтӕ дӕр сты фидар бындур нӕ уырнындзинадӕн.

7. Цы у ӕцӕг уырнындзинад?

⁷ Уӕдӕ ӕцӕг уырнындзинад уый у, ӕмӕ адӕймаг Йегъовӕ Хуыцауыл ӕппындӕр куы нӕ дызӕрдыг кӕна. Уырнындзинады фӕрцы Йегъовӕйы нымайӕм нӕ фӕлмӕн Фыдыл ӕмӕ нӕ дызӕрдыг кӕнӕм, зӕрдӕ нын цӕмӕй бавӕрдта, уыдон иууылдӕр кӕй сӕххӕст кӕндзӕн. Фӕлӕ ма ноджыдӕр цыдӕр хъӕуы аразын. Ӕцӕг уырнындзинад дидинӕгӕй уӕлдай нӕу – цӕмӕй рӕза, уый тыххӕй йӕм ӕппынӕдзух хъӕуы зилын. Уырнындзинад хъӕуы хъуыддӕгтӕй ӕвдисын, кӕннод амӕлдзӕн (Иак. 2:26).

8. Уырнындзинад цӕмӕн хъӕуы?

⁸ Фӕлӕ уырнындзинад цӕмӕн хъӕуы? Ацы фарстайӕн дӕр та нын диссаджы дзуапп радта Павел. (Бакӕс Дзуттӕгтӕм 11:6.) Уырнындзинад нӕм куы нӕ уа, уӕд нӕ бон нӕ уыдзӕн Йегъовӕйӕн кувын дӕр ӕмӕ йын йӕ зӕрдӕ барухс кӕнын дӕр. Ӕмӕ Хуыцау кӕй сфӕлдыста, уыдонӕй алкӕмӕн дӕр йӕ царды нысан уый у, цӕмӕй йӕ уӕларвон Фыдмӕ ӕввахс кӕна ӕмӕ йӕ кадджын кӕна. Ӕнӕ уырнындзинадӕй та уымӕн гӕнӕн нӕй.

9. Йегъовӕ куыд равдыста, уырнындзинад нӕ куыд тынг хъӕуы, уый кӕй ӕмбары?

⁹ Уырнындзинад нӕ куыд тынг хъӕуы, уый Йегъовӕйӕ хуыздӕр ничи зоны. Ӕмӕ нын цӕмӕй ӕнцондӕр уа нӕ уырнындзинад фидар кӕнын ӕмӕ йӕ хъуыддагӕй ӕвдисын, уый тыххӕй нын радта адӕймӕгты цӕвиттонтӕ. Зӕгъӕм, чырыстон ӕмбырды разамынд чи дӕтты, уыдон сӕ иузӕрдиондзинадӕй ӕмӕ сӕ уырнындзинадӕй сты фӕзминаг. Хуыцау нӕ йӕ Ныхасы разӕнгард кӕны, цӕмӕй сын «сӕ уырнындзинад фӕзмӕм» (Дзут. 13:7). Фӕлӕ ма нын уымӕй уӕлдай радта «ӕвдисӕнты... стыр мигъ». Уыцы ӕвдисӕнтӕ цардысты раджы заманты ӕмӕ нын сӕ диссаджы уырнындзинадӕй сты фӕзминаг (Дзут. 12:1, фип.). Павел уыцы иузӕрдион лӕггадгӕнджыты тыххӕй дзуры Дзуттӕгтӕм фыстӕджы 11 сӕры. Фӕлӕ, кӕй зӕгъын ӕй хъӕуы, се ’ппӕты нӕ ранымадта. Библийы фыст ис, фидар уырнындзинад кӕмӕн уыди, бирӕ ахӕм адӕмы царды хабӕрттӕ. Се ’хсӕн ис нӕлгоймӕгтӕ дӕр ӕмӕ сылгоймӕгтӕ дӕр, ӕрыгӕттӕ дӕр ӕмӕ ацӕргӕтӕ дӕр. Уыдон цардысты алыхуызон уавӕрты, ӕмбӕлдысты алыхуызон зындзинӕдтыл. Абон мах цӕрӕм ӕнӕхуыцау дунейы, ӕмӕ уыцы иузӕрдион адӕймӕгты цардыл хъуыды кӕнгӕйӕ нӕхицӕн зондӕн бирӕ цыдӕртӕ райсдзыстӕм.

Куыд у нӕ бон иннӕты уырнындзинад фӕзмын?

10. Библи лӕмбынӕг куы иртасӕм, уӕд нын ӕнцондӕр цӕмӕн уыдзӕн, цы иузӕрдион лӕггадгӕнджыты тыххӕй дзы ис фыст, уыдоны фӕзмын?

¹⁰ Цӕмӕй искӕй бафӕзмай, уый тыххӕй уал хъуамӕ йемӕ хорз базонгӕ уай. Ацы чиныг кӕсгӕйӕ бафиппайдзынӕ, хабӕрттӕ бӕстон кӕй раиртӕстой ӕмӕ бирӕ хорз ӕрмӕг кӕй ссардтой, цӕмӕй Хуыцауы иузӕрдион лӕггадгӕнджытимӕ хуыздӕр базонгӕ уай. Хорз нӕ уаид, дӕхӕдӕг дӕр-иу уыцы адӕймӕгты тыххӕй фылдӕр ӕрмӕг куы ссарис? Дӕхицӕн дӕр дӕ бон у «арф къахын», Библи иртасынӕн дӕм цы «кусӕнгӕрзтӕ» ис, уыдоны фӕрцы. Библийы цы хабӕрттӕ кӕсай, уыдоныл-иу лӕмбынӕг хъуыды кӕн. Дӕ цӕстытыл-иу ауайын кӕн, цыма ды дӕр уым дӕ: чи цы аразы, уый дӕхи цӕстӕй уыныс, алы уынӕр дӕр хъусыс ӕмӕ алыхуызон тӕфтӕм смудыс. Ноджы ахсджиагдӕр та уый у, цӕмӕй-иу бамбарай, цы адӕмы кой дзы цӕуы, уыдонмӕ цавӕр ӕнкъарӕнтӕ уыдаид, уый. Дӕхи-иу уыцы иузӕрдион нӕлгоймӕгтӕ ӕмӕ сылгоймӕгты бынаты куы сӕвӕрай ӕмӕ-иу сын сӕ рыст дӕ зӕрдӕмӕ куы айсай, уӕд семӕ ноджы хуыздӕр базонгӕ уыдзынӕ. Иуӕй-иутӕ та дын дзы афтӕ адджын суыдзысты, цыма дӕ рагон ӕмбӕлттӕ сты.

11, 12. а) Аврам ӕмӕ Сарӕйы хуыздӕр цӕй фӕрцы бамбардзынӕ? ӕ) Аннӕ, Илийа ӕмӕ дын Самуилы цӕвиттонтӕ куыд баххуыс кӕндзысты?

¹¹ Уыцы иузӕрдион лӕггадгӕнджытӕ, цавӕр адӕймӕгтӕ уыдысты, уый хуыздӕр куы базонай, уӕд дӕ фӕнддзӕн уыдоны бафӕзмын. Зӕгъӕм, Йегъовӕйы организацийы дын дӕ бӕрны ног хъуыддаг бакодтой. Загътой дын, цӕмӕй, хъусынгӕнджытӕ кӕм нӕ фаг кӕны, ахӕм ранмӕ ацӕуай кӕнӕ та хъусын кӕнгӕйӕ ног мадзӕлттӕй спайда кӕнай. Фӕлӕ ахӕм уавӕрты кӕй никуы хъусын кодтай, уымӕ гӕсгӕ дын зын у. Гъемӕ куыд бакӕнай, ууыл хъуыды кӕныс ӕмӕ уый тыххӕй Йегъовӕмӕ кувыс. Цымӕ дын Аврамы цӕвиттон нӕ баххуыс кӕндзӕн? Аврам ӕмӕ Сарӕ Уры сӕ хорз цард ныууагътой, ӕмӕ сӕ Йегъовӕ бирӕ арфӕдзинӕдтӕй схайджын кодта. Ды дӕр, уыдон куыд бакодтой, афтӕ куы бакӕнай, уӕд хуыздӕр бамбардзынӕ, цавӕр адӕймӕгтӕ уыдысты ӕмӕ сӕм цы диссаджы уырнындзинад уыди, уый.

¹² Науӕд та дын, зӕгъӕм, де ’мбалыл кӕй нымайыс, уый фыдӕнӕн митӕ кӕны, ӕмӕ уый тыххӕй дӕхимӕ ныхъхъуыстай ӕмӕ дӕ ӕмбырдтӕм цӕуын дӕр нал фӕнды. Ахӕм уавӕры хорз нӕ уаид Аннӕйы цӕвиттоныл ахъуыды кӕнын? Кӕд ын Феннанӕ фыдӕнӕн митӕ кодта, уӕддӕр уый тыххӕй афтӕ нӕ загъта, ӕз Йегъовӕйӕн нал лӕггад кӕндзынӕн, зӕгъгӕ. Уӕдӕ дын Аннӕйы хабар баххуыс кӕндзӕн, цӕмӕй уыцы уавӕры, раст куыд у, афтӕ бакӕнай. Ӕмӕ дӕм афтӕ кӕсдзӕн, цыма Аннӕ дӕ зынаргъ ӕмбал у. Йе та, зӕгъӕм, дӕхи зӕххӕй сисинагыл дӕр нӕ нымайыс ӕмӕ дӕхимӕ ныхъхъуыстай. Уыцы уавӕры хорз уаид, Илийа йӕхимӕ куыд ныхъхъуыста ӕмӕ йӕ Йегъовӕ куыд бафидар кодта, ууыл ахъуыды кӕнын. Цы зӕгъӕн ис нӕ кӕстӕртӕй та? Скъолайы кӕимӕ ахуыр кӕнынц, уыдон сын алы ӕвзӕр ӕмӕ хӕлд митӕ фӕаразын кӕнынц. Кӕддӕр ахӕм уавӕры уыди гыццыл Самуил дӕр. Цатыры Илийы фырттӕ цы чъизи митӕ кодтой ӕмӕ Самуил та йӕхи куыд дардта, уый тыххӕй куы кӕсат, уӕд уын Самуил афтӕ адджын суыдзӕн, цыма уӕ хорз ӕмбал у.

13. Хуыцауы рагон лӕггадгӕнджыты уырнындзинад куы фӕзмай, уӕд уый ууыл дзурӕг уыдзӕн, ӕмӕ дӕхи уырнындзинадӕн Йегъовӕйы цӕсты аргъ нӕй?

¹³ Фӕлӕ, чи зоны, исчи зӕгъа: «Иннӕты уырнындзинад куы фӕзмон, уӕд ма мӕхи уырнындзинадӕн Йегъовӕйы цӕсты исты аргъ уыдзӕн?» Фӕлӕ афтӕ хъуыды кӕнын раст нӕу. Йегъовӕ нын йӕхӕдӕг дзуры, цӕмӕй, йӕ уырнындзинад фидар кӕмӕн у, уыдоны фӕзмӕм (1 Кор. 4:16; 11:1; 2 Фес. 3:7, 9). Стӕй, ацы чиныджы цы адӕмы тыххӕй цӕуы дзырд, уыдонӕй чидӕртӕ сӕхӕдӕг дӕр фӕзмыдтой, сӕ размӕ чи цард, уыцы иузӕрдион лӕггадгӕнджыты. Зӕгъӕм, ацы чиныджы 17 сӕр ахуыр кӕнгӕйӕ фендзыстӕм, Марийӕ Йегъовӕмӕ кувгӕйӕ Аннӕйы ныхӕстӕ кӕй ӕрхаста. Афтӕмӕй Марийӕ равдыста, Аннӕйы йӕхицӕн фӕзминагыл кӕй нымадта. Цымӕ уый ууыл дзурӕг у, ӕмӕ Марийӕйы уырнындзинад афтӕ фидар нӕ уыд? Кӕцӕй! Аннӕйы цардыл хъуыды кӕнгӕйӕ Марийӕйӕн йӕ уырнындзинад афтӕ фидар сси, ӕмӕ уый фӕрцы Йегъовӕ Хуыцауы раз йӕхицӕн скодта хорз ном.

14, 15. Ацы чиныг куыд арӕзт у ӕмӕ дзы куыд ис пайда кӕнӕн?

¹⁴ Ацы чиныджы фӕрцы дӕ бон уыдзӕн дӕ уырнындзинад ноджы тынгдӕр фидар кӕнын. Чиныджы сӕртӕ ист сты, 2008 азӕй 2013 азмӕ «Хъахъхъӕнӕн мӕсыджы» рубрикӕйы, «Сӕ уырнындзинадӕй сты фӕзминаг», зӕгъгӕ, цы статьятӕ уыди, уыдонӕй. Фӕлӕ дзы ногӕй дӕр цыдӕртӕ ис. Цӕмӕй ӕрмӕгыл ныхас кӕнын ӕнцондӕр уа, уый тыххӕй алы сӕры дӕр бафтыдтой фарстатӕ. Уыцы фарстатӕ нын ӕххуыс кӕндзысты, ӕрмӕгӕй царды куыд ис спайда кӕнӕн, ууыл ахъуыды кӕнынӕн дӕр. Стӕй ацы чиныгӕн скодтой, хабӕрттӕ бӕстон ӕвдыст кӕм цӕуынц, бирӕ ахӕм рӕсугъд нывтӕ. Статьяты цы нывтӕ уыди, уыдон та фестырдӕр кодтой ӕмӕ сӕ фӕаивдӕр кодтой. Уымӕй уӕлдай ма дзы ис, чи кӕд цард, уый ӕвдисӕг схемӕ ӕмӕ картӕтӕ. Ацы чиныгӕн, «Сӕ уырнындзинад сын фӕзмут», зӕгъгӕ, йӕ нысан у, цӕмӕй йӕ адӕймаг йӕхӕдӕг дӕр, стӕй бинонтӕ дӕр иумӕ ахуыр кӕной. Ахуыр ма йӕ кӕндзыстӕм ӕмбырды дӕр. Стӕй ма, чи зоны, бирӕ бинонты бафӕнда ацы диссаджы чиныг иумӕ хъӕрӕй кӕсын дӕр.

¹⁵ Уӕдӕ дын ацы чиныг стыр ӕххуыс фӕуӕд, цӕмӕй Йегъовӕйы рагон иузӕрдион лӕггадгӕнджыты уырнындзинад ноджы хуыздӕр фӕзмай. Ӕмӕ ацы чиныджы фӕрцы дӕ уырнындзинад ноджы тынгдӕр цы бафидар уа ӕмӕ дӕ уӕларвон Фыд Йегъовӕмӕ ноджы тынгдӕр цы баввахс уай, уыцы арфӕ дӕ уӕд!