Ӕцӕгад дӕхи бакодтай?

«Фӕивут уӕ зондахаст, цӕмӕй уӕ бон уа бӕлвырд кӕнын, Хуыцауы хорз, зӕрдӕмӕдзӕугӕ ӕмӕ ӕххӕст фӕндон цы у, уый» (РОМӔГТӔМ 12:2, НД).

1, 2. Ӕцӕг чырыстонӕн абон ӕнцон цӕуылнӕ у?

ӔЦӔГ чырыстонӕн ацы фӕстаг бонты — «уӕззау рӕстӕджыты» — ӕнцон нӕу (2 Тимофеймӕ 3:1). Фӕлӕ мах зонӕм, чырыстон Йесойау дунейыл уӕлахиз кӕй хъуамӕ кӕна, уый дӕр (1 Иоанны 5:4). Ӕрхъуыды кӕнӕм, чырыстон фӕндаджы тыххӕй Йесо цы загъта: «Цӕут уынгӕг дуарыл; уымӕн ӕмӕ уӕрӕх дуар ӕмӕ фӕтӕн фӕндаг кӕнынц сӕфтмӕ, ӕмӕ бирӕтӕ уыдоныл цӕуынц; уымӕн ӕмӕ уынгӕг дуар ӕмӕ нарӕг фӕндаг кӕнынц цардмӕ, ӕмӕ уыдоны бирӕтӕ нӕ арынц». Иннӕ ран та загъта: «Кӕд искӕйы фӕнды цӕуын Мӕ фӕстӕ, дӕхицӕй аздӕх ӕмӕ райс дӕ дзуар [«хъизӕмӕртты цӕджындз», НД], ӕмӕ рацу Мӕ фӕстӕ» (Матфейы 7:13, 14; Лукайы 9:23).

² Иугӕр адӕймаг царды нарӕг фӕндагыл слӕууыд, уӕд ӕй уыцы фӕндагыл цӕуынӕн ӕдзухдӕр хъӕуы тох кӕнын. Цӕмӕн? Уымӕн ӕмӕ Хуыцауӕн нывонддзырд куы радтам ӕмӕ донаргъуыд куы райстам, уӕдӕй фӕстӕмӕ Сайтан нӕ ныхмӕ нывӕндын райдайы йӕ зынрахатӕн хин кӕнӕ мӕнгард митӕ (Ефесӕгтӕм 6:11). Хӕйрӕг нын зоны нӕ лӕмӕгъ бынӕттӕ ӕмӕ нӕ хъӕндзинӕдтӕ ӕмӕ уыдоны уылты архайы нӕ уырнындзинад фӕцудын кӕныныл. Уӕвгӕ, кӕд Йесойы басӕттыныл архайдта, уӕд мах ӕнцад ныууадздзӕн? (Матфейы 4:1—11).

Сайтаны хинмитӕ

3. Сайтан Евӕйы дызӕрдыггаг хъуыдытыл куыд бафтыдта?

³ Сайтан мах дызӕрдыгдзинӕдты баппарынӕн цы къӕппӕджытӕй пайда кӕны, уыдонӕй иу у нӕ зонд. Уый уыны, нӕ духовон хӕцӕнгӕрзтӕй лӕмӕгъ цы у, уый. Иууыл сӕрӕй Евӕйы асайынӕн дӕр уымӕй спайда кодта, куы йӕ бафарста: «Ӕцӕг загъта Хуыцау, дыргъдоны уын алы бӕласӕй кӕй нӕй хӕрыны бар?» (Уӕвынад 3:1). Ӕндӕр ныхасӕй, Сайтан загъта: «Куыд ис уый гӕнӕн, ӕмӕ Хуыцау афтӕ бакодтаид сымахимӕ? Кӕд уӕ мыййаг исты хорздзинад сусӕг кӕны? Ӕ-ӕ, Хуыцау зоны, алы бон дӕр уыцы бӕласӕй куы хӕрат, уӕд уӕ цӕстытӕ кӕй бакӕндзысты ӕмӕ сымах дӕр Хуыцауы хуызӕн кӕй суыдзыстут, уыйау хорз ӕмӕ ӕвзӕр кӕй зондзыстут!» Сайтан Евӕйы зӕрдӕйы ныппӕрста дызӕрдыгдзинады къӕм, тауинаг зӕххы куыд ныппарай, афтӕ, ӕмӕ уый фӕстӕ ӕнхъӕлмӕ каст йӕ сырӕзынмӕ (Уӕвынад 3:5).

4. Цавӕр дызӕрдыггаг хъуыдытӕ нӕм гӕнӕн ис, ӕмӕ фӕзына?

⁴ Уыцы мадзалӕй Сайтан абон та куыд пайда кӕны? Библи алыбон дӕр куы нӕ кӕсӕм ӕмӕ йӕ нӕхӕдӕг куы нӕ ахуыр кӕнӕм, Хуыцаумӕ ӕдзухдӕр зӕрдӕбынӕй куы нӕ кувӕм, чырыстон лӕггаддзинад ӕмӕ нын фембӕлдтӕм уӕлӕнгай ахаст куы уа, уӕд нӕ чифӕндыдӕр ӕнцонтӕй бафтаудзӕн дызӕрдыггаг хъуыдытыл. Зӕгъӕм: кӕцӕй йӕ зонӕм, ӕмӕ ай Йесо цы ӕцӕгад амыдта, уый у? Абон ӕцӕгдӕр фӕстаг бонтӕ сты? Мӕнӕ XXI ӕнусы куы цӕрӕм. Ӕцӕгдӕр, Армагеддон къӕсӕрыл ис, ӕви йӕм нырма бирӕ хъӕуы? Ахӕм дызӕрдыггаг хъуыдытӕ нӕм куы фӕзына, уӕд сӕ куыд иуварс кӕндзыстӕм?

5, 6. Дызӕрдыггаг хъуыдытӕ нӕм куы фӕзына, уӕд цы хъуамӕ аразӕм?

⁵ Уый фӕдыл хорз уынаффӕ радта Иаков: «Кӕд сымахӕй искӕмӕ нӕ фаг кӕны зонд, уадз курӕд Хуыцауӕй, ӕппӕтӕн хӕларӕй ӕмӕ ӕнӕуайдзӕфӕй дӕттӕгӕй,— ӕмӕ йын лӕвӕрд уыдзӕн. Фӕлӕ уадз курӕд уырнгӕйӕ, гыццылдӕр дызӕрдыг нӕ кӕнгӕйӕ, дызӕрдыг чи кӕны, уый дымгӕ кӕй сисы ӕмӕ ахӕлиу кӕны, уыцы денджызы уылӕны хуызӕн у: уадз ахӕм адӕймаг Хицауӕй исты райсын ӕнхъӕлмӕ ма кӕсӕд, дыууӕрдӕм хъуыдыгӕнӕг адӕймаг фидар нӕу йӕ ӕппӕт фӕндӕгтыл» (Иаковы 1:5—8).

⁶ Фӕлӕ куыд хъуамӕ аразӕм уый? Мах хъуамӕ куывды мидӕг «Хуыцауӕй курӕм», цӕмӕй Библи нӕхӕдӕг куы фӕахуыр кӕнӕм, уӕд ӕй ӕмбарынхъом уӕм, цы базонӕм, уый нын нӕ уырнындзинад фидар кӕна, цы фарстытӕ кӕнӕ нӕм цы дызӕрдыггаг хъуыдытӕ сӕвзӕры, уыдонӕн дзуапп арӕм. Ӕххуыс ма курӕн ис, уырнындзинады фидар чи у, уыдонӕй. Уыимӕ мисхал дӕр дызӕрдыг хъуамӕ ма кӕнӕм, Иегъовӕ нын ӕнӕмӕнг кӕй ратдзӕн, цы хъуаг стӕм, уый. Иаков ма ноджыдӕр загъта: «Басӕттут Хуыцауӕн [«Хуыцауы уазӕг уӕхи бакӕнут», НФ]; хӕйрӕгӕн йӕ ныхмӕ слӕуут ӕмӕ сымахӕй алидздзӕн; ӕрхӕстӕг ут Хуыцаумӕ, ӕмӕ уӕм ӕрхӕстӕг уыдзӕн». Ӕцӕгдӕр, ахуыр ӕмӕ куывды уылты Хуыцаумӕ куыд хӕстӕгдӕр кӕнӕм, афтӕ нӕм цы дызӕрдыггаг хъуыдытӕ уа, уыдон сӕфдзысты (Иаковы 4:7, 8).

7, 8. Йесо цы кувынады тыххӕй дзырдта, уый сӕйраджыдӕр цавӕр хъуыддӕгтӕй хицӕн кӕны ӕмӕ кӕмӕй ис зӕгъӕн, уыцы хъуыддӕгтӕ кӕнынц, зӕгъгӕ?

⁷ Зӕгъӕм куы сӕвзӕра ахӕм фарста: кӕцӕй йӕ зонӕм, ӕмӕ Йесо куыд амыдта, афтӕ лӕггад кӕнӕм Хуыцауӕн? Цӕмӕй ацы фарстӕн дзуапп ссарӕм, уый тыххӕй цӕуыл хъӕуы ахъуыды кӕнын? Библи куыд дзуры, афтӕмӕй ӕцӕг чырыстӕттӕ хъуамӕ кӕрӕдзи уарзой (Иоанны 13:34, 35). Хъуамӕ бӕрзонд кӕной Хуыцауы ном, Иегъовӕ (Исай 12:4, 5; Матфейы 6:9). Ӕмӕ хъуамӕ зоной, уыцы ном цы нысан кӕны, уый (Рацыд 3:15; Иоанны 17:26).

⁸ Хуыцауы ӕцӕг кувджытӕ ма хицӕн кӕнынц, йӕ Ныхас Библийӕн ын кӕй аргъ кӕнынц, уымӕй дӕр. Ӕрмӕстдӕр нын уыцы чиныг ӕргом кӕны, Хуыцау чи у ӕмӕ йын цавӕр фӕндӕттӕ ис, уый (Иоанны 17:17; 2 Тимофеймӕ 3:16, 17). Уымӕй дарддӕр ӕцӕг чырыстӕттӕ хъусын кӕнынц, ӕрмӕстдӕр Хуыцауы Паддзахадӕн кӕй у йӕ бон адӕмы дзӕнӕты зӕххыл ӕнусон цардмӕ ӕркӕнын, уый (Маркы 13:10; Раргомад 21:1—4). Уыдон иуварс лӕууынц ацы дунейы чъизи политикон хъуыддӕгтӕй ӕмӕ йе ’нӕгъдау митӕй (Иоанны 15:19; Иаковы 1:27; 4:4). Кӕмӕй ис абон зӕгъӕн, ӕмӕ ӕппӕт уыцы хъуыддӕгтӕ кӕнынц? Цард куыд ӕвдисы, афтӕмӕй ӕрмӕстдӕр Иегъовӕйы Ӕвдисӕнтӕй.

Дызӕрдыггаг хъуыдытӕ ныл куы ӕртыхсой, уӕд цы гӕнгӕ у?

9, 10. Дӕргъвӕтин рӕстӕджы дӕргъы нӕ цы дызӕрдыггаг хъуыдытӕ тыхсын кӕной, уыдон куыд у нӕ бон иуварс кӕнын?

⁹ Зӕгъӕм фӕхатыдыстӕм, нӕ зӕрдӕйы дызӕрдыггаг хъуыдытӕ кӕй фӕзынд. Цы хъуамӕ аразӕм уӕд? Зондджын паддзах Соломон дӕтты дзуапп: «Мӕ фырт, кӕд мын мӕ ныхӕстӕ райсай ӕмӕ мын мӕ фӕдзӕхстытӕн дӕ риуы арф бынат скӕнай, кӕд дӕ хъус лӕмбынӕг дарай зондмӕ ӕмӕ де ’ргом раздахай ӕмбаргӕдзинадмӕ; кӕд ӕмбарынадмӕ сидай ӕмӕ ӕмбаргӕдзинадмӕ хъӕр кӕнай, ӕвзистау ӕй кӕд зӕрдиагӕй агурай ӕмӕ йӕ ӕмбӕхст хӕзнатау ссарынмӕ тырнай, уӕд базондзынӕ, Иегъовӕйы тас цы у, уый ӕмӕ ссардзынӕ Хуыцауы тыххӕй раст зонындзинӕдтӕ» (Фӕсномыг ныхӕстӕ 2:1—5).

¹⁰ Уый диссаджы хъуыды нӕу? Кӕд Хуыцауы зондмӕ ӕнӕзивӕгӕй хъусӕм, уӕд «ссардзыстӕм Хуыцауы тыххӕй раст зонындзинӕдтӕ». О, Дунескӕнӕг Иунӕг Стыр Хуыцау цы дзуры, уымӕ куы хъусӕм ӕмӕ йын йӕ ныхӕстӕ хӕзнатау куы ӕмбырд кӕнӕм, уӕд райсдзыстӕм уый тыххӕй зонындзинӕдтӕ. Уый нысан кӕны, кувгӕйӕ ӕмӕ Библи сӕрмагондӕй ахуыр кӕнгӕйӕ, Иегъовӕмӕ нӕхи кӕй хъуамӕ хӕстӕг кӕнӕм. Йӕ Ныхасы цы хӕзнатӕ ис ӕмбӕхст, уыдон куы арӕм, уӕд уый фӕсурдзӕн цыфӕнды дызӕрдыгдзинӕдтӕ дӕр ӕмӕ нӕ бон уыдзӕн ӕцӕгады рухс уынын.

11. Елисейы фӕсдзӕуин цӕмӕн сдызӕрдыг?

¹¹ Хуыцауы лӕггадгӕнӕг тӕрсын ӕмӕ дызӕрдыг кӕнын куы райдайа, уӕд куывд куыд ӕххуыс кӕны, уый ирд ӕвдыст цӕуы 4 Паддзахӕдты 6:11—18-ӕм стихты. Елисейы фӕсдзӕуинӕн йӕ алыварс цы цыд, уымӕ нӕ каст уырнындзинады цӕстӕй. Йӕ бон никуыд уыд бамбарын, Хуыцауы пехуымпарыл сириаг ӕфсад куы ӕрхъула кодта, уӕд ӕй уӕларвон тыхтӕ куыд хъахъхъӕдтой, уый. Фӕсдзӕуин фыртӕсӕй ныхъхъӕр кодта: «Ӕллӕх, мӕ хицау! Цы ма кӕндзыстӕм?» Цавӕр уыд Елисейы дзуапп? «Ма тӕрс, немӕ чи ис, уыдон фылдӕр сты, семӕ чи ис, уыдонӕй». Фӕлӕ фӕсдзӕуин ууыл куыд баууӕндыдаид? Уӕларвон тыхты уынын йӕ бон нӕ уыд.

12. а) Елисейы фӕсдзӕуины дызӕрдыггаг хъуыдытӕ куыд ӕрбайсӕфтысты? ӕ) Цы дызӕрдыггаг хъуыдытӕ нӕм фӕзыны, уыдон нӕ бон куыд у иуварс кӕнын?

¹² «Елисей кувын райдыдта: „О Иегъовӕ, курын дӕ, байгом ын кӕн йӕ цӕстытӕ, цӕмӕй фена“. Уыцы тӕккӕ Иегъовӕ байгом кодта фӕсдзӕуины цӕстытӕ ӕмӕ федта диссаг: Елисейы алыварс уӕлвӕзтӕ нал зындысты бӕхтӕ ӕмӕ зынгкалгӕ хӕстон уӕрдӕттӕй». Иегъовӕ уый тыххӕй афтӕ бакодта, цӕмӕй фӕсдзӕуин федтаид, Елисейы цы уӕларвон ӕфсӕдтӕ хъахъхъӕдтой, уый. О, фӕлӕ абон махӕн нӕ бон нӕу Хуыцауӕй ахӕм ӕххуыс райсын. Ӕмӕ нӕ хъӕугӕ дӕр нӕ кӕны. Ахъуыды ма кӕн, пехуымпары фӕсдзӕуинмӕ нӕ уыд Библи ӕнӕхъӕнӕй, цӕмӕй йӕ ахуыр кодтаид ӕмӕ уый руаджы фидар кодтаид йӕ уырнындзинад. Махӕн та ис. Куыд ӕмбӕлы, афтӕ дзы куы пайда кӕнӕм, уӕд махӕн дӕр нӕ уырнындзинад фидар кӕндзӕн. Зӕгъӕм, нӕ бон у, Иегъовӕ йӕ уӕларвон паддзахбадӕныл кӕй бады, уый тыххӕй кӕм цӕуы дзырд, уыцы скъуыддзӕгтыл хъуыды кӕнын. Уӕд нӕ дызӕрдыг кӕндзыстӕм, Иегъовӕ йӕ уӕларвон организацийы руаджы йӕ зӕххон лӕггадгӕнджытӕ ӕгас дунейы дӕр цы ахуырадон куыст уадзынц, уымӕн кӕй ӕххуыс кӕны, ууыл (Исай 6:1—4; Иезекиль 1:4—28; Данелы 7:9, 10; Раргомад 4:1—11; 14:6, 7).

Сайтаны мӕнгард митӕй дӕхи хиз!

13. Сайтан цавӕр мадзӕлттӕй пайда кӕны, цӕмӕй ӕцӕгады фӕндагӕй ахауӕм?

¹³ Цӕмӕй нӕ уырнындзинад фӕцуда ӕмӕ ӕцӕгады фӕндагӕй ахауӕм, уый тыххӕй ма Сайтан ноджыдӕр цӕмӕй пайда кӕны? Зӕгъӕм, ӕнӕгъдаудзинад йӕ алы хуызты дӕр. Абон дуне ӕгасӕй дӕр бафтыд ӕнӕфсарм ӕмӕ чъизи митыл. Цыфӕндыйӕ дӕр йӕ рӕстӕг йӕ зӕрдӕйы дзӕбӕхӕн арвитын кӕй фӕнды, уыдонмӕ монцуарзт кӕнӕ иу ӕхсӕвы уарзт кӕй хонынц, уый диссаг нал кӕсы, ӕвзӕрӕй дзы ницы уынынц. Кинонывты, телевизор ӕмӕ видеойы ӕдзух ӕвдыст цӕуы чъизи митӕ. Арӕхӕй-арӕхдӕр ӕмбӕлы порнографи, уӕлдайдӕр та Интернеты. Порнографи кӕй цымыдис кӕны, уыдонӕн та ӕнӕфӕрӕдийгӕ нӕй (Иаковы 1:13—15; 1 Фессалоникӕгтӕм 4:3—5).

14. Иуӕй-иу чырыстӕттӕ Сайтаны мӕнгард миты амӕттаг цӕмӕн фесты?

¹⁴ Чырыстӕттӕй иуӕй-иутӕ сӕхи уый онг ӕруагътой, ӕмӕ кӕсын райдыдтой, фыццаг бакастӕй афтӕ кӕмӕй нӕй зӕгъӕн, порнографи у, зӕгъгӕ, йе та цъаммар митӕ бынтон ӕргом кӕм ӕвдисынц, ахӕм нывтӕм, ӕмӕ афтӕмӕй сӕ зонд дӕр ӕмӕ сӕ зӕрдӕ дӕр счъизи кодтой. Сӕхи сӕхӕдӕг баппӕрстой Сайтаны цыбӕйлаг къӕппӕджы. Арӕх уый тыххӕй сӕ уырнындзинад наусӕфт баййафы. Ахӕм адӕймӕгтӕ «фыддзинадмӕ сабитӕ» нал вӕййынц. Уыдон не свӕййынц «зондӕй... хъомылтӕ» (НФ) (1 Коринфӕгтӕм 14:20). Алы аз дӕр мингай чырыстӕттӕн афтӕ зынаргъ слӕууы, Хуыцауы Ныхасы принциптӕ ӕмӕ домӕнтыл ӕдзухдӕр кӕй нӕ фӕхъуыды кӕнынц, уый. Уыдон ферох вӕййы, «Хуыцауы ӕппӕт хӕцӕнгӕрзтӕ» дӕр скӕнын ӕмӕ сӕ ӕдзухдӕр цӕттӕйӕ дарын кӕй хъӕуы, уый (Ефесӕгтӕм 6:10—13; Колоссӕгтӕм 3:5—10; 1 Тимофеймӕ 1:18, 19).

Нӕ хӕзна

15. Иуӕй-иутӕ сӕ духовон бынӕн цӕуылнӕ аргъ кӕнынц?

¹⁵ «Ӕцӕгад базондзыстут, ӕмӕ уӕ ӕцӕгад ссӕрибар кӕндзӕни», — загъта Йесо (Иоанны 8:32, НФ). Ӕвдисӕнтӕн сӕ фылдӕр ныууадзынц сӕ раздӕры цардыуаг ӕмӕ цы динимӕ уыдысты баст, уый. Уымӕ гӕсгӕ тынгдӕр аргъ кӕнынц, ӕцӕгад йемӕ цы сӕрибардзинад хӕссы, уымӕн. Фӕлӕ сӕ гыццылӕй фӕстӕмӕ ӕцӕгады чи хъомыл кӕны, уыцы ӕвзонг лӕппутӕ ӕмӕ чызджытӕй иуӕй-иутӕ нӕ аргъ кӕнынц сӕ духовон бынӕн. Уыдон никуыдӕр мӕнг дины уыдысты, никуыдӕр ацы ӕхцондзинӕдтыл ӕмӕ наркотиктыл мард, ӕнӕгъдау дунейы, ӕмӕ сӕм уымӕ гӕсгӕ афтӕ кӕсы, цыма нӕ духовон дзӕнӕт ӕмӕ Сайтаны хӕлд дунейы ’хсӕн ницы хицӕндзинад ис. Иуӕй-иутӕ дзы афтӕ сцыбӕл сты, ӕмӕ дунейы маргӕй фӕлваргӕ дӕр акодтой, цӕмӕй федтаиккой, сӕхи цӕмӕй цух кӕнынц, уый (1 Иоанны 2:15—17; Раргомад 18:1—5).

16. а) Цавӕр фарстытӕ у нӕ бон нӕхимӕ радтын? ӕ) Цӕуыл ахуыр кӕнӕм, уый нӕ цӕмӕ разӕнгард кӕны?

¹⁶ Цымӕ рис ӕмӕ хъизӕмар куыд зын сты, уый бамбарынӕн ӕнӕмӕнг хъӕуы ӕнгуылдзтӕ басудзын? Цымӕ иннӕтыл цы бӕллӕхтӕ ӕрцыд, уымӕй нӕй зонд базонӕн? Цымӕ цыдӕр ӕвзӕр кӕй у, уый бамбарынӕн ӕнӕмӕнг хъӕуы ацы дунейы «цъыфы» хи сӕвдулын? (2 Петры 2:20—22). Фыццаг ӕнусы Сайтаны дунейӕ чи ӕрбацыд, уыцы чырыстӕттӕн апостол Петр сӕ зӕрдыл ӕрлӕууын кодта: «Ӕгъгъӕд у, ӕвӕдза, фыццаг рӕстӕджыты сымах уӕ цард кӕй ӕрвыстат муртаччыты зондмӕ гӕсгӕ кӕнгӕйӕ ӕбуалгъ митӕ (нӕлгоймӕгтимӕ ӕмӕ хайуантимӕ хуыссын, ӕмӕ чъизи фӕндтӕм), расыгдзинад, фырхӕрд ӕмӕ фырнозт, ӕмӕ нӕфӕтчиаг кувын гуымирытӕн». Кӕй зӕгъын ӕй хъӕуы, цард куыд хӕлд ӕмӕ чъизи у, уый бамбарынӕн нӕ ацы дунейы «ӕнӕфсарм митӕ» бафӕлварын ницӕмӕн хъӕуы (1 Петры 4:3, 4, НФ). Уый бӕсты библион ахуырады артдзӕстыты, нӕ Паддзахады залты, мах ахуыр кӕнӕм Иегъовӕйы хӕрзӕгъдау домӕнтыл. Уыдон нӕ разӕнгард кӕнынц, ӕцӕгады фӕндагыл кӕй стӕм, уый нӕхицӕн бӕлвырд кӕнынмӕ ӕмӕ йӕ нӕхи бакӕнынмӕ (Йесо Навин 1:8; Ромӕгтӕм 12:1, 2; 2 Тимофеймӕ 3:14—17).

Ӕрмӕст ном нӕ хӕссӕм

17. Куыд у нӕ бон, ӕмӕ Иегъовӕйӕн ӕнувыд Ӕвдисӕнтӕ уӕм?

¹⁷ Кӕд ӕмӕ ӕцӕгад нӕхи бакодтам, уӕд алы ран дӕр агурдзыстӕм фадат, цӕмӕй йӕ иннӕтӕн дзурӕм. Уый нӕ нысан кӕны, ӕмӕ адӕймаджы хъусын куы нӕ фӕнда, уӕддӕр ын кӕй хъуамӕ дзурӕм (Матфейы 7:6). Нӕ, ӕрмӕст мах ӕфсӕрмы нӕ кӕндзыстӕм, Иегъовӕйы Ӕвдисӕнтӕ кӕй стӕм, уый тыххӕй дзурын. Адӕймаджы иу-гыццыл дӕр куы фӕнда Хуыцауы тыххӕй базонын, ӕнӕхин фарстытӕ куы дӕтта кӕнӕ Библийы бындурыл уагъд публикацитӕ куы иса, уӕд хъуамӕ зивӕг ма кӕнӕм ӕмӕ цӕттӕ уӕм нӕ ныфсы тыххӕй йын радзурынмӕ. Уый тыххӕй та, хӕдзары уӕм, куысты уӕм, скъолайы уӕм, уынджы уӕм ӕви искуы нӕ фӕллад уадзӕм, кӕмфӕнды дӕр немӕ хъуамӕ уа иу цалдӕр журналы ӕмӕ трактаты (1 Петры 3:15).

18. Чырыстӕттӕ кӕй стӕм, уый куы нӕ сусӕг кӕнӕм, уӕд нын цы пайда хӕсдзӕн?

¹⁸ Чырыстӕттӕ кӕй стӕм, уый куы никӕмӕй сусӕг кӕнӕм, уӕд тыхджындӕр уыдзыстӕм Сайтаны хинмиты ныхмӕ. Гуырӕнбонтӕ, дзуарыбонтӕ кӕнӕ ӕндӕр бӕрӕгбӕттӕ куы вӕййы, уӕд ӕфсымӕртӕ ӕмӕ хотимӕ чи кусы, уыдон арӕх сӕхӕдӕг фӕдзурынц: «Уый Иегъовӕйы Ӕвдисӕн у, ныууадзут ӕй». Уыимӕ ма арӕх нӕ цуры адӕмӕн сӕ намыс уый бар нӕ фӕдӕтты, цӕмӕй хӕлд, ӕнӕфсарм худӕджы ныхӕстӕ дзурой. Уыйадыл, чырыстон принциптыл фидарӕй кӕй хӕцӕм, уый нӕ алыварс адӕм куы зоной, уӕд нын уый царды хӕсдзӕн стыр пайда. Уый тыххӕй фыста апостол Петр дӕр: «Ӕмӕ уын фыддзинад чи ракӕндзӕн, сымах хорздзинадыл ӕнувыд куы уат уӕд? Фӕлӕ кӕд ӕмӕ фыдӕбон кӕнут рӕстдзинады тыххӕй, уӕд сымах тӕхудиаг стут» (1 Петры 3:13, 14).

19. Фӕстаг бонты тӕккӕ кӕроны кӕй цӕрӕм, уый цӕмӕй зонӕм?

¹⁹ Кӕд ӕцӕгад нӕхи бакодтам, уӕд нӕ дызӕрдыг кӕндзыстӕм, ӕцӕгдӕр ацы цардӕвӕрды фӕстаг бонты кӕй цӕрӕм, ууыл. Мах зондзыстӕм, Библийы пехуымпарӕдтӕй бирӕтӕ кӕронмӕ нӕ рӕстӕджы кӕй ӕххӕст кӕнынц, уыйa. Павел фӕдзӕхста, зӕгъгӕ, «фӕстаг бонты ӕрцӕудзӕн уӕззау рӕстӕджытӕ», ӕмӕ уымӕн ирд бӕлвыргӕнӕн сты ивгъуыд ӕнусы ӕвирхъау цаутӕ (2 Тимофеймӕ 3:1—5; Маркы 13:3—37). Ӕрӕджы иу газеты рацыд статья, цыран XX ӕнусы тыххӕй загъдӕуыд, зӕгъгӕ, «уый адӕмы зӕрдӕты ныууадздзӕн рагон варвартау арф фӕд». Статьяйы дзырдӕуыд: «1999 аз уыд ӕппӕты ӕвирхъаудӕр ӕнусы дыккаг ӕмбисы иууыл ӕвирхъаудӕр аз».

20. Ныртӕккӕ цӕй рӕстӕг у?

²⁰ Ныртӕккӕ дыууӕрдӕм кӕныны рӕстӕг нӕу. Нӕхи цӕстӕй уынӕм, ӕгас дунейы ӕппӕт адӕмтӕн дӕр ӕвдисӕндзинадӕн цы библион ахуырадон куыст уагъд цӕуы, уымӕн Иегъовӕ кӕй арфӕ кӕны, уый (Матфейы 24:14). Цӕй уӕдӕ ӕцӕгад дӕхи бакӕн ӕмӕ йӕ иннӕтӕн дӕр хъусын кӕн. Де ’нусон фидӕн баст у, абон цы аразыс, ууыл. Нӕ къухтӕ нӕ дзыппыты куы нывӕрӕм, уӕд нын Иегъовӕ куыд хъуамӕ арфӕ кӕна (Лукайы 9:62). Абон уый рӕстӕг у, цӕмӕй «уӕм фидар, ӕнӕфӕцудгӕ, ӕдзухдӕр ӕнтыстджын Хицауы хъуыддаджы, зонгӕйӕ нӕ фыдӕбон дзӕгъӕлы кӕй нӕу Хицауы раз» (1 Коринфӕгтӕм 15:58).

[Фиппаинаг]

Хъуыды ма кӕныс?

• Куыд у нӕ бон дызӕрдыггаг хъуыдытӕ иуварс кӕнын?

• Елисейы фӕсдзӕуиныл цы ӕрцыд, уый мах цӕуыл ахуыр кӕны?

• Ӕппынӕдзух дӕр нӕхи цавӕр чъизи ӕмӕ ӕнӕфсарм митӕй хъуамӕ хизӕм?

• Иегъовӕйы Ӕвдисӕнтӕ кӕй стӕм, уый цӕуылнӕ хъуамӕ сусӕг кӕнӕм?

[Ныв 19 фарсыл]

Елисейы фӕсдзӕуины дызӕрдыгдзинӕдтӕ ӕрбайсӕфтысты цӕстылуайӕны руаджы.

[Нывтӕ 20 фарсыл]

Ӕдзухдӕр Библи куы ахуыр кӕнӕм ӕмӕ Иегъовӕмӕ куы кувӕм, уӕд нӕ зӕрдӕйы дызӕрдыггаг хъуыдытӕн бынат нӕ уыдзӕн.

[Ныв 21 фарсыл]

Иегъовӕйы хӕрзӕгъдау домӕнтыл ахуыр кӕнӕм Паддзахады залты, куыд ацы зал Бенины.