Цымӕ Хуыцау зыдта, Адам ӕмӕ Евӕ тӕригъӕд кӕй ракӕндзысты?

БИРӔТЫ тынг фӕнды ацы фарстайӕн дзуапп базонын. Дзырд ууыл куы фӕцӕуы, Хуыцау адӕмы зындзинӕдтӕм ӕнцад цӕмӕн кӕсы, уӕд ныхас ӕрцӕуы, фыццаг нӕлгоймаг ӕмӕ сылгоймаг Едемы цӕхӕрадоны тӕригъӕд кӕй ракодтой, уымӕ. Адӕм арӕх фӕзӕгъынц, Хуыцау алцыдӕр зоны, зӕгъгӕ. Уымӕ гӕсгӕ иуӕй-иутӕм афтӕ кӕсы, Хуыцау рагацау кӕй зыдта, Адам ӕмӕ Евӕ йӕ коммӕ кӕй нӕ бакӕсдзысты, уый.

Кӕд Хуыцау ӕцӕгдӕр рагацау зыдта, Адам ӕмӕ Евӕ кӕй фӕрӕдийдзысты, уӕд цымӕ уый цӕуыл дзурӕг уыдаид? Ууыл, ӕмӕ Хуыцаумӕ кӕй ис бирӕ ӕвзӕр миниуджытӕ – адӕмы кӕй нӕ уарзы, рӕстдзинад ӕм кӕй нӕй ӕмӕ хинӕйдзаг кӕй у. Иуӕй-иутӕ та, чи зоны, ахъуыды кӕниккой, зӕгъгӕ, кӕд Хуыцау рагацау зыдта, хабар афтӕ кӕй рауайдзӕн, уӕд фыццаг нӕлгоймаг ӕмӕ сылгоймаджы ахӕм фыдбылызы баппарын тынг ӕгъатыр ми уыд. Уӕд афтӕ уайы, ӕмӕ, адӕмы фӕзындӕй нырмӕ цы бӕллӕхтӕ цӕуы, уыдоны се ’ппӕты дӕр Хуыцау кӕй у аххосджын. Чидӕртӕ та, чи зоны, ахъуыды кодтаиккой, зӕгъгӕ, кӕд не Сфӕлдисӕг Адам ӕмӕ Евӕйы хабар рагацау зыдта, уӕд ӕй зондджын схонӕн нӕй.

Цымӕ Библи дӕр афтӕ зӕгъы, ӕмӕ Йегъовӕ ахӕм Хуыцау у? Цӕмӕй ацы фарстайӕн дзуапп базонӕм, уый тыххӕй ӕркӕсӕм Библимӕ – Йегъовӕ цы сфӕлдыста ӕмӕ йӕм цы миниуджытӕ ис, уый фӕдыл дзы цы фыст ис, уымӕ.

«Ӕппӕт дӕр уыд тынг хорз»

Хуыцау зӕххыл цы сфӕлдыста,– ӕрдзӕй райдай ӕмӕ фыццаг адӕймӕгтӕй фӕу,– уыдӕтты тыххӕй Райдианы чиныджы фыст ис: «Хуыцау йӕ цӕст ахаста, цыдӕриддӕр сфӕлдыста, ууыл, ӕмӕ ӕппӕт дӕр уыд тынг хорз» (Райдиан 1:31). Ӕмӕ ӕцӕгдӕр, Адам ӕмӕ Евӕ куыд конд уыдысты, уый уыди диссаг, стӕй сын цӕрынӕн дӕр хуыздӕр бынат ӕрхъуыды кӕнӕн нӕ уыд. Хуыцау фыццаг нӕлгоймаг ӕмӕ сылгоймаджы куыд сфӕлдыста, уымӕ ӕппындӕр ницы фау ӕрхӕссӕн уыд. Уӕдӕ сын Хуыцауы фӕдзӕхстытӕ зынӕххӕстгӕнӕн нӕ уыдысты. Библи куыд зӕгъы, афтӕмӕй сӕ Хуыцау сфӕлдыста йӕхимӕ гӕсгӕ (Райдиан 1:27). Уый афтӕ ӕмбаргӕ у, ӕмӕ хайджын уыдысты йӕ миниуджытӕй, зӕгъӕм, зондӕй, уарзондзинадӕй, стӕй сӕ бон уыд рӕстӕй архайын ӕмӕ хорздзинад аразын. Уыцы миниуджыты фӕрцы сӕ бон уыди раст уынаффӕтӕ хӕссын. Уыцы уынаффӕтӕ сӕхицӕн пайда хастаиккой, сӕ уӕларвон Фыдӕн та йӕ зӕрдӕ рухс кодтаиккой.

Йегъовӕ Адам ӕмӕ Евӕйы схайджын кодта сӕрибардзинадӕй, ома сӕхӕдӕг ӕвзӕрстой, алы хъуыддаджы дӕр куыд кодтаиккой, уый. Роботты хуызӕн нӕ уыдысты, ома афтӕ конд нӕ уыдысты, цӕмӕй, Йегъовӕйы зӕрдӕмӕ цы цӕуы, ӕрмӕстдӕр уый арӕзтаиккой. Ахъуыды-ма кӕнӕм ацы хъуыддагыл. Дӕ зӕрдӕмӕ тынгдӕр цы фӕцӕуид: исчи дын исты лӕвар ӕвӕндонӕй куы раттид ӕви дын ӕй зӕрдӕйӕ куы скӕнид? Афтӕ Хуыцауӕн дӕр ӕхсызгондӕр уыдаид, Адам ӕмӕ Евӕ йӕ коммӕ сыгъдӕгзӕрдӕйӕ куы кастаиккой. Йегъовӕ фыццаг нӕлгоймаг ӕмӕ сылгоймаджы сӕрибардзинадӕй кӕй схайджын кодта, уый фӕрцы сӕ бон уыд равдисын, йӕ коммӕ уый тыххӕй кӕй кӕсынц, ӕмӕ йӕ уарзгӕ кӕй кӕнынц (Дыккаг закъон 30:19, 20).

Хуыцау уарзы рӕстдзинад ӕмӕ раст тӕрхон ӕмӕ йӕм ис бирӕ хорздзинӕдтӕ

Библийӕ нӕ бон у базонын, Йегъовӕ цы миниуджыты хицау у, уый. Уыцы миниуджытӕ кӕмӕ ис, уыцы Хуыцауӕн ӕвзӕрдзинадимӕ иумӕйагӕй исты уа, уый гӕнӕн нӕй. Йегъовӕ «уарзы рӕстдзинад ӕмӕ раст тӕрхон»,– фыст ис Псалом 33:5 стихы. Уымӕ гӕсгӕ Иаковы чиныджы 1:13 стих дӕр зӕгъы: «Хуыцауы фыддзинадӕй бафӕлварӕн нӕй, ӕмӕ уый йӕхӕдӕг дӕр фыддзинадӕй никӕй фӕлвары». Йегъовӕ рӕстӕй кӕй архайы ӕмӕ адӕмы кӕй уарзы, уымӕ гӕсгӕ Адамы бафӕдзӕхста: «Цӕхӕрадоны алы бӕласӕй дӕр хӕр, цас дӕ хъӕуы, уыйбӕрц. Фӕлӕ, хорз ӕмӕ ӕвзӕр цы у, уый зоныны бӕласӕй ма бахӕр. Цы бон дзы бахӕрай, уыцы бон амӕлдзынӕ» (Райдиан 2:16, 17). Фыццаг нӕлгоймаг ӕмӕ сылгоймагӕн сӕ бон уыд равзарын ӕнусон цард кӕнӕ мӕлӕт. Кӕд Хуыцау рагацау зыдта, Адам ӕмӕ Евӕ кӕй фӕрӕдийдзысты, уый, уӕд ма сӕ фӕдзӕхсгӕ та цӕмӕн бакодта? Афтӕ куы уыдаид, уӕд Хуыцауы схонӕн уыдаид хинӕйдзаг. Йегъовӕ «рӕстдзинад ӕмӕ раст тӕрхон» кӕй уарзы, уымӕ гӕсгӕ фидарӕй зӕгъӕн ис: Адам ӕмӕ Евӕйӕн равзарыны бар куы нӕ уыдаид, уӕд сын зӕгъгӕ дӕр нӕ кодтаид, хорз ӕмӕ ӕвзӕр зоныны бӕласӕй ма бахӕрут, кӕннод амӕлдзыстут, зӕгъгӕ.

Йегъовӕмӕ ис бирӕ хорздзинӕдтӕ (Псалом 31:19). Хуыцау хорздзинад кӕнын кӕй уарзы, уый тыххӕй Йесо Чырысти загъта: «Искӕмӕй уӕ йӕ сывӕллон дзул куы ракура, уӕд ын дур ратдзӕн? Кӕнӕ дзы кӕсаг куы ракура, уӕд ын калм ратдзӕн? Ӕмӕ кӕд сымах, тӕригъӕдджын уӕвгӕйӕ, уӕ цотӕн хорзы цӕуын зонут, уӕд уӕ уӕларвон Фыд та куыннӕ ракӕндзӕн хорздзинӕдтӕ, чи дзы куры, уыдонӕн!» (Матфейы 7:9–11). Ӕцӕгдӕр, Хуыцау бирӕ хорздзинӕдтӕ кӕны йе сконд адӕмӕн. Адӕмӕн сӕ конд дӕр, стӕй сӕ Хуыцау цы дзӕнӕты ӕрцӕрын кодта, уый дӕр ууыл дзурӕг уыдысты, се Сфӕлдисӕгмӕ бирӕ хорздзинӕдтӕ кӕй ис. Уӕдӕ ахӕм Хуыцау афтӕ дурзӕрдӕ куыд хъуамӕ разындаид, ӕмӕ адӕмы уыцы рӕсугъд бынаты ӕрцӕрын кодта, афтӕмӕй та йӕ рагацау зыдта, тагъд рӕстӕджы дзы ӕнӕхай кӕй фӕуыдзысты? Не Скӕнӕг Хуыцау рӕстдзинад кӕй уарзы ӕмӕ йӕм бирӕ хорздзинӕдтӕ кӕй ис, уымӕ гӕсгӕ уый аххосджын нӕу, адӕм йӕ коммӕ кӕй нӕ бакастысты.

«Иунӕг зондджын»

Библийы ма фыст ис, Йегъовӕйы зондӕн ӕмбал кӕй нӕй (Ромӕгтӕм 16:27). Зӕдтӕ уыдтой, йе ’нӕкӕрон зонд цы бирӕ хъуыддӕгтӕй бӕрӕг у, уый. Зӕгъӕм, Библийы фыст ис, зӕдтӕ «фырцинӕй [кӕй] хъӕр кодтой», Йегъовӕ зӕхх куы фӕлдыста, уӕд (Иов 38:4–7). Кӕй зӕгъын ӕй хъӕуы, зӕдтӕ тынг цымыдисӕй кастысты, Едемы цӕхӕрадоны цы хабӕрттӕ цыд, уыдонмӕ дӕр. Уӕдӕ йе стыр зондӕй ӕгӕрон дун-дуне ӕмӕ, зӕххыл цы бирӕ диссӕгтӕ ис, уыдон чи сфӕлдыста, уый ма стӕй зӕдты цӕстыты раз адӕмы цӕмӕн сфӕлдыста, кӕд ӕмӕ йӕ рагацау зыдта, кӕй фӕрӕдийдзысты? Кӕй зӕгъын ӕй хъӕуы, зонгӕ-зонын афтӕ бакӕнын зондджын ми нӕ уыдаид.

Фӕлӕ уӕддӕр, чи зоны, исчи зӕгъа: «Ау, алцыдӕр чи зоны, уыцы Хуыцау уый куыннӕ зыдтаид?» Ӕцӕгдӕр, Йегъовӕйӕн йе стыр зонды фӕрцы йӕ бон райдианӕй базонын у, «фӕстагмӕ цы уыдзӕн, уый» (Исай 46:9, 10). Фӕлӕ уыцы миниуӕгӕй алыхатт не спайда кӕны, йе стыр тыхӕй алыхатт куыд нӕ фӕпайда кӕны, афтӕ. Йегъовӕ дзы пайда кӕны ӕмбаргӕйӕ. Куы фӕхъӕуы ӕмӕ уавӕртӕ куы фӕамонынц, уӕд рагацау базоны, хъуыддаг куыд рауайдзӕн, уый.

Цӕмӕй бамбарӕм, Хуыцауы алцыдӕр рагацау зонын кӕй нӕ фӕнды, уый тыххӕй ӕрхӕссӕм ахӕм цӕвиттон. Зӕгъӕм, цавӕрдӕр спортивон хъазт дискыл ныффыстой, ӕмӕ йӕм уый фӕстӕ чидӕр кӕсы. Йӕ бон у, ӕмӕ уал фыццаг бакӕса хъазты кӕронмӕ, цӕмӕй йӕ базона, чи рамбулдзӕн, уый. Фӕлӕ хъуамӕ ӕнӕмӕнгӕй афтӕ бакӕна, уый зӕгъӕн нӕй. Ӕмӕ йын чи цы хъуамӕ зӕгъа, кӕд ӕй хъазтмӕ йӕ райдианӕй фӕнды бакӕсын, уӕд? Афтӕ не Сфӕлдисӕджы дӕр, ӕвӕццӕгӕн, нӕ бафӕндыд рагацау базонын, хабӕрттӕ куыд рауайдзысты, уый. Йегъовӕ банхъӕлмӕ каст, хъуыддаг куыд рауайдзӕн, ӕмӕ йӕ хъус дардта, йӕ зӕххон хъӕбултӕ сӕхи куыд дардзысты, уымӕ.

Уӕлдӕр куыд загътам, афтӕмӕй Йегъовӕ адӕмы роботты хуызӕн не скодта. Куыд хъуамӕ архайой, уый сын сӕ сӕры магъзы нӕ ныффыста. Кӕй сӕ уарзы, уый тыххӕй сын радта сӕрибардзинад. Раст уынаффӕтӕ куы хастаиккой, уӕд уымӕй бӕрӕг уыдаид, Хуыцауы кӕй уарзынц, бузныг дзы кӕй сты ӕмӕ йӕ коммӕ кӕй кӕсынц. Уымӕй уӕлдай уый хастаид циндзинад сӕхицӕн дӕр ӕмӕ сӕ уӕларвон Фыдӕн дӕр (Ӕмбисӕндтӕ 27:11; Исай 48:18).

Библийы фыст хабӕрттӕй бӕрӕг у, бирӕ хӕттыты-иу Хуыцауы кӕй нӕ бафӕндыд рагацау базонын, цавӕрдӕр бӕлвырд хабар куыд рауайдзӕн, уый. Зӕгъӕм, Авраам йӕ къух куы систа, цӕмӕй йӕ фырты нывондӕн ӕрхастаид, уӕд ын зӕд Йегъовӕйы номӕй загъта: «Ныр ӕй ӕз зонын, Хуыцауӕй кӕй тӕрсыс, уымӕн ӕмӕ мын дӕ фырты, дӕ иунӕг хъӕбулы, нӕ бавгъау кодтай» (Райдиан 22:12). Адӕм сӕхи ’взӕр кӕй дардтой, уымӕ кӕсгӕйӕ та-иу йӕ зӕрдӕ фӕрыст. Хуыцау хабӕрттӕ рагацау куы зыдтаид, уӕд ма йӕ зӕрдӕ рыстаид? (Псалом 78:40, 41; 1 Паддзӕхты 11:9, 10).

Уӕдӕ раст уыдзӕн, афтӕ куы зӕгъӕм, ӕмӕ, кӕд Хуыцауӕн алцыдӕр йӕ бон рагацау базонын у, уӕддӕр ӕй кӕй нӕ бафӕндыд базонын, Адам ӕмӕ Евӕ кӕй фӕрӕдийдзысты, уый. Ӕнӕзонд ми уаид, исты хъуыддаг аразын райдайын, кӕд ӕмӕ йӕ рагацау зонӕм, йӕ кӕрон хорзмӕ кӕй не ’рцӕудзӕн, уый. Ӕмӕ ӕгӕрон зонды хицау чи у, уыцы Хуыцау та, кӕй зӕгъын ӕй хъӕуы, афтӕ нӕ бакодтаид.

«Хуыцау у уарзондзинад»

Хуыцауы знаг, Хӕйрӕг, фыццаг адӕмы кӕй фӕрӕдийын кодта, уый ӕркодта стыр бӕллӕхтӕм. Адӕм систы тӕригъӕдджын ӕмӕ мӕлын райдыдтой. Уымӕ гӕсгӕ Хӕйрӕджы схонӕн ис «лӕгмар». Библи ма йӕ хоны «мӕнгдзурӕг ӕмӕ мӕнгдзинады фыд» (Иоанны 8:44). Кӕд фыдзӕрдӕ йӕхӕдӕг у, уӕддӕр архайы, цӕмӕй адӕм афтӕ хъуыды кӕной нӕ фӕлмӕнзӕрдӕ Хуыцауӕй. Стӕй йӕ фӕнды, цӕмӕй, Адам ӕмӕ Евӕ кӕй фӕрӕдыдысты, уыцы хъуыддаджы дӕр Йегъовӕйы аххосджын кӕной.

Йегъовӕ Адам ӕмӕ Евӕйы уарзгӕ кӕй кодта, фыццаджыдӕр ӕй уый тыххӕй нӕ бафӕндыд рагацау базонын, тӕригъӕд кӕй ракӕндзысты, уый. Уарзондзинад у Хуыцауы ӕппӕты сӕйрагдӕр миниуӕг. 1 Иоанны 4:8 фыст ис: «Хуыцау у уарзондзинад». Уарзондзинады хорз йеддӕмӕ ӕвзӕрӕй ӕппындӕр ницы ис. Уарзгӕ чи кӕны, уый иннӕтӕм фӕагуры хорз миниуджытӕ. Уӕдӕ Йегъовӕ Адам ӕмӕ Евӕйы тынг кӕй уарзта, уый тыххӕй йӕ фӕндыд, цӕмӕй амондджын уыдаиккой.

Кӕд нӕ фӕлмӕнзӕрдӕ Хуыцау йӕ зӕххон сывӕллӕттӕн сӕрибардзинад радта, ӕмӕ уымӕ гӕсгӕ гӕнӕн уыд, ӕмӕ исты ӕнӕзонд уынаффӕ рахастаиккой, уӕддӕр афтӕ нӕ хъуыды кодта, адонӕй ницы рауайдзӕн, зӕгъгӕ, стӕй сӕм ӕнӕууӕнк цӕстӕй дӕр нӕ каст. Цӕрынӕн сӕ цыдӕриддӕр хъуыди, уый сын радта ӕмӕ сӕ ӕппындӕр ницы басусӕг кодта. Уӕдӕ диссаг нӕу, Хуыцауы кӕй фӕндыд, цӕмӕй йӕ уыдон дӕр уарзтаиккой ӕмӕ йӕ коммӕ кастаиккой ӕмӕ йыл гадзрахатӕй ма рацыдаиккой. Йегъовӕ зыдта, сӕ бон кӕй уыд, ӕмӕ йыл иузӕрдион уыдаиккой, фӕстӕдӕр ыл суанг ӕнӕххӕст адӕм куыд иузӕрдион уыдысты, афтӕ, зӕгъӕм, Авраам, Иов, Данел ӕмӕ бирӕ ӕндӕртӕ.

«Хуыцауӕн алцыдӕр у йӕ бон»,– загъта Йесо Чырысти (Матфейы 19:26). Уый ӕхсызгон куыннӕ у! Йегъовӕ уарзӕгой Хуыцау кӕй у, стӕй ма йӕм ноджы ӕндӕр миниуджытӕ дӕр кӕй ис, зӕгъӕм, рӕстдзинад, зонд ӕмӕ тых, уый нын фидар ныфс дӕтты, йӕ рӕстӕджы кӕй фесафдзӕн, тӕригъӕд ӕмӕ нын мӕлӕт цы зындзинӕдтӕ ӕмӕ рыст ӕвзарын кӕнынц, уый (Раргомад 21:3–5).

Бӕрӕг у, Йегъовӕ рагацау кӕй нӕ зыдта, фыццаг нӕлгоймаг ӕмӕ сылгоймаг тӕригъӕд кӕй ракӕндзысты, уый. Хуыцауӕн зын уыд, йӕ коммӕ кӕй нӕ бакастысты ӕмӕ уый стыр бӕллӕхтӕ кӕй расайдта. Уый йын кӕд йӕ фӕнд рӕстӕгмӕ фӕкъуылымпы кодта, уӕддӕр ӕм зӕхх ӕмӕ адӕмы тыххӕй райдианы цы фӕнд уыд, уый сӕххӕст кӕндзӕн. Кӕд дӕ фӕнды уый тыххӕй фылдӕр базонын ӕмӕ, Хуыцауы фӕнд куыд сӕххӕст уыдзӕн, уый дӕхи цӕстӕй фенын, уӕд Йегъовӕйы Ӕвдисӕнтӕй искӕимӕ аныхас кӕнa.

[Фиппаинаг]

[Хицӕнгонд текст 14 фарсыл]

Йегъовӕ адӕмы роботты хуызӕн не скодта. Куыд хъуамӕ архайой, уый сын сӕ сӕры магъзы нӕ ныффыста

[Хицӕнгонд текст 15 фарсыл]

Хуыцау зыдта, Адам ӕмӕ Евӕйӕн сӕ бон кӕй уыд, ӕмӕ йыл иузӕрдион уыдаиккой