Ӕцӕг чырыстӕттӕ аргъ кӕнынц Хуыцауы Ныхасӕн
«Дӕ ныхас у рӕстдзинад» (ИОАН. 17:17).
1. Йегъовӕйы Ӕвдисӕнтимӕ фыццаг хатт куы ныхас кодтай, уӕд, иннӕ динтӕй цӕмӕй хицӕн кӕнынц, ахӕмӕй цы бафиппайдтай?
ЙЕГЪОВӔЙЫ ӔВДИСӔНТИМӔ фыццаг хатт куы ныхас кодтай, уый ма хъуыды кӕныс? Дӕ зӕрдыл ӕппӕты тынгдӕр цы бадардтай? Бирӕтӕ, ӕвӕццӕгӕн, зӕгъдзысты, сӕ зӕрдӕмӕ кӕй фӕцыд, Йегъовӕйы Ӕвдисӕнтӕ сын сӕ алы фарстайӕн дӕр дзуапп Библийӕ кӕй лӕвӕрдтой. Уӕд базыдтам, Хуыцаумӕ зӕххы тыххӕй цы фӕнд ис, адӕймаг куы амӕлы, уӕд цы фӕвӕййы ӕмӕ нын чи амард, уыдоны та ногӕй кӕй фендзыстӕм. Ӕмӕ нӕ цинӕн кӕрон дӕр нал уыд!
2. Библийӕн аргъ кӕнын цӕмӕн райдыдтай?
2 Фӕлӕ Библи дарддӕр ахуыргӕнгӕйӕ бамбӕрстам, уыцы чиныгӕй ӕрмӕст цард ӕмӕ мӕлӕты тыххӕй, стӕй фидӕны тыххӕй кӕй нӕй базонӕн, фӕлӕ ма бирӕ ӕндӕр хабӕрттӕ дӕр. Библийӕн аргъ кӕнын райдыдтам, уымӕн ӕмӕ зӕххыл уымӕй пайдадӕр чиныг нӕй. Йӕ уынаффӕтыл рӕстӕджы бар нӕ цӕуы. Уыцы уынаффӕтӕм гӕсгӕ чи цӕры, уыдон уыдзысты амондджын ӕмӕ цардӕй райгонд. (Бакӕс Псалом 1:1–3.) Ӕцӕг чырыстӕттӕ Библи алкӕддӕр нымадтой адӕймаджы ныхасыл нӕ, фӕлӕ, «ӕцӕгӕй цы у, ууыл – Хуыцауы ныхасыл» (1 Фес. 2:13). Ныртӕккӕ цыбыртӕй ӕркӕсдзыстӕм раджы заманты хабӕрттӕм ӕмӕ уый фӕрцы фендзыстӕм, Хуыцауы Ныхасӕн ӕцӕгдӕр чи аргъ кӕны, уыдон куыд тынг хицӕн кӕнынц, чи йын нӕ аргъ кӕны, уыдонӕй.
ЗЫН ФАРСТА АСКЪУЫДДЗАГ КОДТОЙ
3. Чырыстон ӕмбырды иудзинадӕн тӕссаг цавӕр фарстайы тыххӕй уыд ӕмӕ уый зын фарста цӕмӕн уыди?
3 Ӕндӕр адӕмтӕй чи уыд ӕмӕ сунӕтгонд чи нӕ уыд, уыдонӕй фыццаг сыгъдӕг тыхӕй сӕрст ӕрцыд Корнилий. Уыцы хабары фӕстӕ 13 азмӕ ӕндӕр адӕмтӕй бирӕтӕ систы чырыстӕттӕ. Уыцы рӕстӕг фӕзынд, чырыстон ӕмбырды иудзинадӕн тӕссаг кӕй тыххӕй уыд, ахӕм фарста: цалынмӕ ӕндӕр адӕмтӕй исчи донаргъуыд райса, уӕдмӕ йын дзуттӕгты ӕгъдӕуттӕм гӕсгӕ сунӕт кӕнын хъӕуы ӕви нӕ? Дзуттаг адӕймагӕн ацы фарстайӕн дзуапп раттын ӕнцон нӕ уыд. Моисейы закъонмӕ гӕсгӕ чи цард, уыцы дзуттӕгтӕ ӕндӕр адӕмтӕй искӕмӕ хӕдзармӕ цӕугӕ дӕр нӕ бакодтаиккой. Ӕмӕ йӕ уӕд ӕфсымӕрыл куыд банымадтаиккой. Дзуттӕгтӕй чырыстон чи сси, уыдоны та ӕнӕуи дӕр карзӕй ӕфхӕрдтой, сӕ раздӕры дин кӕй ныууагътой, уый тыххӕй. Ӕмӕ ма ныр, ӕнӕсунӕт адӕмтӕй чи уыд, уыдонмӕ ӕфсымӕрты цӕстӕй куы ракастаиккой, уӕд сӕм, дзуттаг диныл хӕст чи уыд, уыдон ноджы тынгдӕр сфыдӕх уыдаиккой ӕмӕ сӕ карздӕрӕй ӕфхӕрдтаиккой (Гал. 2:11–14).
4. Сунӕт кӕныны фарста аскъуыддзаг кӕнынмӕ чи ӕрӕмбырд? Адӕймагмӕ уый фӕдыл цавӕр фарстатӕ фӕзындаид?
4 Нӕ эрӕйы 49 азы Иерусалимы «уыцы хъуыддаджы фӕдыл ӕрӕмбырд сты» апостолтӕ ӕмӕ хистӕр нӕлгоймӕгтӕ – уыдон сӕхӕдӕг уыдысты сунӕтгонд дзуттӕгтӕ (Хъуыд. 15:6). Уый тыххӕй нӕ ӕрӕмбырд сты, цӕмӕй, ахсджиаг чи нӕ уыд, ахӕм дины фарстатыл быцӕу кодтаиккой. Стӕй уыцы фембӕлды чи уыд, уыдонӕй ничи ахъуыды кодтаид, тагъддӕр ма куы фӕуид, зӕгъгӕ. Дзӕгъӕл радзур-бадзур нӕ кодтой, фӕлӕ зӕрдиагӕй ныхас кодтой Библийы ахуырӕдтыл. Алчидӕр йӕ хъуыды дзырдта. Цымӕ уыцы фарста куыд аскъуыддзаг кӕндзысты? Иу кӕйдӕр зондӕй рахӕсдзысты уынаффӕ? Мыййаг, бӕрнон хистӕр нӕлгоймӕгтӕ ӕнхъӕлмӕ кӕсдзысты, цалынмӕ Израилы чырыстӕттӕм хуыздӕр цӕстӕй кӕсын нӕ райдайой, уӕдмӕ, ӕмӕ уынаффӕ уый фӕстӕ рахӕсдзысты? Ӕви ӕппынфӕстаг цӕуылдӕр сразы уыдзысты, кӕд сӕм ахӕм уынаффӕ бынтон раст нӕ кӕсдзӕн, уӕддӕр, зӕгъгӕ нӕ ницыуал хъӕуы, ацы хъуыддаг ма куы аскъуыддзаг уаид?
5. Иерусалимы н. э. 49 азы цы фембӕлд уыди, уый чырыстон аргъуаны разамонджыты ӕмбырдтӕй цавӕр ахсджиаг хъуыддӕгтӕй хицӕн кодта?
5 Нӕ рӕстӕджы чырыстон аргъуаны разамонджытӕ куы ӕрӕмбырд вӕййынц, уӕд арӕх хабар афтӕ рауайы, ӕмӕ уынаффӕ рахӕссыны тыххӕй иутӕ иннӕты хъуыдыимӕ сразы вӕййынц, кӕд сӕм уыцы хъуыды бынтон раст нӕ фӕкӕсы, уӕддӕр. Кӕнӕ та уыцы разамонджытӕй иуӕй-иутӕ фӕархайынц иннӕты сӕхирдӕм фӕкӕныныл, цӕмӕй сын сӕ уынаффӕтыл схъӕлӕс кӕной. Иерусалимы цы фембӕлд уыди, уым та ахӕм хъуыддӕгтӕн сӕ кой дӕр нӕ уыд. Фӕлӕ сӕ бон сси, алчидӕр разы кӕимӕ уыд, ахӕм уынаффӕ рахӕссын. Уый сын куыд бантыст? Кӕд алыхуызон хъуыдытыл хӕст уыдысты, уӕддӕр, уым чи уыд, уыдонӕй алчидӕр аргъ кодта Хуыцауы Ныхасӕн, ӕмӕ уыцы фарста аскъуыддзаг кодтой Фыстадмӕ гӕсгӕ. (Бакӕс Псалом 119:97–101.)
6, 7. Апостолтӕ ӕмӕ хистӕр нӕлгоймӕгтӕ сунӕт кӕныны фарста Фыстады фӕрцы куыд аскъуыддзаг кодтой?
6 Фарста аскъуыддзаг кӕнынӕн сын баххуыс кодтой Амосы 9:11, 12 стихты фыст ныхӕстӕ. Ацы ныхӕстӕ хаст сты Хъуыддӕгты 15:16, 17 стихты: «Ӕз раздӕхдзынӕн ӕмӕ Давиды хӕлд хӕдзар ногӕй сараздзынӕн. Йӕ хӕлддзӕгтӕ йын ӕрӕмбырд кӕндзынӕн ӕмӕ та йӕ ногӕй сараздзынӕн, цӕмӕй ма ацы адӕмӕй чи баззайа, уыдон, ӕппӕт адӕмтӕй мын мӕ ном чи хӕссы, уыдонимӕ иумӕ Йегъовӕйы зӕрдиагӕй агурой,– зӕгъы Йегъовӕ».
7 Фӕлӕ исчи, чи зоны, зӕгъа, зӕгъгӕ, ацы стихты ницы ис фыст, ӕндӕр адӕмтӕй чырыстон чи сси, уыдоны сунӕт кӕнын кӕй нӕ хъӕуы, уый тыххӕй. Ӕмӕ уый афтӕ у. Фӕлӕ дзуттӕгтӕй чырыстон чи уыд, уыдон ӕмбӕрстой, уыцы ныхӕстӕ цӕуыл дзурӕг сты, уый. Ӕндӕр адӕмтӕй сунӕтгонд чи уыд, уыдоны нымадтой се ’фсымӕртыл, ӕндӕр адӕмтыл-иу сӕ нал нымадтой (Рац. 12:48, 49). Зӕгъӕм, Библийы иу тӕлмацы Есфиры 8:17 фыст ис: «Ӕндӕр адӕмтӕй бирӕтӕ сунӕт скодтой ӕмӕ систы дзуттӕгтӕ». Уӕдӕ ацы ныхӕстӕ, «ацы адӕмӕй чи баззайа, уыдон», зӕгъгӕ, хауынц, Израилы адӕмӕй ма чи баззад, уыдонмӕ, ома дзуттӕгтӕм ӕмӕ сунӕтгонд прозелиттӕм. Ӕмӕ Библийы куыд фыст ис, афтӕмӕй уыдон хъуамӕ суыдаиккой иу адӕм Хуыцауы номыл «ӕппӕт адӕмтимӕ... иумӕ», ома ӕнӕсунӕтгонд ӕндӕр адӕмтимӕ. Уӕдӕ Фыстады уыди бӕлвырд дзуапп: ӕндӕр адӕмтӕй кӕй фӕндыд, цӕмӕй чырыстон суыдаид, уыдоны сунӕт кӕнын нӕ хъуыди.
8. Дзуттаг чырыстӕтты уынаффӕ рахӕссынӕн хъӕбатырдзинад цӕмӕн хъуыди?
8 Хуыцауы Ныхасы фӕрцы ӕмӕ йӕ сыгъдӕг тыхы фӕрцы уыцы сыгъдӕгзӕрдӕ чырыстӕттӕ «ӕмвӕндӕй бауынаффӕ кодтой» (Хъуыд. 15:25). Кӕд уыцы уынаффӕйы тыххӕй, дзуттӕгтӕй чырыстон чи уыд, уыдоны тынгдӕр ӕфхӕрдтаиккой, уӕддӕр, иузӕрдион чи уыд, уыдон байхъуыстой, Библийы бындурыл хаст чи ӕрцыд, уыцы уынаффӕмӕ, ӕмӕ уымӕй равдыстой хъӕбатырдзинад (Хъуыд. 16:4, 5).
КУЫД ХИЦӔН КӔНЫНЦ, УЫЙ ТЫНГДӔР РАБӔРӔГ
9. Раст дин мӕнг ахуырӕдтӕй кӕй фӕчъизи, уымӕн йӕ сӕйраг аххосаг цы у? Цавӕр ахсджиаг ахуырад сзыгъуыммӕ кодтой?
9 Апостол Павел загъта, апостолты мӕлӕты фӕстӕ раст дин мӕнг ахуырӕдтӕй кӕй фӕчъизи уыдзӕн. (Бакӕс 2 Фессалоникӕгтӕм 2:3, 7.) Суанг ма, дам, ӕмбырды кадджын хӕстӕ кӕуыл ис, уыдон дӕр раст ахуырадыл сӕ къух сисдзысты (2 Тим. 4:3). Павел, йӕ рӕстӕджы цы хистӕр нӕлгоймӕгтӕ уыд, уыдоны бафӕдзӕхста: «Уӕхи ’хсӕн дӕр фӕзындзӕн, рӕстдзинад чи зыгъуыммӕ кӕндзӕн, ахӕм адӕймӕгтӕ, цӕмӕй ахуыргӕнинӕгты сӕ фӕдыл акӕной» (Хъуыд. 20:30). Чырыстон дин мӕнг ахуырӕдтимӕ цӕмӕн схӕццӕ, уымӕн йӕ сӕйраг аххосаг фыст ис иу энциклопедийы («New Encyclopædia Britannica»). Уым фыст ис, раздӕр грекъаг философи чи ахуыр кодта, уыцы чырыстӕттӕй иуӕй-иутӕ кӕй райдыдтой чырыстон ахуырӕдтӕ уыцы философимӕ гӕсгӕ ӕмбарын кӕнын. Уый тыххӕй-иу сӕхицӕй ныббуц сты, стӕй сӕм афтӕ касти, ӕмӕ афтӕмӕй баххуыс кӕндзысты, ӕндӕр адӕмтӕй ахуыргонд чи уыд, уыдонӕн чырыстон дин райсынӕн. Зӕгъӕм, мӕнг ахуырӕдтимӕ кӕй схӕццӕ кодтой, уыцы ахсджиаг ахуырӕдтӕй иу баст уыд, Йесо Чырысти чи у, уыимӕ. Библи йӕ хоны Хуыцауы Фырт, фӕлӕ, грекъаг философи чи уарзта, уыдон дзырдтой, Хуыцау у, зӕгъгӕ.
10. Чырысти чи у, уый аргъуаны разамонджытӕн сӕ бон куыд уыд сбӕлвырд кӕнын?
10 Уыцы фарстайыл уый фӕстӕ цалдӕр хатты дзырдтой чырыстон аргъуаны разамонджыты ӕмбырдты. Йесо Чырысти чи у, уый Фыстадмӕ гӕсгӕ куы сбӕлвырд кодтаиккой, уӕд дзуапп бӕгуыдӕр ссардтаиккой. Фӕлӕ, Библи цы дзуры, уый сӕ фылдӕр ницӕмӕ дардтой. Суанг ма-иу уыцы фарстайы фӕдыл сӕхицӕн хатдзӕг скодтой ӕмбырдты размӕ дӕр, ӕмӕ сын ӕй ничи аивтаид. Се ’мбырдты-иу уынаффӕтӕ куы рахастой, уӕд-иу Библийӕн, зӕгъӕн ис, йӕ кой дӕр не скодтой.
11. Аргъуаны разамонджытӕн ахсджиагдӕр кӕй хъуыды уыди ӕмӕ цӕмӕн?
11 Цымӕ аргъуаны разамонджытӕ уыцы фарста куы скъуыддзаг кодтой, уӕд Фыстадмӕ лӕмбынӕгдӕр цӕуылнӕ ӕркастысты? Ахуыргонд Чарльз Фримен уый афтӕ ӕмбарын кӕны, зӕгъгӕ, дам, Йесо Чырыстийы Хуыцауыл кӕй нымадтой, уыцы хъуыдыйӕн Библийы бӕлвырдгӕнӕнтӕ нӕ уыд. Йесо йӕхӕдӕг дзырдта, Фыд Фыртӕй уӕлдӕр кӕй у. Ӕмӕ уыцы разамонджытӕн Йесойы ныхӕсты ныхмӕ сӕ бон кӕй ницы уыд зӕгъын, уый тыххӕй аргъуаны ахуырӕдтӕ ӕмӕ адӕмы хъуыды Евангелитӕй ахсджиагдӕрыл нымайын райдыдтой. Абон дӕр аргъуаны разамонджытӕй бирӕтӕ афтӕ хъуыды кӕнынц, ӕмӕ, чырыстон аргъуаны ахуырӕдты бындурӕвӕрджытыл кӕй нымайынц, уыдоны ныхӕстӕ Хуыцауы Ныхасӕй ахсджиагдӕр сты! Кӕд искуы диниртасджытӕй искӕимӕ Троицӕйыл ныхас кодтай, уӕд ӕй дӕхӕдӕг дӕр бафиппайдтаис, афтӕ кӕй у.
12. Паддзах аргъуаны хъуыддӕгтыл куыд ӕндӕвта?
12 Уыцы ӕмбырдты Ромы паддзӕхты ныхасӕн уыди стыр уӕз. Никейӕйы цы ӕмбырд уыд, уый тыххӕй ныффыста профессор Ричард Рубинштейн. Уый фыссы, зӕгъгӕ, дам, ног паддзах Константин епископты тынг схъӕздыг кодта. Иу аз дӕр нӕ рацыд, афтӕ сын фӕстӕмӕ радта, цыдӕриддӕр сын байстой, уыдӕттӕ: сӕ аргъуантӕ, сӕ куыст ӕмӕ сӕ кадджын нӕмттӕ. Епископтӕн радта, раздӕр муртакк сауджынтӕн цавӕр бартӕ уыд, ахӕмтӕ. Афтӕмӕй Константинӕн йӕ бон уыд, Никейӕйы ӕмбырды цы уынаффӕтӕ рахастаиккой, уыдоныл бандавын, суанг ма сӕ аивын дӕр. Чарльз Фримен ма куыд ныффыста, афтӕмӕй уыцы ӕмбырды фӕстӕ паддзахӕн йӕ бар аргъуаныл ноджы тынгдӕр цыди. Стыр бартӕ сын радта, фӕлӕ сын сӕ ахуырӕдтыл дӕр тынг бандӕвта. (Бакӕс Иаковы 4:4.)
13. Куыд хъуыды кӕныс, Библийы бӕлвырдӕй цы ахуырӕдты тыххӕй фыст ис, уыдонмӕ аргъуаны разамонджытӕ сӕ хъус цӕуылнӕ дардтой?
13 Йесо Чырысти Хуыцауы Фырт кӕй у, уый сбӕлвырд кӕнын кӕд аргъуаны разамонджытӕн зын уыди, уӕд хуымӕтӕг адӕмӕй та бирӕтӕн – нӕ. Афтӕ уымӕн уыд, ӕмӕ хуымӕтӕг адӕм, Библийы цы кастысты, уый хорз ӕмбӕрстой ӕмӕ йӕ ныхӕстимӕ разы уыдысты. Аргъуаны разамонджытӕн та сӕ сӕйраг мӕт уыд, паддзах сын фылдӕр ӕхца ӕмӕ бартӕ куыд радтаид, ӕмӕ уымӕ гӕсгӕ Библи ницӕмӕ дардтой. Уӕды дины разамонджытӕй иу, Григорий Ниссӕйӕ, хуымӕтӕг адӕмы тыххӕй хынджылӕггӕнгӕ загъта: «Дзаумӕттӕ ӕмӕ хӕринаг уӕйгӕнджытӕ, стӕй ӕхцаивджытӕ иууылдӕр диниртасджытӕ фестадысты. Де ’хцатӕ дын цасӕй баивдзысты, уымӕй куы бафӕрсай, уӕд дын искӕцы философ ӕмбарын кӕнын райдайдзӕн, Фырт Фыдӕй куыд хицӕн кӕны, уый. Дзул цас кӕны, уымӕй куы бафӕрсай, уӕд дын дзуапп ратдзысты, Фыд Фыртӕй уӕлдӕр кӕй у. Дӕ абана цӕттӕ у ӕви нӕ, уый дӕ куы фӕнда базонын, уӕд та дын зӕгъдзысты, Фырты Хуыцау кӕй сфӕлдыста». Ӕппӕт ацы хабӕрттӕ хуымӕтӕг адӕм ӕмбарын кодтой Библимӕ гӕсгӕ. Нӕдӕр Григорий Ниссӕйӕ, нӕдӕр иннӕ разамонджытӕ афтӕ нӕ кодтой. Фӕлтау хуымӕтӕг адӕммӕ куы байхъуыстаиккой!
«МӔНӔУ» ӔМӔ «ХӔМПӔЛГӔРДӔГ» ИУМӔ РӔЗЫНЦ
14. Цӕмӕ гӕсгӕ у нӕ бон зӕгъын, ӕмӕ фыццаг ӕнусӕй фӕстӕмӕ зӕххыл алкӕддӕр кӕй хъуамӕ уыдаид ӕцӕг сӕрст чырыстӕттӕ?
14 Йесо Чырысти йӕ фӕсномыг ныхӕстӕй иуы цы загъта, уымӕй бӕрӕг у, фыццаг ӕнусӕй фӕстӕмӕ зӕххыл алкӕддӕр кӕй хъуамӕ уыдаид ӕцӕг сӕрст чырыстӕттӕ. Йесо сӕ абарста, «хӕмпӕлгӕрдӕджы» ’хсӕн чи зайы, ахӕм «мӕнӕуимӕ» (Матф. 13:30). Кӕй зӕгъын ӕй хъӕуы, мах ӕй нӕ зонӕм, сӕрстыты къордмӕ бӕлвырдӕй чи кӕнӕ цавӕр къордтӕ хауд. Фӕлӕ зонӕм уый, ӕмӕ зӕххыл алкӕддӕр уыд, Хуыцауы Ныхасы сӕрыл хъӕбатырӕй чи тох кодта ӕмӕ аргъуаны мӕнг ахуырӕдты ныхмӕ ӕргом чи дзырдта, ахӕм адӕймӕгтӕ. Ӕркӕсӕм дзы цалдӕры хабармӕ.
15, 16. Хуыцауы Ныхасӕн чи аргъ кодта, уыдонӕй иуӕй-иутӕ чи уыдысты?
15 Н. э. 779–840 азты Францийы чи цард, уыцы архиепископ Лиойнаг Агобард дзырдта нывтӕн кувыны ныхмӕ ӕмӕ аргъуантӕ сыгъдӕджыты номыл кӕй саразынц, уый ныхмӕ, стӕй аргъуаны ӕгъдӕуттӕ ӕмӕ хъуыддӕгты ныхмӕ дӕр. Архиепископ Агобард цы рӕстӕджы цард, уыцы рӕстӕджы ма царди епископ Клавдий дӕр, ӕмӕ уый дӕр разы нӕ уыди аргъуаны ахуырӕдтимӕ ӕмӕ дзырдта, сыгъдӕджытӕм кувын ӕмӕ дзауматӕн табу кӕнын кӕй нӕ хъӕуы. 11 ӕнусы Францийы архидиакон Тураг Беренгарий аргъуанӕй тард ӕрцыд, уымӕн ӕмӕ разы нӕ уыд католикон ахуырадимӕ, дзул ӕмӕ сӕн Чырыстийы буар ӕмӕ туг фестынц, зӕгъгӕ. Беренгарий ма дзырдта, зӕгъгӕ, Библи цы дзуры, уый аргъуаны ахуырӕдтӕй ахсджиагдӕр у.
16 Петр де Брюи ӕмӕ Лозаннӕйаг Генрих дӕр уарзтой, Библийы цы рӕстдзинад ис, уый. Сӕ дыууӕ дӕр цардысты 12 ӕнусы. Петр де Брюи ныууагъта йӕ сауджыны куыст, уымӕн ӕмӕ католикон дины ахуырӕдтӕ растыл нӕ нымадта, зӕгъӕм, ноггуырдтӕн донаргъуыд кӕй лӕвӕрдтой, дзул ӕмӕ сӕн Чырыстийы буар ӕмӕ туг фестынц, зӕгъгӕ, кӕй дзырдтой, стӕй мӕрдты тыххӕй кӕй куывтой ӕмӕ крестӕн кӕй табу кодтой, уый. 1140 азы Петры арты басыгътой, цӕуыл ӕууӕндыд, уый тыххӕй. Генрих та уыд моладзан ӕмӕ ӕргом дзырдта, аргъуанты хӕрам хъуыддӕгтӕ кӕй цыди ӕмӕ сӕ ахуырӕдтӕ Библимӕ гӕсгӕ кӕй нӕ уыдысты, уый тыххӕй. 1148 азы Генрихы ӕрцахстой, ӕмӕ йӕ мӕлӕты онг ахӕстоны фӕци.
17. Вальдо ӕмӕ йӕ фӕдылдзӕуджытӕ цавӕр стыр хъуыддӕгтӕ сарӕзтой?
17 Петр де Брюийы куы амардтой, уыцы рӕстӕг райгуырд, фӕстӕдӕр Библийы рӕстдзинад тынгдӕр кӕй фӕрцы апарахат, уыцы адӕймаг. Йӕ мыггаг уыди Вальдес, кӕнӕ Вальдоa. Ацы адӕймаг Петр де Брюийау ӕмӕ Лозаннӕйаг Генрихау дины скъолаты нӕ ахуыр кодта. Фӕлӕ Хуыцауы Ныхасӕн афтӕ аргъ кодта, ӕмӕ ӕппӕт дӕр ныууагъта, йӕ мулк адӕмыл байуӕрста, цӕмӕй йӕ хъарутӕ сарӕзтаид Библи тӕлмац кӕнынмӕ. Вальдо Библийӕ кӕцыдӕр хӕйттӕ ратӕлмац кодта, Францийы хуссар-скӕсӕйнаг хайы хуымӕтӕг адӕм кӕуыл дзырдтой, уыцы ӕвзагмӕ. Библи сӕхи ӕвзагыл сӕ бон кӕсын кӕй уыд, ууыл иуӕй-иутӕ ахӕм цин кодтой, ӕмӕ уыдон дӕр сӕ мулк адӕмыл байуӕрстой ӕмӕ сӕ цард снывонд кодтой, цӕмӕй адӕмӕн Библийы тыххӕй дзырдтаиккой. Аргъуаны разамонджытӕн уый сӕ зӕрдӕмӕ ӕппындӕр нӕ фӕцыд. 1184 азы уыцы зынгзӕрдӕ нӕлгоймӕгты ӕмӕ сылгоймӕгты (фӕстӕдӕр сӕ схуыдтой вальденстӕ) Ромы папӕ аргъуанӕй ратардта ӕмӕ сӕ епископ сӕ цӕрӕнбынӕттӕй фӕсырдта. Фӕлӕ уый фӕрцы Хуыцауы Ныхас иннӕ рӕтты дӕр фехъуыстой. Фӕстагмӕ Европӕйы бирӕ рӕтты фӕзындысты Вальдойы, Петр де Брюийы, Лозаннӕйаг Генрихы фӕдылдзӕуджытӕ ӕмӕ ма уыдонау ноджыдӕр аргъуанӕй чи ацыд, уыдоны фӕдылдзӕуджытӕ. Фӕстӕдӕр ма уыди, Библийы цы рӕстдзинад ис, уый сӕрыл чи тох кодта, ахӕм адӕймӕгтӕ: Джон Уиклиф (царди иу-1330 азӕй 1384 азмӕ), Уильям Тиндал (царди иу-1494 азӕй 1536 азмӕ), Генри Гру (царди 1781–1862 азты) ӕмӕ Джордж Сторрз (царди 1796 –1879 азты).
«ХУЫЦАУЫ НЫХАС РӔХЫСТӔЙ БАСТ НӔУ»
18. Сыгъдӕгзӕрдӕ библииртасджытӕ 19 ӕнусы Библи куыд иртӕстой? Уый раст цӕмӕн уыди?
18 Библийы знӕгтӕн нӕ бантыст рӕстдзинад бауромын. 2 Тимофеймӕ 2:9 стихы фыст ис: «Хуыцауы ныхас рӕхыстӕй баст нӕу». 1870 азы сыгъдӕгзӕрдӕ библииртасджыты къорд райдыдта рӕстдзинад агурын. Цымӕ Библи куыд иртӕстой? Фыццаг-иу исчи Библийӕ цавӕрдӕр фарста радта. Стӕй-иу ыл аныхас кодтой. Уый фӕстӕ-иу бакастысты, уыцы фарстамӕ цыдӕриддӕр стихтӕ хауд, уыдон. Уыцы стихтӕ кӕрӕдзиимӕ куыд баст сты, уый фӕдыл-иу иу хъуыдымӕ куы ’рцыдысты, уӕд-иу хатдзӕг скодтой ӕмӕ-иу ӕй ныффыстой. Афтӕ кӕй кодтой, уый уыд раст, уымӕн ӕмӕ афтӕмӕй фӕзмыдтой фыццаг ӕнусы цӕрӕг апостолты ӕмӕ хистӕр нӕлгоймӕгты. Ӕмӕ уыцы иузӕрдион библииртасджытӕй райдыдта Йегъовӕйы Ӕвдисӕнты истори. Уӕдӕ нын стыр ныфсы хос куыннӕ у, зӕрдиагӕй кӕй архайдтой, цӕмӕй, цӕуылдӕриддӕр ӕууӕндыдысты, уый Хуыцауы Ныхасмӕ гӕсгӕ уыдаид.
19. 2012 азы стих кӕцӕй ист у ӕмӕ ахӕм стих ӕвзӕрст цӕмӕн ӕрцыд?
19 Абон цӕуыл ӕууӕндӕм, уымӕн дӕр йӕ бындур у Библи. Уымӕ гӕсгӕ Йегъовӕйы Ӕвдисӕнты Разамонӕг совет 2012 азы стихӕн равзӕрста Йесойы ныхӕстӕ Иоанны 17:17 стихӕй: «Дӕ ныхас у рӕстдзинад». Хуыцауы хорзӕх ссарын кӕй фӕнды, уый хъуамӕ цӕра рӕстдзинадмӕ гӕсгӕ. Цӕй уӕдӕ не ’ппӕт дӕр дарддӕр ӕппӕт тыхтӕй архайӕм, цӕмӕй нын фӕндагамонӕг уа Хуыцауы Ныхас!
[Фиппаинаг]
a Вальдесы иуӕй-иу хатт фӕхонынц Пьер Вальдес кӕнӕ Петр Вальдо, фӕлӕ йӕ ном бӕлвырдӕй куыд уыд, уый зын зӕгъӕн у.
[Хицӕнгонд текст 8 фарсыл]
2012 азы стих: «Дӕ ныхас у рӕстдзинад» (Иоанны 17:17)
[Ныв 7 фарсыл]
Вальдо
[Ныв 7 фарсыл]
Уиклиф
[Ныв 7 фарсыл]
Тиндал
[Ныв 7 фарсыл]
Гру
[Ныв 7 фарсыл]
Сторрз