Дӕ цардӕй райгонд цӕй фӕрцы уыдзынӕ?

ДӔ ЦАРДӔЙ райгонд цӕй фӕрцы уыдзынӕ? Зӕгъӕм, алы адӕймагӕн дӕр йӕ бон у хъуыды кӕнын, йӕ абоны уынаффӕтӕ йӕ райсом цӕмӕ ’ркӕндзысты, ууыл. Уыцы диссаджы миниуӕгӕй дӕуӕн дӕр дӕ бон у пайда кӕнын.

Цыбыр рӕстӕгмӕ нӕ, фӕлӕ цӕрӕнбонтӕм пайда чи хӕсдзӕн, ахӕм уынаффӕтӕ хӕссын ӕнцон нӕу. Цӕуылнӕ? Уымӕн ӕмӕ бирӕтӕ хӕст сты ахӕм зондыл: мӕн хъӕуы бирӕ ӕмӕ ныртӕккӕ. Зӕгъӕм, адӕймаг ӕмбары, Библийы уынаффӕтӕй куы пайда кӕна, уӕд йӕ бинонтӕ кӕрӕдзимӕ ӕнгомдӕр кӕй уыдзысты (Ефесӕгтӕм 5:22–6:4). Фӕлӕ бинонты амонд ӕнӕ фыдӕбонӕй нӕй. Ӕмӕ кӕд абон адӕмӕн куыстыл, улӕфыныл ӕмӕ ирхӕфсӕнтыл бирӕ рӕстӕг цӕуы, уӕддӕр архайын хъӕуы, цӕмӕй, дӕ бинонтимӕ фаг рӕстӕг ӕрвитай. Царды алы хъуыддаджы дӕр фӕхъӕуы равзарын, сӕйрагдӕр дын цы у, уый: рӕстӕгмӕйы циндзинад ӕви цӕмӕй цӕрӕнбонты дӕ цардӕй райгонд уай. Уӕдӕ дын раст уынаффӕтӕ хӕссынӕн цы баххуыс кӕндзӕн? Аныхас кӕнӕм цыппар хъуыддагыл.

1 Дӕ уынаффӕтӕ цӕмӕ ’ркӕндзысты, ууыл хъуыды кӕн

Уынаффӕ хӕсгӕйӕ-иу дзӕбӕх ахъуыды кӕн: афтӕ куы бакӕнон, уӕд мӕ уый цӕмӕ ’ркӕндзӕн? Библийы фыст ис: «Ӕмбаргӕ адӕймаг фыдбылыз уыны ӕмӕ дзы йӕхи хизы» (Ӕмбисӕндтӕ 22:3). Дӕ уынаффӕ дӕ цӕмӕ ’ркӕндзӕн, ууыл хъуыды кӕнгӕйӕ дӕхи куы нӕ сайай, уӕд, ӕвӕццӕгӕн, тӕссаг фӕндагыл не ’рлӕудзынӕ. Иннӕмӕй та ууыл куы хъуыды кӕнай, ӕмӕ дын дӕ уынаффӕ цыбыр рӕстӕгмӕ нӕ, фӕлӕ цӕрӕнбонтӕм кӕй фӕуыдзӕн пайда, уӕд дын, раст куыд у, афтӕ бакӕнын ӕнцондӕр уыдзӕн.

Ахъуыды кӕн: «Абон цы уынаффӕ рахастон, уый мӕ иу азы фӕстӕ, 10 кӕнӕ 20 азы фӕстӕ цӕмӕ ’ркӕндзӕн? Ме ’нӕниздзинадыл куыд фӕзындзӕн, стӕй, мӕ зӕрдӕйы цы фарн ис, уый, мыййаг, нӕ фесӕфдзӕн? Куыд фӕзындзӕн мӕ бинонтыл ӕмӕ, ме ’ххуысхъуаг чи у, уыцы адӕмыл?» Фӕлӕ сӕйраджыдӕр та ахъуыды кӕнут ахӕм фарстатыл: «Цы уынаффӕ рахастон, уый Йегъовӕйы зӕрдӕмӕ фӕцӕудзӕн? Йӕ зӕрдӕ йын нӕ фӕриссын кӕндзынӕн?» Библи у Хуыцауы фӕндӕй фыст, ӕмӕ уын уый баххуыс кӕндзӕн, Хуыцау хорзыл цы нымайы ӕмӕ ӕвзӕрыл цы нымайы, уый бамбарынӕн ӕмӕ уӕ рӕдийын нӕ бауадздзӕн (Ӕмбисӕндтӕ 14:12; 2 Тимофеймӕ 3:16).

2 Искӕй зондӕй ма цӕр

Бирӕтӕ сӕхи зондӕй нӕ хъуыды кӕнынц, фӕлӕ иннӕтӕм кӕсынц, ӕмӕ уыдоны фӕзмынц. Фӕлӕ афтӕ зӕгъӕн нӕй, ӕмӕ адӕмӕн сӕ фылдӕр куыд цӕрынц, афтӕ куы цӕрай, уӕд амондджын уыдзынӕ. Уӕдӕ искӕй зондӕй ма цӕр. Ӕркӕсӕм Наталийы хабармӕa. Натали загъта: «Тынг мӕ фӕндыд смой кӕнын ӕмӕ амондджынӕй цӕрын. Фӕлӕ йӕ ’мбӕрстон, ӕз куыд цардтӕн, афтӕ цӕргӕйӕ амондджын кӕй никуы уыдзынӕн. Колледжы ме ’мбӕлттӕ иууылдӕр уыдысты тынг зондджын. Фӕлӕ-иу сӕ царды цы уынаффӕтӕ рахастой, уыдон зондджын схонӕн нӕ уыд. Ног уарзон скӕнын сӕм ӕппындӕр ницы каст. Мӕхицӕн дӕр уыд цалдӕр уарзоны. Уыцы цард мын бирӕ рыст бавзарын кодта».

Натали райдыдта Йегъовӕйы Ӕвдисӕнтимӕ Библи ахуыр кӕнын. Мӕнӕ цы дзуры йӕхӕдӕг: «Йегъовӕйы Ӕвдисӕнты ’хсӕн федтон амондджын ӕрыгон фӕсивӕд ӕмӕ ӕнгом бинонтӕ. Кӕд мын ӕнцон нӕ уыд, уӕддӕр, рӕстӕг куыд цыд, афтӕ цардмӕ ӕндӕр цӕстӕй кӕсын райдыдтон ӕмӕ мӕ цардыуаг аивтон». Цымӕ йын уый исты ’ххуыс фӕци? Натали дарддӕр дзуры: «Цӕрӕнбонты мӕ фӕндыд, аргъ кӕмӕн кодтаин, ахӕм адӕймагмӕ смой кӕнын. Цасдӕр рӕстӕг куы рацыд, уӕд мӕ цард баиу кодтон, иу диныл хӕст кӕимӕ стӕм, ахӕм нӕлгоймагимӕ. Хуыцауы фӕрцы абон дӕн, ӕнхъӕл дӕр куыд нӕ уыдтӕн, афтӕ амондджын».

3 Цардмӕ иу боны цӕстӕй ма кӕс

Цавӕр цардмӕ бӕллыс ӕмӕ дӕ къухы куыд бафтдзӕн, уый бӕлвырдӕй куы зонай, уӕд цардмӕ иу боны цӕстӕй нӕ кӕсдзынӕ (Ӕмбисӕндтӕ 21:5). Фидӕнмӕ пълӕнттӕ кӕнгӕйӕ ӕрмӕст 70 кӕнӕ 80 азыл ма хъуыды кӕнут, фӕлӕ-иу уӕ цӕстытыл ауайын кӕнут, Библи зӕрдӕ кӕмӕй ӕвӕры, уыцы цард куы ралӕууа, уӕд ӕнустӕм амондджынӕй куыд цӕрдзыстут, уый.

Библийы фыст ис, Йесо Чырысти йӕ цард адӕмы тыххӕй нывондӕн кӕй ӕрхаста, уый фӕрцы Хуыцау алкӕмӕндӕр ӕнустӕм цӕрыны фадат кӕй дӕтты (Матфейы 20:28; Ромӕгтӕм 6:23). Хуыцау ныфс ӕвӕры, ӕппӕты райдианы йӕм адӕмы ӕмӕ зӕххы тыххӕй цы фӕнд уыд, уый кӕй сӕххӕст кӕндзӕн. Хуыцауы чи уарзы, уыдон ӕнустӕм зӕххыл дзӕнӕты цӕрдзысты (Псалом 37:11; Раргомад 21:3–5). Ды дӕр цардмӕ иу боны цӕстӕй куы нӕ кӕсай, уӕд дӕумӕ дӕр ахӕм фидӕн ӕнхъӕлмӕ кӕсы.

4 Архай, цӕмӕй дӕ нысӕнттӕ дӕ къухы бафтой

Цӕмӕй дӕ Хуыцау ӕнусон цардӕй схайджын кӕна, уый тыххӕй дӕ цы кӕнын хъӕуы? Уый тыххӕй уал дӕ фыццаг хъӕуы Хуыцауы базонын (Иоанны 17:3). Библийы бӕлвырдӕй цы фыст ис, уый куы базонай, уӕд дӕ фидарӕй бауырндзӕн, Хуыцау зӕрдӕ цӕмӕй ӕвӕры, уый ӕнӕмӕнгӕй кӕй сӕххӕст уыдзӕн. Ахӕм уырнындзинад та дын баххуыс кӕндзӕн, цӕмӕй дӕ цард аивай ӕмӕ Хуыцауы зӕрдӕ рухс кӕнай.

Ӕркӕсӕм Майклы хабармӕ. Майкл дзуры: «12 азы мыл куы цыд, уӕд нозтыл ӕмӕ наркотиктыл бафтыдтӕн. Ӕз уыдтӕн фыдгӕнджыты бандӕйы ӕмӕ хъуыды кодтон, 30 азы дӕр кӕй нӕ фӕцӕрдзынӕн. Уыдтӕн тынг мӕстыгӕр, мӕ зӕрдӕ ницӕмӕй рухс кодта, ӕмӕ цалдӕр хатты мӕхи марынмӕ дӕр хъавыдтӕн. Ӕмбӕрстон ӕй, адӕймаг ӕрмӕст уый тыххӕй кӕй нӕ райгуыры, цӕмӕй фӕстагмӕ амӕла. Фӕлӕ цӕмӕн цӕрӕм, уыцы фарстайӕн дзуапп ссарын мӕ бон нӕ уыд». Майкл ма скъолайы куы ахуыр кодта, уӕд сӕ бандӕйӕ иу лӕппу Йегъовӕйы Ӕвдисӕнтимӕ Библи ахуыр кӕнын райдыдта, ӕмӕ уӕд Майклы дӕр бафӕндыд.

Майкл Библийӕ цы базыдта, уый фӕрцы фидӕнмӕ ӕндӕр цӕстӕй кӕсын райдыдта. Майкл дзуры: «Ӕз базыдтон, фидӕны зӕхх дзӕнӕт кӕй суыдзӕн ӕмӕ адӕм кӕй цӕрдзысты, зындзинӕдтӕ кӕм нал уыдзӕн, уыцы дунейы. Ӕмӕ мӕн дӕр бафӕндыд ахӕм дунейы цӕрын. Мӕхицӕн загътон, хъуамӕ Йегъовӕйы ӕмбал суон. Фӕлӕ йӕ зӕгъынӕй йӕ саразын зындӕр разынд. Библи ахуыр кӕнын куы райдыдтон, уӕд дӕр ма цалдӕр хатты тынг срасыг дӕн, стӕй иу чызгимӕ ӕмуат ӕрцыдтӕн».

Фӕлӕ уӕддӕр Майклӕн цы баххуыс кодта, цӕмӕй йӕ раздӕры хъуыддӕгтӕ ныууагътаид? Майкл дзуры: «Библи кӕимӕ ахуыр кодтон, уый мын загъта, цӕмӕй алы бон дӕр Библи кастаин ӕмӕ мӕ рӕстӕг, Хуыцауы зӕрдӕ рухс кӕнын кӕй фӕнды, уыдонимӕ ’рвыстаин. Ӕз ӕй бамбӕрстон, кӕд Библи ахуыр кодтон, уӕддӕр ма мӕ раздӕры ’мбӕлтты зондыл кӕй цыдтӕн. Ӕмӕ мын кӕд мӕ бинонтӕй уӕлдай нӕ уыдысты, уӕддӕр сӕ мӕхи хизын райдыдтон».

Цӕмӕй Майклӕн йӕ сӕйраг нысан йӕ къухы бафтыдаид, ома йӕ цардӕй Хуыцауы зӕрдӕ рухс кодтаид, уый тыххӕй йӕ разы сӕвӕрдта гыццыл нысӕнттӕ, ӕмӕ дзы чи куыд ахсджиагдӕр уыд, уымӕ гӕсгӕ сӕ ӕххӕст кӕнын райдыдта. Дӕуӕн дӕр дӕ бон у афтӕ бакӕнын. Ныффысс, цавӕр стыр нысанмӕ тырныс, уый, стӕй, дӕ къухы кӕй фӕрцы бафтдзӕн, уыцы гыццыл нысӕнттӕ. Дӕ размӕ цавӕр нысӕнттӕ сӕвӕрдтай, уый радзур, чи дын баххуыс кӕндзӕн, уыдонӕн ӕмӕ сын зӕгъ, цӕмӕй дын дзурой, дӕ къухы-иу цы бафта, уый.

Хуыцауы тыххӕй базоныныл ӕмӕ дӕ цард йӕ закъӕттӕм гӕсгӕ аразыныл фӕстиат ма кӕн, фӕлӕ архайын райдай, цӕмӕй Хуыцауы ӕмӕ йын йӕ Ныхас бауарзай. Хуыцауы закъӕттӕм гӕсгӕ йӕ цард чи аразы, ахӕм адӕймаджы тыххӕй Библийы фыст ис: «Цыфӕнды ма араза – алцыдӕр ын бантысдзӕн» (Псалом 1:1–3).

[Фиппаинаг]