Дӕ нысӕнттӕ дӕ къухы куыд бафтдзысты
1. Ӕрыгон чырыстӕттӕй бирӕтӕ сӕ разы цавӕр нысӕнттӕ ӕвӕрынц?
1 Ӕнӕдызӕрдыгӕй, дӕуӕн, ӕрыгон чырыстонӕн, дӕ нысӕнттыл ӕнӕфӕзынгӕ нӕ фесты, Иегъовӕйы кӕй уарзыс, уый, ӕмӕ Йесо ӕппӕт чырыстӕттӕн дӕр кӕй загъта, уыцы ныхӕстӕ – фыццаджыдӕр агурут Хуыцауы Паддзахад, зӕгъгӕ (Матф. 6:33). Чи зоны дӕ нысан у пионерӕй лӕггад кӕнын кӕнӕ дӕ фӕнды, фылдӕр хъусынгӕнджытӕ кӕм хъӕуы, уырдӕм ацӕуын. Кӕйдӕрты та фӕнды Паддзахады залтӕ арӕзын, йе та Вефилы кӕнӕ миссионерӕй лӕггад кӕнын. Уыдон сты хорз ӕмӕ раппӕлинаг нысӕнттӕ!
2. Цы дын баххуыс кӕндзӕн, цӕмӕй дӕ нысан дӕ къухы бафта?
2 Цӕмӕй уырнындзинады дӕ нысӕнттӕ дӕ къухы бафтой, уымӕн ахъаз уыдзӕн, гӕххӕттыл сӕ куы ныффыссай, уый. 2004 азы 15 июлы «Хъахъхъӕнӕн мӕсыг»-ы (уыр.) дзырдӕуы: «Ӕбӕрӕг хъуыдытӕ хуыздӕр бамбарӕн вӕййы, ныхасӕй сӕ куы фӕзӕгъӕм, уӕд. Уымӕ гӕсгӕ хорз вӕййы, нӕ нысӕнттӕ ӕмӕ сӕ куыд ӕххӕст кӕндзыстӕм, уый гӕххӕттыл ныффыссын». Уымӕй уӕлдай ма, дӕ разы гыццыл нысӕнттӕ куы ӕвӕрай, уӕд дын уый ӕххуыс кӕндзӕн де ’нтыстытӕ уынын ӕмӕ дӕ сӕйраг нысан дӕ хъуыдыйы дарынӕн.
3. Ранымай, донаргъуыд райсынӕн чи баххуыс кӕна, ахӕм гыццыл нысӕнттӕй иуӕй-иутӕ.
3 Гыццыл нысӕнттӕ. Кӕд донаргъуыд нӕма райстай, уӕд ахъуыды кӕн, цы дын баххуыс кӕндзӕн, цӕмӕй уыцы нысан дӕ къухы бафта. Чи зоны дӕ хуыздӕр базонын хъӕуы Библийы сӕйраг ахуырӕдтӕ. Кӕд хъуыддаг афтӕ у, уӕд дӕхицӕн нысан сӕвӕр: чиныг «Библи бӕлвырдӕй цы дзуры?» лӕмбынӕг равзарын, ӕмӕ дзы цы стихтӕ ис, уыдон иууылдӕр бакӕсын (1 Тим. 4:15). Стӕй ма нысан сӕвӕр, Библи ӕнӕхъӕнӕй бакӕсын, Уӕвынадӕй – Раргомады онг, Вефилы чи лӕггад кӕны ӕмӕ Галаады скъолайы чи ахуыр кӕны, уыдон куыд кӕнынц, афтӕ. Уый фӕстӕ дӕр уыцы хорз ахуыр ма фесаф ӕмӕ алы бон дӕр кӕс Библи (Пс. 1:2, 3). Ахъуыды ма кӕн, афтӕмӕй дӕ уырнындзинад куыд бафидар уыдзӕн! Библи кӕсыны размӕ ӕмӕ йӕ кӕроны дӕр зӕрдиагӕй кув Хуыцаумӕ, ӕмӕ цы базоныс, уымӕ гӕсгӕ архай (Иак. 1:25).
4. Вефилы кӕнӕ миссионерӕй лӕггад кӕнын кӕй фӕнды, уыдонӕн цавӕр гыццыл нысӕнттӕ у сӕ бон сӕвӕрын?
4 Кӕд донаргъуыд дӕ, уӕд та цавӕр нысӕнттӕ ис ӕвӕрӕн? Мыййаг, куыд хъусын кӕныс, уый дӕ фӕхуыздӕр кӕнын хъӕуы? Зӕгъӕм, дӕ бон у нысан сӕвӕрын Хуыцауы Ныхасӕй уацамынды арӕхстджындӕрӕй пайда кӕнын? (2 Тим. 2:15). Куыд у дӕ бон фылдӕр лӕггад кӕнын та? Дӕ разы сӕвӕр ахӕм бӕлвырд гыццыл нысӕнттӕ, дӕ кар ӕмӕ дӕ уавӕртӕм гӕсгӕ чи уа, ӕмӕ дӕ сӕйраг нысан дӕ къухы цӕй фӕрцы бафта.
5. Иу ӕфсымӕр гыццыл нысӕнттӕ кӕй ӕвӕрдта, уый руаджы йӕ сӕйраг нысан – Вефилы лӕггад кӕнын – йӕ къухы куыд бафтыд?
5 Йӕ нысан йӕ къухы бафтыд. Тонийыл 19 азы куы цыд, уӕд ацыд Иегъовӕйы Ӕвдисӕнты Филиал фенынмӕ ӕмӕ йӕ уый фӕстӕ тынг бафӕндыд Вефилы лӕггад кӕнын. Фӕлӕ йӕ царды уаг хӕрзтӕй нӕ уыд, стӕй Хуыцауӕн нывонддзырд дӕр нӕма радта. Тони сфӕнд кодта Иегъовӕйы уагӕвӕрдтӕм гӕсгӕ цӕрын ӕмӕ йӕхицӕн нысан сӕвӕрдта – донаргъуыд райсынмӕ бацӕттӕ кӕнын. Уыцы нысан йӕ къухы куы бафтыд, уӕд та нысан сӕвӕрдта ӕххуысгӕнӕг, стӕй та ӕххӕстрӕстӕг пионерӕй лӕггад кӕнын, ӕмӕ къӕлиндары ныффыста, лӕггад кӕнын кӕд райдайдзӕн, уый. Ахъуыды ма кӕн, куыд цин кодта, иуцасдӕр пионерӕй куы алӕггад кодта, уый фӕстӕ йӕ Вефилмӕ куы фӕхуыдтой, уӕд!
6. Цы дын баххуыс кӕндзӕн, цӕмӕй рӕстдзинады фӕндагыл дӕ разы цы нысӕнттӕ ӕвӕрыс, уыдон дӕ къухы бафтой?
6 Рӕстдзинады фӕндагыл дӕ разы цы нысӕнттӕ ӕвӕрыс, уыдон дӕуӕн дӕр дӕ къухы бафтдзысты, Хуыцауы Паддзахады хъуыддӕгтӕ дӕ царды фыццаг бынаты куы ӕвӕрай, уӕд. Куывды «дӕ хъуыддӕгты» тыххӕй Иегъовӕйӕн дзур ӕмӕ сӕ сӕххӕст кӕныныл зӕрдиагӕй архай (Ӕмб. 16:3; 21:5).