Мӕлӕтӕн йӕ «фат»

Мӕлӕты кой кӕнын бирӕтӕ нӕ уарзынц. Фӕлӕ абон уа ӕви райсом – мӕлӕт алкӕй дӕр баййафдзӕн. Йӕ «фат» у цыргъ ӕмӕ риссаг.

Ныййарӕджы, цардӕмбалы кӕнӕ хъӕбулы мӕлӕтмӕ цӕттӕ никуы ничи вӕййы. Бӕллӕх, чи зоны, ӕрцӕуа ӕнӕнхъӕлӕджы кӕнӕ сабыргай хӕстӕгӕй-хӕстӕгдӕр кӕна ӕмӕ йын бауромӕн мауал уа. Куыдфӕнды ма уа, мӕлӕт цы рыст бавзарын кӕны, уымӕй хи бахизӕн нӕй. Адӕймагӕн афтӕ зын вӕййы, ӕмӕ йӕм цӕрын дӕр нал фӕцӕуы.

Антониойӕн йӕ фыды машинӕ скъуырдта, ӕмӕ амард. Антонио зӕгъы: «Цыма мын чидӕр мӕ хӕдзары дуарыл гуыдыр сӕвӕрдта ӕмӕ дӕгъӕлтӕ йемӕ ахаста, афтӕ фӕдӕн. Дӕ хӕдзармӕ бахизай ӕмӕ дзы иу гыццыл алӕууай, уый бар дӕр дын нӕй. Ӕрмӕст ма мысыс, цы уыди, уый. Дӕ цард фӕивта. Цы ’рцыд, уый дӕ бӕргӕ нӕ уырны, уымӕн ӕмӕ дӕм раст нӕ кӕсы. Фӕлӕ уӕддӕр дӕ бон ницы у».

Дороти идӕдзӕй баззад, 47 азы йыл куы цыд, уӕд. Цы фарстатӕ йӕм фӕзынд, уыдонӕн дзуапп агурын райдыдта. Дороти куыста ахуыргӕнӕгӕй англиканон аргъуаны скъолайы ӕмӕ йӕ никуы уырныдта, чи амард, уыдонӕн кӕй ницыуал ныфс ис, уый. Фӕлӕ цавӕр ныфс, уый бӕлвырдӕй нӕ зыдта, ӕмӕ сауджыны бафарста, мӕрдты исты ис, зӕгъгӕ. Сауджын ын дзуапп радта: «Уый ничи зоны. Банхъӕлмӕ кӕсӕм, ӕмӕ йӕ фендзыстӕм».

«Банхъӕлмӕ кӕсӕм, ӕмӕ йӕ фендзыстӕм» – ӕндӕр нӕ бон ницы у? Мӕрдтӕн ма исты ныфс ис ӕви нӕ, уый ӕцӕгдӕр нӕй базонӕн?