Уырнындзинад дӕм уӕд, ӕмӕ зондджын уынаффӕтӕ хӕсс!

1. Каин раст уынаффӕ цӕуылнӕ рахаста ӕмӕ уый цӕмӕ ӕркодта?

КАИНЫ хъуыди ахсджиаг уынаффӕ рахӕссын: кӕнӕ йӕ тӕригъӕдджын ӕнкъарӕнтыл фӕтых уыдзӕн, ӕмӕ уыдзӕн амондджын, кӕнӕ та йӕ зӕрдӕйы фӕдыл ацӕудзӕн, ӕмӕ стыр бӕллӕхты хай бауыдзӕн. Куыд ӕй зонӕм, афтӕмӕй Каин раст уынаффӕ нӕ рахаста, ӕмӕ уый цӕмӕ ӕркодта, уый дӕр хорз зонӕм. Йе ’фсымӕр Авелы амардта ӕмӕ йе Сфӕлдисӕджы хорзӕхӕй ӕнӕхай фӕци (Райд. 4:3–16).

2. Раст уынаффӕтӕ хӕссын ахсджиаг цӕмӕн у?

² Махӕй алкӕй дӕр фӕхъӕуы уынаффӕтӕ хӕссын ӕмӕ цавӕрдӕр фарстатӕ скъуыддзаг кӕнын. Иуӕй-иутӕ вӕййынц тынг ахсджиаг, иннӕтӕ та – нӕ. Фӕлӕ нӕ уынаффӕтӕй бирӕтӕ нӕ цардыл тынг фӕзынынц. Раст уынаффӕтӕ куы рахӕссӕм, уӕд нӕхи бирӕ мӕстытӕй бахизӕм ӕмӕ нӕ цард вӕййы фӕрнӕйдзаг. Фӕлӕ ӕвзӕр уынаффӕтӕ куы рахӕссӕм, уӕд та нӕ цард схӕццӕтӕ вӕййы, нӕхи масты хай бакӕнӕм ӕмӕ фӕфыдӕнхъӕл вӕййӕм (Ӕмб. 14:8).

3. а) Цӕмӕй зондджын уынаффӕтӕ хӕссӕм, уый тыххӕй цӕуыл хъуамӕ ӕууӕндӕм? б) Цавӕр фарстатӕм ӕркӕсдзыстӕм?

³ Цы нын баххуыс кӕндзӕн зондӕй архайынӕн ӕмӕ раст уынаффӕтӕ хӕссынӕн? Хъуамӕ ӕнӕмӕнг Хуыцауыл ӕууӕндӕм ӕмӕ ма дызӕрдыг кӕнӕм, кӕй йӕ фӕнды махӕн баххуыс кӕнын ӕмӕ нын раст уынаффӕтӕ хӕссынӕн зонд кӕй дӕтдзӕн. Стӕй ма хъуамӕ ӕууӕндӕм йӕ Ныхасыл дӕр ӕмӕ дзы цы уынаффӕтӕ ис, уыдоныл дӕр. (Бакӕс Иаковы 1:5–8.) Йегъовӕмӕ цас ӕввахсдӕр кӕнӕм ӕмӕ йын йӕ Ныхас цас фылдӕр уарзӕм, уыйас хуыздӕр ӕмбардзыстӕм, цы нӕ хъӕуы, уый Йегъовӕйӕ хуыздӕр кӕй ничи зоны. Ӕмӕ афтӕмӕй сахуыр уыдзыстӕм уынаффӕтӕ хӕссыны размӕ йӕ Ныхасы разамынд агурын. Фӕлӕ нын цы баххуыс кӕндзӕн, цӕмӕй нын уынаффӕтӕ хӕссын ноджы хуыздӕр уайа? Ӕмӕ иугӕр уынаффӕ рахастам, уӕд ын аивӕн нал ис?

АЛКӔЙ ДӔР ХЪӔУЫ УЫНАФФӔТӔ ХӔССЫН

4. Адамы цавӕр уынаффӕ хъуыди рахӕссын ӕмӕ йӕ уынаффӕ цӕмӕ ӕркодта?

⁴ Адӕм зӕххыл куы фӕзындысты, уӕдӕй фӕстӕмӕ сӕ алкӕддӕр хъуыди ахсджиаг уынаффӕтӕ хӕссын. Адамы хъуыди равзарын, йе Сфӕлдисӕджы ныхасмӕ байхъусдзӕн ӕви Евӕйы ныхасмӕ. Ӕмӕ уынаффӕ рахаста. Фӕлӕ цавӕр? Байхъуыста Евӕмӕ. Ӕмӕ уый йӕ лӕгӕн цы уынаффӕ рахӕссын кодта, уымӕй ӕвзӕрдӕр уынаффӕйӕн рахӕссӕн нӕ уыд. Уый тыххӕй Йегъовӕ Адамы дзӕнӕтӕй ратардта, ӕмӕ ӕппынфӕстаг амард. Ӕмӕ ма абон мах дӕр йӕ уынаффӕйы тыххӕй тухӕнӕй мӕлӕм.

5. Уынаффӕтӕ хӕссын нӕ кӕй фӕхъӕуы, уымӕ цы цӕстӕй хъуамӕ кӕсӕм?

⁵ Иуӕй-иутӕм афтӕ кӕсы, ӕмӕ сӕ уынаффӕтӕ хӕссын ӕппындӕр куы нӕ хъӕуид, уӕд хуыздӕр уаид. Ды дӕр, мыййаг, афтӕ хъуыды кӕныс? Фӕлӕ нӕ хъуамӕ рох ма уа, Йегъовӕ нӕ роботты хуызӕн кӕй не скодта – робот йӕхӕдӕг хъуыды нӕ кӕны ӕмӕ йӕ бон нӕу уынаффӕтӕ хӕссын. Уый нын радта йӕ Ныхас, ӕмӕ нын Библи амоны, зондджын уынаффӕтӕ хӕссын куыд хъӕуы, уый. Йегъовӕйы фӕнды, цӕмӕй уынаффӕтӕ хӕссын зонӕм, ӕмӕ ма нын уый пайда дӕр у.

6, 7. Израилӕгты цавӕр уынаффӕ хъуыд рахӕссын ӕмӕ сын уый зын цӕмӕн уыд? (Кӕс нывмӕ статьяйы райдианы.)

⁶ Израилӕгтӕ Зӕрдӕвӕрд зӕххыл куы ’рцардысты, уӕд сӕ хъуыди равзарын: Йегъовӕйӕн кувдзысты ӕви ӕндӕр хуыцӕуттӕн. (Бакӕс Йесо Навин 24:15.) Исчи зӕгъдзӕн, уый аскъуыддзаг кӕнын афтӕ зын нӕ уыд, зӕгъгӕ. Фӕлӕ уыцы уынаффӕ тынг ахсджиаг уыд, уымӕн ӕмӕ ууыл баст уыд сӕ цард. Тӕрхонгӕнджыты заман израилӕгтӕ ӕдзухдӕр хастой ӕвзӕр уынаффӕтӕ. Йегъовӕйӕн-иу нал куывтой ӕмӕ та-иу мӕнг хуыцӕуттӕн кувын райдыдтой (Тӕрх. 2:3, 11–23). Уый фӕстӕ та сӕ пехуымпар Илийайы рӕстӕджы хъуыди аскъуыддзаг кӕнын, Йегъовӕйӕн лӕггад кӕндзысты ӕви мӕнг хуыцау Ваалӕн (1 Пад. 18:21). Чи зоны, зӕгъай, уый дӕр зын аскъуыддзаг кӕнӕн нӕ уыд, зӕгъгӕ, уымӕн ӕмӕ Йегъовӕйӕн лӕггад кӕнын алкӕддӕр ӕппӕты хуыздӕр у. Ӕмӕ ӕцӕгдӕр, иу ӕмбаргӕ адӕймаджы дӕр нӕ бафӕнддзӕн цавӕрдӕр ӕнӕуд хуыцауӕн кувын. Фӕлӕ израилӕгтӕн сӕ бон нӕ уыд уынаффӕ рахӕссын. Библийы фыст ис, зӕгъгӕ, уыдон уыдысты «къуылых сӕ дыууӕ къахӕй», дыууӕрдӕм кодтой. Ӕмӕ сӕ Илийа разӕнгард кодта, цӕмӕй, ӕппӕты хуыздӕр цы уыд, уый равзӕрстаиккой – Йегъовӕйӕн куывтаиккой.

⁷ Цымӕ уыцы израилӕгтӕн зондджын уынаффӕ рахӕссын зын цӕмӕн уыди? Иуӕй уымӕн, ӕмӕ Йегъовӕйыл нал ӕууӕндыдысты ӕмӕ йӕм нал хъуыстой. Уыдон сӕ зӕрдӕ Йегъовӕйыл нӕ дардтой, стӕй нӕ архайдтой, цӕмӕй йӕ хуыздӕр базыдтаиккой кӕнӕ йӕ зондӕй архайдтаиккой. Афтӕ куы кодтаиккой, уӕд, цы базыдтаиккой, уый фӕрцы сӕ бон уыдаид зондджын уынаффӕтӕ хӕссын (Пс. 25:12). Иннӕмӕй та израилӕгтыл ӕндӕвта иннӕ адӕмты зондахаст, ӕмӕ, Йегъовӕйӕн чи нӕ лӕггад кодта, уыдон ма-иу суанг сӕ бӕсты дӕр уынаффӕтӕ хастой. Ӕмӕ фӕстагмӕ израилӕгтӕ сӕ фӕдыл ацыдысты ӕмӕ сӕ мӕнг хуыцӕуттӕн кувыныл бафтыдысты. Афтӕмӕй та сӕ Йегъовӕ уый тыххӕй кӕд ӕмӕ кӕд бафӕдзӕхста (Рац. 23:2).

ИННӔТӔ НӔ БӔСТЫ ХЪУАМӔ УЫНАФФӔТӔ ХӔССОЙ?

8. Израилӕгты хабар нын зондзонӕн куыд у?

⁸ Израилӕгты хабарӕй бӕрӕг у, ӕмӕ нӕ кӕд фӕнды зондджын уынаффӕтӕ хӕссын, уӕд-иу хъуамӕ разамынд Хуыцауы Ныхасы агурӕм. Галатӕгтӕм 6:5 стихы цы фыст ис, уымӕ гӕсгӕ алчидӕр уынаффӕтӕ хъуамӕ йӕхӕдӕг хӕсса, ӕмӕ уыцы хӕс хъуамӕ иннӕтыл ма ӕвӕрӕм. Хъуамӕ-иу алчидӕр йӕхӕдӕг базона, Хуыцаумӕ раст цы кӕсы, уый, ӕмӕ-иу стӕй уымӕ гӕсгӕ архайа.

9. Иннӕты нӕ бӕсты уынаффӕтӕ хӕссын куы уадзӕм, уӕд нын тӕссаг цӕмӕй уыдзӕн?

⁹ Афтӕ куыд рауайы, ӕмӕ иннӕты нӕ бӕсты уынаффӕтӕ хӕссын бауадзӕм? Сӕ зондмӕ сын куы фӕхъусӕм ӕмӕ афтӕмӕй ӕвзӕр уынаффӕ куы рахӕссӕм (Ӕмб. 1:10, 15). Уый тынг тӕссаг у. Нӕ хӕс у, цӕмӕй, Библимӕ гӕсгӕ не ’фсарм куыд ахуыр у, афтӕ архайӕм. Кӕд иннӕтӕн бар дӕттӕм, цӕмӕй нӕ бӕсты уынаффӕтӕ хӕссой, уӕд зӕгъӕн ис, ӕмӕ уӕддӕр уынаффӕ рахастам – «семӕ... ацыдыстӕм». Ӕмӕ нӕ ахӕм уынаффӕ та бӕллӕхты баппардзӕн.

10. Павел галатӕгты цӕмӕй фӕдзӕхста?

¹⁰ Апостол Павел галатӕгты фӕдзӕхста, цӕмӕй иннӕты ма уагътаиккой сӕ бӕсты уынаффӕтӕ хӕссын. (Бакӕс Галатӕгтӕм 4:17.) Се ’мбырды иуӕй-иу ӕфсымӕрты фӕндыд иннӕты бӕсты уынаффӕтӕ хӕссын. Цӕмӕн? Уыцы хиуарзон нӕлгоймӕгты фӕндыд, цӕмӕй иннӕ чырыстӕттӕ апостолты фӕдыл нӕ, фӕлӕ сӕ фӕдыл цыдаиккой. Уыдон сӕхицӕн кад агуырдтой, ӕмӕ се ’фсымӕртӕн уынаффӕтӕ хӕссыны бар кӕй уыд, уымӕн нӕ аргъ кодтой.

11. Искӕй уынаффӕ рахӕссын куы хъӕуа, уӕд ын нӕ бон куыд у баххуыс кӕнын?

¹¹ Ацы хъуыддаджы нын фӕзминаг у апостол Павел. Уый зыдта, йе ’фсымӕртӕн уынаффӕтӕ хӕссыны бар кӕй ис, ӕмӕ сын йӕхи хицау нӕ кодта. (Бакӕс 2 Коринфӕгтӕм 1:24.) Ӕмӕ хистӕр нӕлгоймӕгтӕн дӕр сӕ бон у афтӕ кӕнын, искӕй исты аскъуыддзаг кӕнын куы хъӕуа ӕмӕ йын уынаффӕ куы дӕттой, уӕд. Библийӕ цы фӕзонынц, уый сӕ хотӕ ӕмӕ се ’фсымӕртӕн нӕ бавгъау кӕнынц. Фӕлӕ хъуамӕ ӕмбарой, кӕцыдӕр хъуыддӕгты алы чырыстон дӕр йӕхӕдӕг кӕй хъуамӕ рахӕсса уынаффӕ, уымӕн ӕмӕ йӕхӕдӕг дӕтдзӕн дзуапп йӕ уынаффӕйы тыххӕй. Хъӕуы нӕ иу ахсджиаг хъуыды нӕ зӕрдыл дарын: искӕй исты аскъуыддзаг кӕнын куы хъӕуа, уӕд ын нӕ бон у баххуыс кӕнын, Библийы цы уагӕвӕрдтӕ ӕмӕ уынаффӕтӕ ис, уыдон ссарынӕн. Фӕлӕ нӕ хотӕ ӕмӕ не ’фсымӕртӕн ис бар, стӕй сыл ис хӕс дӕр, цӕмӕй уынаффӕтӕ сӕхӕдӕг хӕссой. Раст уынаффӕ куы рахӕссынц, уӕд сын уый ӕрхӕссы пайда. Уӕдӕ хъуамӕ афтӕ макуы хъуыды кӕнӕм, ӕмӕ нын ис бар, цӕмӕй иннӕты бӕсты уынаффӕтӕ хӕссӕм.

УЫНАФФӔ ХӔСГӔЙӔ ДӔ ЗӔРДӔЙЫ ФӔДЫЛ МА ЦУ

12, 13. Мӕстыйӕ кӕнӕ ныфссастӕй уынаффӕтӕ хӕссын тӕссаг цӕмӕй у?

¹² Ис ахӕм ныхас, дӕ зӕрдӕ дын цы дзуры, уымӕ хъус, зӕгъгӕ. Фӕлӕ уый арӕх хорзӕй ницӕмӕ ӕркӕны. Библи нӕ фӕдзӕхсы, цӕмӕй, уынаффӕ куы хӕссӕм, уӕд не ’нӕххӕст зӕрдӕмӕ ма хъусӕм (Ӕмб. 28:26). Нӕ зӕрдӕйыл ӕууӕнк нӕй, уымӕн ӕмӕ «зӕрдӕйӕ мӕнгарддӕр ӕмӕ фыдбылыздӕр ницы ис» (Йер. 17:9). Адӕймаг йе ’нӕххӕст зӕрдӕйы фӕдыл куы ацӕуы, уӕд уый бӕллӕхтӕм кӕй ӕркӕны, уымӕн Библийы ис бирӕ цӕвиттонтӕ (Йер. 3:17; 13:10; 1 Пад. 11:9). Уӕдӕ нӕм нӕ зӕрдӕ цы дзуры, уый куы аразӕм, уӕд уый цӕмӕ ӕркӕндзӕн?

¹³ Йегъовӕ нын бафӕдзӕхста, цӕмӕй йӕ ӕппӕт зӕрдӕйӕ уарзӕм ӕмӕ иннӕты та уарзӕм, нӕхи куыд уарзӕм, афтӕ (Матф. 22:37–39). Фӕлӕ уый размӕ абзацы цы стихтӕ ис, уыдонӕй бӕрӕг у, не ’нкъарӕнтыл нӕ бар куы нӕ цӕуа ӕмӕ нын нӕ хъуыдытыл ӕмӕ нӕ хъуыддӕгтыл куы ӕндавой, уӕд уый куыд тӕссаг у. Зӕгъӕм, мӕсты адӕймагӕн раст уынаффӕ рахӕссын тынг зын уыдзӕн (Ӕмб. 14:17; 29:22). Кӕнӕ ныфссаст чи у, уый дӕр раст уынаффӕ зынтӕй рахӕсдзӕн (Ным. 32:6–12; Ӕмб. 24:10). Хъуамӕ «зондӕй цагъар уӕм Хуыцауы закъонӕн» (Ром. 7:25). Ахсджиаг уынаффӕ рахӕссын нӕ куы хъӕуа, уӕд ӕй хъуамӕ, цы ӕнкъарӕм, уымӕ гӕсгӕ ма рахӕссӕм.

УЫНАФФӔ АИВЫН КӔД БАХЪӔУЫ?

14. Кӕцӕй йӕ зонӕм, иуӕй-иу хатт уынаффӕ аивӕн кӕй вӕййы?

¹⁴ Кӕй зӕгъын ӕй хъӕуы, цы уынаффӕтӕ рахӕссӕм, уыдон хъуамӕ раст уой. Фӕлӕ уый ууыл дзурӕг нӕу, ӕмӕ, иугӕр уынаффӕ рахастам, уӕд ын аивӕн нал ис. Иуӕй-иу хатт нӕ фӕхъӕуы нӕ уынаффӕтӕм ногӕй ӕркӕсын ӕмӕ ма сӕ, чи зоны, фӕивын дӕр. Йегъовӕ дӕр афтӕ фӕкӕны. Ӕрхъуыды-ма кӕнӕм, Ионӕйы рӕстӕг ниневиӕгтӕ куы ’рфӕсмон кодтой, уӕд куыд бакодта: «Ӕцӕг Хуыцау сын федта сӕ хъуыддӕгтӕ, федта, се ’взӕр фӕндагӕй кӕй раздӕхтысты, уый, ӕмӕ фӕфӕсмон кодта, бӕллӕх ӕруадзинаг сыл кӕй уыд, ууыл ӕмӕ сыл ӕй нал ӕруагъта» (Ионӕ 3:10). Йегъовӕ куы федта, ниневиӕгтӕ се ’взӕр хъуыддӕгтыл кӕй ӕрфӕсмон кодтой ӕмӕ сӕ кӕй ныууагътой, уӕд «фӕфӕсмон кодта», ома йӕ уынаффӕ аивта. Уымӕй бӕрӕг у, уӕззау зондӕй кӕй архайы, стӕй сӕрныллӕг ӕмӕ тӕригъӕдгӕнаг кӕй у. Адӕмӕй бирӕтӕ мӕстыйӕ, сӕ сӕрмӕ фыццаг цы ныццӕвы, уый саразынц, фӕлӕ Йегъовӕ афтӕ нӕ бакӕны, суанг мӕсты куы вӕййы, уӕд дӕр.

15. Цы уынаффӕтӕ рахӕссӕм, уыдон хатт аивын цӕмӕн бахъӕуы?

¹⁵ Иуӕй-иу хатт ма уынаффӕ аивын хорз уаид, уавӕртӕ куы фӕивой, уӕд дӕр. Йегъовӕ дӕр-иу уый тыххӕй йӕ уынаффӕтӕ аивта (1 Пад. 21:20, 21, 27–29; 2 Пад. 20:1–5). Кӕнӕ та ног исты куы базонӕм, уӕд дӕр нӕ бахъӕуы нӕ уынаффӕ аивын. Ахъуыды-ма кӕнӕм, паддзах Давид куыд бакодта, ууыл. Саулы фырты фырт Мемфивосфейы тыххӕй йын мӕнг ныхӕстӕ фӕкодтой, ӕмӕ уынаффӕ уыдонмӕ гӕсгӕ рахаста. Фӕлӕ фӕстӕдӕр, хабар ӕцӕгӕй куыд уыд, уый куы базыдта, уӕд йӕ уынаффӕ аивта (2 Сам. 16:3, 4; 19:24–29). Ӕмӕ хатт мах дӕр фӕхъӕуы афтӕ бакӕнын.

16. а) Исты аскъуыддзаг кӕнын нӕ куы хъӕуа, уӕд нын цавӕр уынаффӕтӕ баххуыс кӕндзысты? б) Цы уынаффӕтӕ рахастам, уыдонмӕ ногӕй ӕркӕсын цӕмӕн фӕхъӕуы ӕмӕ-иу куыд хъуамӕ бакӕнӕм?

¹⁶ Библи нын дзуры, ахсджиаг уынаффӕтӕ хӕсгӕйӕ тагъд кӕй хъуамӕ ма кӕнӕм (Ӕмб. 21:5). Хъуамӕ-иу алцӕуыл дӕр лӕмбынӕг ахъуыды кӕнӕм, цӕмӕй нӕ бон уа зондджын уынаффӕ рахӕссын (1 Фес. 5:21). Бинонты хистӕр исты аскъуыддзаг кӕныны размӕ хъуамӕ раиртаса, уый фӕдыл Библийы ӕмӕ нӕ публикациты цы фыст ис, уый. Хорз ма уыдзӕн, йӕ бинонты дӕр, уый тыххӕй цы хъуыды кӕнынц, уымӕй куы бафӕрса. Хъуыды йӕ кӕныс, Хуыцау Авраамӕн кӕй загъта, цӕмӕй йӕ усмӕ байхъуыстаид? (Райд. 21:9–12). Уӕдӕ-иу хистӕр нӕлгоймӕгтӕ дӕр хъуамӕ фыццаг бацагурой ӕрмӕг, цы уынаффӕ сӕ хъӕуы рахӕссын, уый фӕдыл. Ӕмӕ, зӕгъгӕ, стӕй нӕ публикацитӕй фылдӕр цыдӕртӕ базыдтой ӕмӕ бамбӕрстой, сӕ уынаффӕ сӕ аивын кӕй хъӕуы, уӕддӕр нӕ тӕрсдзысты, сӕхи иннӕты цӕсты кӕй бафтаудзысты, уымӕй. Ӕмбаргӕ ӕмӕ бонзонгӕ хистӕр нӕлгоймӕгтӕ цӕттӕ вӕййынц, куы бахъӕуы, уӕд сӕ хъуыды ӕмӕ сӕ уынаффӕ аивынмӕ. Ӕмӕ-иу сӕ не ’ппӕт дӕр уымӕй куы бафӕзмӕм, уӕд ӕмбырды уыдзӕн фарн ӕмӕ иудзинад (Хъуыд. 6:1–4).

ЦЫ УЫНАФФӔ РАХАСТАЙ, УЫМӔ ГӔСГӔ АРХАЙ

17. Раст уынаффӕтӕ цӕй фӕрцы хӕсдзыстӕм?

¹⁷ Кӕцыдӕр хъуыддӕгты раст уынаффӕ рахӕссын уӕлдай ахсджиаг вӕййы. Зӕгъӕм, ус ракурай кӕнӕ мой скӕнай ӕви нӕ, кӕнӕ та цардӕмбалӕн кӕй равзарай, уый раст аскъуыддзаг кӕнын тынг ахсджиаг у. Афтӕ ма ахсджиаг у, ӕххӕстрӕстӕг лӕггад кӕнын кӕд райдайдзынӕ, уый аскъуыддзаг кӕнын дӕр. Цалынмӕ ахӕм уынаффӕтӕ рахӕссӕм, уӕдмӕ уал хъуамӕ алцӕуыл дӕр дзӕбӕх ахъуыды кӕнӕм ӕмӕ Йегъовӕйӕ ӕххуыс курӕм. Уымӕн, бӕгуыдӕр, рӕстӕг бахъӕудзӕн. Фӕлӕ нӕ кӕд фӕнды раст уынаффӕ рахӕссын, уӕд хъуамӕ нӕ зӕрдӕ Йегъовӕйыл дарӕм ӕмӕ йын йӕ разамындмӕ гӕсгӕ архайӕм (Ӕмб. 1:5). Ӕппӕты хуыздӕр уынаффӕтӕ ссарӕн ис Хуыцауы Ныхасы. Стӕй ма хъуамӕ Йегъовӕмӕ кувӕм, цӕмӕй нын бацамона, куыд бакӕнӕм, уый. Уый нӕ схайджын кӕндзӕн, йӕ фӕндонмӕ гӕсгӕ чи уыдзӕн, ахӕм уынаффӕ рахӕссынӕн нӕ цы миниуджытӕ хъӕуы, уыдонӕй. Уӕдӕ-иу ахсджиаг уынаффӕ рахӕссыны размӕ хъуамӕ алкӕддӕр ахъуыды кӕнӕм ахӕм фарстатыл: «Цы уынаффӕ рахӕссон, уымӕй бӕрӕг уыдзӕн, Йегъовӕйы кӕй уарзын? Мӕ бинонтӕ амондджындӕр фӕуыдзысты ӕмӕ не ’хсӕн фарн уыдзӕн? Ӕмӕ зӕгъӕн уыдзӕн, фӕразон ӕмӕ хӕларзӕрдӕ адӕймаг кӕй дӕн?»

18. Йегъовӕйы цӕмӕн фӕнды, цӕмӕй уынаффӕтӕ нӕхӕдӕг хӕссӕм?

¹⁸ Йегъовӕ нын йӕхи тыххӕй нӕ уарзын кӕны ӕмӕ нӕ йӕхицӕн нӕ лӕггад кӕнын кӕны. Уый нын радта сӕрибардзинад, ӕмӕ нӕ бон у равзарын, лӕггад ын кӕндзыстӕм ӕви нӕ (Йес. Н. 24:15; Еккл. 5:4). Фӕлӕ иугӕр йӕ разамындмӕ гӕсгӕ уынаффӕтӕ рахастам, уӕд ӕй фӕнды, цӕмӕй уыдонмӕ гӕсгӕ архайгӕ дӕр кӕнӕм. Йегъовӕйы разамынд растыл куы нымайӕм ӕмӕ йӕ уагӕвӕрдтӕм гӕсгӕ куы архайӕм, уӕд нӕ бон уыдзӕн раст ӕмӕ зондджын уынаффӕтӕ хӕссын. Стӕй бӕрӕг уыдзӕн, дыууӕрдӕм кӕй нӕ хӕцӕм, фӕлӕ алы хъуыддаджы дӕр фидар зондыл хӕст кӕй стӕм (Иак. 1:5–8; 4:8).