Дӕ лӕггаддзинад дын циндзинад хӕссӕд
1 Уыдон ӕрбаздӕхтысты «цингӕнгӕ». Афтӕ Библи ӕвдисы, 70 ахуыргӕнинаджы дӕргъвӕтин уацамындон балцӕй Йесомӕ куы ӕрбаздӕхтысты, уӕд цы ӕнкъардтой, уый. Сӕ цинӕн кӕрон нал уыд, Хуыцауы фӕндон кӕй ӕххӕст кодтой, уый тыххӕй (Лук. 10:17). Цы баххуыс кӕндзӕн дӕуӕн, цӕмӕй дӕуӕн дӕр дӕ лӕггаддзинад циндзинад хӕсса?
2 Раст цӕстӕнгас: Иегъовӕ Хуыцау дын йӕхӕдӕг бахӕс кодта, цӕмӕй адӕмы йӕ диссаджы фӕндонимӕ зонгӕ кӕнай. Хъусынгӕнгӕйӕ дӕ бон уыдзӕн адӕймагӕн баххуыс кӕнын, цӕмӕй ныууадза ацы дунейы чъизи хъуыддӕгтӕ ӕмӕ ссӕрибар уа мӕнг дины хъадамантӕй. Дӕ бон у адӕмӕн радзурын, сӕ бон кӕй у ахӕм дунейы цӕрын, цыран нӕ уыдзӕн абоны хуызӕн быцӕутӕ. Ахъуыды ма кӕн, Иегъовӕйӕн куыд ӕхсызгон вӕййы, ӕцӕгады мыггаг ӕнтыстджынӕй адӕмы сыгъдӕг зӕрдӕты куы фӕтауыс, уӕд. Хуыцауӕн ӕппӕт зӕрдӕйӕ лӕггад кӕн ӕмӕ йӕм зӕрдӕбынӕй кув, цӕмӕй дын йӕ сыгъдӕг уды уылты циндзинад дӕтта.
3 Хорз амындтӕ: Йесо йӕ 70 ахуыргӕнинагӕн амындтӕ цы фембӕлды лӕвӕрдта, уый у абоны лӕггаддзинады фембӕлды хуызӕн. Уыцы амындтӕ уый лӕвӕрдта, цӕмӕй уыдон ӕнтыстджынӕй лӕггад кодтаиккой (Лук. 10:1—16). Абон лӕггаддзинады фембӕлды дӕр мах ахуыр кӕнӕм, куыд ис адӕмимӕ ныхас кӕнӕн ӕмӕ хӕдзары Библи ахуыр кӕнын райдайӕн, ууыл. Уыцы фембӕлды хайад ис, дӕ уацамындон дӕсныйад хуыздӕр кӕн, ӕмӕ уӕд нӕдӕр тыхсгӕ кӕндзынӕ, нӕдӕр ӕфсӕрмы, фӕлӕ ныфсджынӕй хъусын кӕндзынӕ ӕмӕ циндзинад ӕнкъардзынӕ.
4 Фидӕныл хъуыды кӕнын: Кӕд Йесо бирӕ зындзинӕдтӕ бавзӕрста, уӕддӕр ын йӕ лӕггаддзинад хаста циндзинад. Цӕмӕн? Уымӕн ӕмӕ уый ӕдзухдӕр хъуыды кодта, цы арфӕдзинӕдтӕ ӕмӕ йӕм цы кад ӕнхъӕлмӕ каст, уыдоныл (Дзут. 12:2, НД). Дӕуӕн дӕр уый дӕ бон уыдзӕн, Иегъовӕйы номыл ӕмӕ йӕ ног дунейы цы арфӕдзинӕдтӕ уыдзӕн, уыдоныл ӕппынӕдзух куы хъуыды кӕнай, уӕд. Уый руаджы дын дӕ лӕггаддзинад хӕсдзӕн циндзинад ӕмӕ ӕмбардзынӕ, куыд ахсджиаг у дӕ куыст, уый.
5 Абон дын ӕппӕты кадджындӕр хъуыддаг у Иегъовӕйӕн лӕггад кӕнын. Уымӕ гӕсгӕ дӕ бон у зӕгъын: «Мӕн фӕнды сӕххӕст кӕнын Дӕу фӕндон, мӕ Хуыцау» (Пс. 39:9).