Дӕ хъус лӕмбынӕг дар Хуыцауы диссаджы хъуыддӕгтӕм
1 Ӕртӕ боны арвыстам диссаджы рӕстӕг облӕстон конгрессы, «Хуыцауы Ныхас ӕххӕстгӕнджытӕ», зӕгъгӕ. Мах ферох кодтам нӕ ӕрвылбоны сагъӕстӕ ӕмӕ нӕ хъусдард аздӕхтам Иегъовӕйы диссаджы хъуыддӕгтӕм. Программӕ афтӕ арӕзт уыд, цӕмӕй фӕфидардӕр уа нӕ уырнындзинад Хуыцауыл ӕмӕ йӕ Ныхасыл, нӕ ахастытӕ йемӕ фенгомдӕр уой ӕмӕ йын зӕрдиагдӕрӕй лӕггад кӕнӕм. Уӕдӕ конгрессы цы фехъуыстам, уый нын цы пайда хӕссы? (Иоан. 13:17).
2 Бинонтӕ хъусынц Хуыцауы Ныхасмӕ. Цалдӕр доклады уыд иу темӕйыл, «Хъусут Хуыцауы Ныхасмӕ», зӕгъгӕ, уыдон нын баххуыс кодтой, нӕ бинонтӕн цавӕр уырнындзинад ис, уый сбӕлвырд кӕнынӕн. Сывӕллӕттӕ уарзынц ахуыр кӕнын. Уымӕ гӕсгӕ, Хуыцауы тас цы ныййарджыты ис, уыдоны раныхас сразӕнгард кодта, цӕмӕй бинонтимӕ Библи ахуыр кӕнын суа бындур сӕ уырнындзинад фидар кӕнынӕн. Бинонты хистӕртӕй бирӕтӕ сӕ сывӕллӕттимӕ райдыдтой ахуыр кӕнын ног брошюрӕ, «Дӕ бон у, ӕмӕ Хуыцауы хӕлар уай!», зӕгъгӕ. Уый сын баххуыс кӕндзӕн Иегъовӕимӕ хорз ӕмӕ фидар хӕлардзинад скӕнынӕн. Ныййарджытӕ, амонут уӕ сывӕллӕттӕн, Хуыцауы зӕрдӕмӕ цы цӕуы ӕмӕ цы нӕ цӕуы, уымӕ сӕ хъус куыд хъуамӕ дарой, уый. Хуыцауы дӕр ӕмӕ йын йӕ хъуыддӕгтӕ дӕр кӕй уарзут, уый ӕвдисут (Пс. 102:2). Уӕ сывӕллӕттимӕ ӕвӕрут, уӕ уырнындзинад уын чи бафидар кӕндзӕн, ахӕм нысӕнттӕ ӕмӕ архайут, цӕмӕй уӕ къухы бафтой ӕмӕ цӕмӕй Иегъовӕйӕн ӕппӕт тыхтӕй лӕггад кӕнат.
3 Хуыцауы Ныхас нын рухс кӕны нӕ фӕндаг. Тынг ӕхсызгон нын уыд, кӕй райстам ног чиныг «Исайы пехуымпарад — рухс ӕппӕт адӕмӕн», I том. Ацы фыццаг чиныгӕй ныр цас бакастӕ? Исайы чиныджы ис рагзагъдтӕ, ӕнӕхуыцау адӕмтӕн карз тӕрхон кӕй ӕрцыд хаст, уый тыххӕй, уымӕй уӕлдай ма дзы дзырд цӕуы, Паддзахад Хуыцауы адӕмӕн цы диссаджы арфӕдзинӕдтӕ ӕрхӕсдзӕн, ууыл (Ис. 34:2; 35:10). Уыцы чиныджы руаджы ма фидардӕр кӕны нӕ уырнындзинад ӕмӕ нӕ ӕууӕнк Иегъовӕйыл ӕмӕ йӕ хъуыддӕгтыл (Ис. 12:2—5).
4 Чиныг «Исайы пехуымпарад» I том куы кӕсай, уӕд тагъд бамбардзынӕ, Исай Иегъовӕйыл иузӕрдион цӕй руаджы уыд, кӕд ӕмӕ йӕ алыварс фыддзинад арӕзтой, уӕддӕр. Хуыцау Исайы йӕ уацхӕссӕгӕй лӕггад кӕнынмӕ куы ӕрхуыдта, уӕд ын Исай загъта: «Мӕнӕ ӕз! Мӕн арвит» (Ис. 6:8, НД). Исай куыд ӕнӕзивӕг уыд, ууыл куы хъуыды кӕнай, уӕд дӕ уый разӕнгард кӕндзӕн дарддӕр дӕр хорз уацхъуыд хъусын кӕнынмӕ ӕмӕ зӕрдиагӕй «ӕвдисӕн ӕппӕт адӕмтӕн» дӕттынмӕ (Матф. 24:14).
5 Иегъовӕйы хъуыддӕгтӕм нӕ хъус лӕмбынӕг куы дарӕм, уӕд ӕй уый ноджы тынгдӕр скадджын кӕндзӕн. Уӕдӕ стыр кадыл нымайӕм, Хуыцауы ныхас ӕххӕстгӕнджытӕ кӕй стӕм, уый!