Исчи куы зӕгъа: «Сымахӕн уӕхи Библи ис»
Дӕ бон у ахӕм дзуапп радтын: «Дӕумӕ цавӕр Библи ис? Уый ... (ранымай, уырыссаг ӕвзагыл цы тӕлмацтӕ ис, уыдонӕй цалдӕр) у? Куыд зоныс, афтӕмӕй бирӕ тӕлмацтӕ ис». Стӕй ма дӕ бон у зӕгъын: «Ӕз ӕхсызгонӕй спайда кӕндзынӕн, дӕ зӕрдӕмӕ цы тӕлмац цӕуы, уымӕй. Фӕлӕ дӕ чи зоны фӕнды базонын, «Ног Дунейы тӕлмац» уӕлдай фылдӕр цӕмӕн цӕуы мӕ зӕрдӕмӕ. Хъуыддаг уый мидӕг ис, ӕмӕ ацы тӕлмац нырыккон, ӕнцонӕмбарӕн ӕвзагӕй фыст у, стӕй ма йӕ тӕлмацгӕнджытӕ архайдтой, цӕмӕй йӕ ратӕлмац кодтаиккой, Библи фыццаг куыддӕриддӕр уыд фыст, афтӕ».
Кӕнӕ дӕ бон у зӕгъын: «Куыд дӕ бамбӕрстон, афтӕмӕй дӕм хӕдзары Библи ис. Цавӕр тӕлмацӕй пайда кӕныс? [Бауадз ӕй дзуапп радтын.] Нӕ йӕ рахӕссис?» Стӕй ма дӕ бон у зӕгъын: «Цавӕрфӕнды тӕлмацӕй ма пайда кӕнӕм, уӕддӕр нӕ алчи дӕр хъуамӕ йӕ зӕрдыл дара, Иоанны 17:3-ӕм стихы Йесо цы ахсджиаг хъуыды бахахх кодта, уый, мӕнӕ йӕ дӕхи Библийы дӕр куыд уыныс, афтӕ...»
Ӕндӕр дзуапп: «Библийӕн бирӕ тӕлмацтӕ ис. Нӕ Ӕхсӕнад нӕ разӕнгард кӕны алыхуызон тӕлмацтӕй пайда кӕнын, цӕмӕй сӕ кӕрӕдзиимӕ барӕм ӕмӕ, Библи кӕимӕ ахуыр кӕнӕм, уыдонӕн Фыстады ӕцӕг мидис ӕмбарынӕн ӕххуыс кӕнӕм. Чи зоны йӕ зоныс, Библи ӕппӕты фыццаг кӕй уыди фыст дзуттаг, арамейаг ӕмӕ грекъаг ӕвзӕгтыл. Кӕй зӕгъын ӕй хъӕуы, мах бузныг стӕм тӕлмацгӕнджытӕй, мах цы ӕвзӕгтӕ зонӕм, уыдонмӕ нын Библи кӕй ратӕлмац кодтой, уый тыххӕй. Ды цавӕр тӕлмацӕй пайда кӕныс?»
Ноджы ма иу дзуапп: «Ӕвӕццӕгӕн, Хуыцауы Ныхас уарзыс. Уӕдӕ мӕ ныфс ис, кӕй дӕ фӕнддзӕн базонын, «Ног Дунейы тӕлмац» иннӕтӕй иууыл тынгдӕр цӕмӕй хицӕн кӕны, уый. Уыцы хицӕндзинад баст у, Фыстад кӕй кой кӕны, уыдонӕй ӕппӕты ахсджиагдӕр гоймаджы номыл. Зоныс ӕй, цавӕр ном у, уый?» Стӕй ма дӕ бон у зӕгъын: 1) «Зоныс ӕй, уымӕн йӕ ном Библийы фыццаг тексты, дзуттаг ӕвзагыл, иу-7 000 хатт кӕй ӕмбӕлы — цыфӕнды ӕндӕр номӕй дӕр фылдӕр?» 2) «Цы уӕлдай у, Хуыцауы ном дзурӕм ӕви нӕ? Цӕвиттонӕн, ахӕм ӕввахс ӕмбал дын ис, йӕ ном кӕмӕн нӕ зоныс? [Бауадз ӕй дзуапп радтын.] Кӕд нӕ фӕнды, цӕмӕй нын Хуыцауимӕ ӕввахс ахастытӕ уа, уӕд уал ын ахсджиаг у йӕ ном базонын. Ӕркӕс ма, Иоанны 17:3, 6-ӕм стихты Йесо цы загъта (Рац. 15:3)».