Ӕххуыс кӕн иннӕтӕн Иегъовӕйӕн зӕрдиагӕй лӕггад кӕнынӕн
1 Иегъовӕйӕн йӕ бон у домын, цӕмӕй йын махӕй алчидӕр зӕрдиагӕй лӕггад кӕна (Маркы 12:30; Кол. 3:23). Кӕд нӕ алкӕмӕндӕр алыхуызон курдиӕттӕ ис, уӕддӕр нӕ алкӕй дӕр фӕнды Иегъовӕйӕн ӕппӕт тыхтӕй лӕггад кӕнын (Матф. 13:23).
2 Уыцы хъуыддаджы нӕ сывӕллӕттӕн нӕ бон у баххуыс кӕнын? Библи кӕимӕ ахуыр кӕнӕм, уыдоны нӕ бон нӕу фылдӕр аразынмӕ разӕнгард кӕнын? Ӕмбырды исчи ис ахӕм, исты хъуыддаджы йын куы баххуыс кӕнӕм, уӕд хуыздӕр чи лӕггад кӕндзӕн?
3 Куыд ис баххуыс кӕнӕн. Бирӕтӕ ӕмбырды фембӕлдтӕй иу дӕр нӕ цух кӕнынц. Уыдонӕй иуӕй-иутӕн сӕ бон у уацамынды цӕуын дӕр райдайын. Уый хорз у. Фӕлӕ сӕ алчи нӕ хъуыды кӕны Иегъовӕйӕн нывонддзырд радтын ӕмӕ аргъуыд райсыныл. Нӕ бон сын у баххуыс кӕнын? Зӕрдӕхӕларӕй семӕ хицӕнӕй аныхас кодтам? Нӕ бон сын у баххуыс кӕнын, зӕгъӕм, семӕ зӕрдӕбынӕй куы аныхас кӕнӕм ахӕм статьяты бындурыл, куыд: «Следует ли тебе принимать крещение?» (w93 1.4. 4—7 ф., уыр.) кӕнӕ «Следует ли мне креститься?» (w92 1.10. 20—23 ф., уыр.) кӕнӕ «Что препятствует тебе креститься?» (w89 15.1. 10—15 ф., уыр.).
4 Ис ахӕмтӕ дӕр, донаргъуыд чи райста, фӕлӕ уымӕй дарддӕр йӕхимӕ исты бӕрн чи нӕ исы, кӕд ӕм курдиӕттӕ ис ӕмӕ йӕ йӕ уавӕртӕ дӕр амонынц, уӕддӕр. Иуӕй-иутӕ сты иудадзыг хъусынгӕнджытӕ, ӕмӕ рӕстӕгӕй-рӕстӕгмӕ фӕлӕггад кӕнынц ӕххуысгӕнӕг пионертӕй дӕр. Чи зоны, цавӕрдӕр ивындзинӕдтӕ куы скӕной, уӕд сӕ бон суа иудадзыг ӕххуысгӕнӕг пионертӕй лӕггад кӕнын? Ӕххуысгӕнӕг пионертӕй искӕмӕн ӕххӕстрӕстӕг пионер суа, уый йӕ бон нӕу? Уыдонӕн сӕ ныййарджытӕ, хистӕр нӕлгоймӕгтӕ кӕнӕ ӕххӕстрӕстӕг пионертӕ ныхасӕй ӕмӕ хъуыддагӕй гыццыл куы баххуыс кӕной, уӕд уыдон дӕр, гӕнӕн ис, бафӕнда сӕ курдиӕттӕ ӕмӕ сӕ уавӕртӕй ӕххӕстӕй пайда кӕнын сӕ лӕггаддзинады (2 Тим. 4:2).
5 Фылдӕр аразынмӕ разӕнгард кӕнын. Иуӕй-иуты фылдӕр аразынмӕ куы сразӕнгард кӕной ӕмӕ сӕ ахӕм кадджын хӕс райсын куы бафӕнда, уӕд сӕ, гӕнӕн ис, службӕйон ӕххуысгӕнджытӕй кӕнӕ хистӕр нӕлгоймӕгтӕй снысан кӕной (1 Тим. 3:1). Теократон лӕггаддзинады скъолайы цы уынаффӕтӕ вӕййы, уыдонӕй пайдагӕнгӕйӕ бирӕтӕн сӕ бон у ӕмӕ хорз оратортӕ суой. Иуӕй-иу ӕнӕус хистӕр нӕлгоймӕгтӕ ӕмӕ службӕйон ӕххуысгӕнджытӕн баххуыс кодтой, цӕмӕй бӕлвырд ивындзинӕдтӕ скодтаиккой ӕмӕ сын фадат уыдаид Лӕггаддзинад фӕхуыздӕр кӕныны скъоламӕ ацӕуын. Дӕ бинонтӕй кӕнӕ де ’мбырдӕй искӕмӕн куы баххуыс кӕной, уӕд ма цавӕр ӕндӕр хӕстӕ уаид сӕ бон ӕххӕст кӕнын? Куыд у дӕ бон ахӕмтӕн баххуыс кӕнын?
6 Мах Иегъовӕйӕн хъуамӕ ӕппӕт тыхтӕй лӕггад кӕнӕм (Рар. 4:11). Фӕнды нӕ, цӕмӕй йын йӕ фӕндон зӕрдиагӕй ӕххӕст кӕнӕм ӕмӕ иннӕтӕн дӕр уыцы хъуыддаджы ӕххуыс кӕнӕм (Еф. 6:6). Кӕмӕн баххуыс кӕной ӕмӕ кӕй бафидар кӕной, уый уымӕн куы саргъ кӕна ӕмӕ Иегъовӕйӕн зӕрдиагӕй куы лӕггад кӕна, уӕд йӕ бон у фидарӕй ӕууӕндын, Иегъовӕ йын «ӕмбӕлон хӕрзиуӕг» кӕй ратдзӕн, ууыл (Кол. 3:24, НД).