Ныййарджытӕ, уӕ сывӕллӕтты гыццылтӕй райдайут ахуыр кӕнын
1 «Сахуыр кӕн лӕппуйы, хуыздӕр ын цы фӕндаг у, ууыл; куы базӕронд уа, уӕддӕр ӕй нӕ ныууадздзӕн» (Ӕмб. 22:6). Ныййарджытӕ, кӕд уӕ фӕнды, цӕмӕй уӕ сывӕллӕттӕ ӕцӕгады фӕндаг ма «ныууадзой», уӕд сӕ кӕд хъуамӕ райдайат ахуыр кӕнын? Хӕрзгыццылтӕй!
2 Павел Тимофейӕ афтӕ куы загъта, зӕгъгӕ йын «гыццылӕй нырмӕ» амыдтой Хуыцауы тыххӕй, уӕд ӕй, ӕвӕццӕгӕн, фӕндыд зӕгъын, зӕгъгӕ, бынтон сывӕллонӕй (2 Тим. 3:14, 15). Уый фӕрцы Тимофейӕ рауад диссаджы хорз, фӕлтӕрд чырыстон адӕймаг (Фил. 2:19—22). Ныййарджытӕ, сымах дӕр уӕ сывӕллӕтты хъуамӕ «гыццылӕй» райдайат ахуыр кӕнын, цӕмӕй уын «рӕзой Иегъовӕимӕ» (1 Пад. 2:21).
3 Дон сыл кӕнут, цӕмӕй рӕзой. Талайыл куыд хъӕуы иудадзыг дон кӕнын, цӕмӕй дзы стыр бӕлас сырӕза, афтӕ алы кары сывӕллоны дӕр хъӕуы Библийы ӕцӕгады донӕй ӕфсадын, цӕмӕй Хуыцауы фӕлтӕрд лӕггадгӕнӕг суа. Сывӕллӕттӕн ӕцӕгад ӕмбарынӕн ӕмӕ сын Хуыцауимӕ ӕввахс ахастытӕ скӕнынӕн сӕйраджыдӕр ӕххуыс кӕны иудадзыг бинонтимӕ Библи ахуыр кӕнын. Фӕлӕ сымах, ныййарджытӕ, хъуамӕ уӕ хъус дарат, алы сывӕллонӕн дӕр йӕ бон хъусын цас у, уымӕ. Чысыл сабиты ахуыр кӕнын хуыздӕр уыдзӕн, стӕм хатт ӕмӕ бирӕ рӕстӕг ахуыргӕнгӕйӕ нӕ, фӕлӕ арӕхдӕр ӕмӕ цыбыр рӕстӕг (Дык. з. 11:18, 19).
4 Афтӕ макуы хъуыды кӕнут, ӕмӕ уӕ сывӕллӕттӕ ахуыр кӕнынӕн нырма гыццыл сты. Дзурут сын, Библи цы адӕймӕгты кой кӕны, уыдоны тыххӕй. Ӕххуыс сын кӕнут Библийы цаутӕ ныв кӕнынӕн кӕнӕ сӕ сценкӕтӕ ӕвӕрынӕн. Пайда кӕнут Ӕхсӕнады видеофильмтӕй ӕмӕ аудиокассетӕтӕй, уыимӕ ма библион драмӕтӕй дӕр. Уӕ бинонтимӕ ахуыр кӕнут уӕ сывӕллӕтты кармӕ гӕсгӕ ӕмӕ сӕ гӕнӕнтӕм гӕсгӕ. Райдианы сӕ хъӕудзӕн хуымӕтӕгӕй ӕмӕ гыццылгай ахуыр кӕнын, фӕлӕ сывӕллон куыд рӕза, афтӕ йын хъӕудзӕн лӕмбынӕгдӕр ӕмӕ фылдӕр амонын. Библийы ахуыр сын скӕнут цымыдисаг ӕмӕ хъӕлдзӕг. Кӕй зӕгъын ӕй хъӕуы, сымах фӕнды, цӕмӕй уӕ сывӕллӕттӕ Хуыцауы Дзырд «бауарзой», ӕмӕ сын уымӕ гӕсгӕ Библийы ахуыр, цас уӕ бон у, уыйас цымыдисагдӕр скӕнут (1 Петры 2:2).
5 Ахуыр сӕ кӕнут ӕмбырды хъуыддӕгты архайыныл. Уӕ сывӕллӕттӕн цадӕггай сӕ разы нысӕнттӕ ӕвӕрут, цӕмӕй ӕмбырды хъуыддӕгты фылдӕр архайой. Раздӕр уал цавӕр нысан ис сӕвӕрӕн? Дыууӕ гыццыл сывӕллоны кӕмӕн ис, ахӕм ныййарджытӕ загътой: «Мах дыууӕйы дӕр райдыдтам ахуыр кӕнын Паддзахады залы ӕнцад бадын». Уый фӕстӕ сывӕллӕттӕн баххуыс кӕнут, цӕмӕй ӕмбырды фембӕлдты сӕхи ныхӕстӕй дзуапп дӕттой ӕмӕ сӕ сразӕнгард кӕнут, цӕмӕй Теократон лӕггаддзинады скъолайы сӕхи ныффыссой. Хорз уыдзӕн уацамынды ахӕм нысӕнттӕ сӕвӕрын: искӕмӕн трактат радтын, Библийӕ стих бакӕсын, журнал радтын ӕмӕ хӕдзары цӕрджытимӕ дзӕбӕх аныхас кӕнын.
6 Ут сын фӕзминаг. Уӕ сывӕллӕттӕ уынынц, алы бон дӕр Иегъовӕйы тыххӕй кӕй ныхас кӕнут ӕмӕ йӕм кӕй кувут, уый? Уынынц, йӕ Ныхас ын кӕй ахуыр кӕнут, фембӕлдтӕм кӕй цӕут, уацамынды кӕй архайут ӕмӕ уын Хуыцауы фӕндон ӕххӕст кӕнын ӕхсызгон кӕй у, уый? (Пс. 39:9). Уый ахсджиаг у, уыимӕ ма уыцы хъуыддӕгтӕ хъуамӕ иумӕ дӕр аразат. Ӕхсӕз сывӕллоны чи схъомыл кодта, ӕмӕ ныр Иегъовӕйы иузӕрдион Ӕвдисӕнтӕ чи сты, ахӕм мадӕй йӕ чызг фӕстӕдӕр загъта: «Иууыл тынгдӕр ныл бандӕвта нӕ мадӕн йӕхи дӕнцӕг — уый ныл цыфӕнды ныхӕстӕй дӕр тыхджындӕр ӕндӕвта». Цыппар сывӕллоны мад та афтӕ загъта: «„Сӕйрагдӕр у Иегъовӕйы фӕндон“, зӕгъгӕ, уыдон нын ӕрмӕст ныхӕстӕ нӕ уыдысты, фӕлӕ нӕ царды фӕтк».
7 Ныййарджытӕ, уӕ сывӕллӕтты гыццылтӕй райдайут ахуыр кӕнын, амонут сын Хуыцауы Ныхасӕй ӕцӕгад, цадӕггай сын сӕ разы ӕвӕрут алыхуызон нысӕнттӕ ӕмӕ архайут, цӕмӕй сын фӕзминаг уат. Афтӕ куы кӕнат, уӕд уыдзыстут амондджын!